କରାଚୀ: ବିଶ୍ୱର ନୂ୍ୟନତମ ବାସଯୋଗ୍ୟ ସହର ତାଲିକାରେ କରାଚୀ ରହିଛି। ବିଶ୍ୱ ବାସଯୋଗ୍ୟ ସୂଚକାଙ୍କ-୨୦୧୯ ବୁଧବାର ପ୍ରକାଶ ପାଇଥିବାବେଳେ ଇକନମିଷ୍ଟ ଗ୍ରୁପ୍ର ରିସର୍ଚ୍ଚ ଆଣ୍ଡ ଆନାଲିସିସ୍ ଡିଭିଜନ୍ର ଇକୋନୋମିଷ୍ଟ ଇଣ୍ଟେଲିଜେନ୍ସ ୟୁନିଟ୍ (ଇଆଇୟୁ)ର ରିପୋର୍ଟରୁ ଏହି ସୂଚନା ମିଳିଛି।
ଚଳିତ ବର୍ଷ ଏହି ତାଲିକାରେ କରାଚୀ ୧୩୬ତମ ସ୍ଥାନରେ ରହି ବିଶ୍ୱର ପଞ୍ଚମ ନୂନତମ ବାସଯୋଗ୍ୟ ସହର ମାନ୍ୟତା ପାଇଛି। ଅବଶ୍ୟ ସହର ପରିଚାଳନା କ୍ଷେତ୍ରରେ କରାଚୀ ସିରିଆ, ଦାମାସ୍କସ୍ ନାଇଜେରିଆର ଲାଗୋସ, ବାଂଲାଦେଶର ଢାକା ଏବଂ ଲିବ୍ୟାର ତ୍ରିପୋଲିଠାରୁ ଅପେକ୍ଷାକୃତ ଉନ୍ନତ ମାନ ପ୍ରଦର୍ଶନ କରିଛି। ୧୦ ନୂ୍ୟନତମ ବାସଯୋଗ୍ୟ ସହର ତାଲିକାରେ ରହିଛନ୍ତି ଭେନିଜୁଏଲାର କାରାକାସ, ଆଲଜେରିଆର ଆଲଜିୟର୍ସ, କାମେରୁନ୍ର ଡୋଉଆଲା, ଜିମ୍ବାବ୍ବେର ହାରାରେ ଏବଂ ପାପୁଆ ନ୍ୟୁଗିନିର ପୋର୍ଟ ମୋରେସବାଏ। ତେବେ କରାଚୀର ର଼୍ୟାଙ୍କିଂ ପୂର୍ବବର୍ଷ ତୁଳନାରେ ଗୋଟିଏ ସ୍ତରକୁ ବୃଦ୍ଧି ପାଇଛି। ୨୦୧୮ରେ ଏହା ୧୩୭ତମ ସ୍ଥାନରେ ଥିଲା।
ଇତିମଧ୍ୟରେ ଅଷ୍ଟ୍ରିଆର ରାଜଧାନୀ ଭିଏନା ବିଶ୍ୱର ସର୍ବାଧିକ ବାସଯୋଗ୍ୟ ସହର ର଼୍ୟାଙ୍କ୍ରେ ରହିଛି। ଭିଏନା ଚଳିତବର୍ଷ ଅଷ୍ଟ୍ରେଲିଆର ମେଲବୋର୍ନ ସହରଠାରୁ ଗୋଟିଏ ର଼୍ୟାଙ୍କ ଆଗରେ ରହିଛି। ମେଲବୋର୍ନ ୭ବର୍ଷ ଧରି ସର୍ବାଧିକ ବାସଯୋଗ୍ୟ ସହର ତାଲିକାର ଶୀର୍ଷରେ ରହି ଆସିଥିଲା।
ବିଶ୍ୱ ବାସଯୋଗ୍ୟ ତାଲିକା ପ୍ରସ୍ତୁତି ପୂର୍ବରୁ କୌଣସି ସହରର ଡିଜିଟାଲ୍, ଭିତ୍ତିଭୂମି, ସ୍ବାସ୍ଥ୍ୟ ଏବଂ ବ୍ୟକ୍ତିଗତ ନିରାପତ୍ତାକୁ ବିଚାରକୁ ନିଆଯାଏ। କରାଚୀ ଡିଜିଟାଲ୍ ନିରାପତ୍ତାରେ ୫୨ତମ, ସ୍ବାସ୍ଥ୍ୟରେ ୫୯ତମ, ଭିତ୍ତିଭୂମିରେ ୫୫ତମ ଏବଂ ବ୍ୟକ୍ତିଗତ ନିରାପତ୍ତା କ୍ଷେତ୍ରରେ ୫୮ତମ ସ୍ଥାନରେ ରହିଛି। ପ୍ରଥମ ଥର ପାଇଁ ଜୀବନଯାପନ ଉପରେ ଜଳବାୟୁର ପ୍ରଭାବକୁ ବିଚାରକୁ ନିଆଯାଇଛି।
