ନୂଆଗାଁ,୨୨ା୧ (ଡି.ଏନ.ଏ.): ନୟାଗଡ଼ ଜିଲା ନୂଆଗାଁ ପଞ୍ଚାୟତ ସମିତିର ନବମ ସାଧାରଣ ଅଧିବେଶନ ମଙ୍ଗଳବାର ରାଜୀବ ଗାନ୍ଧୀ ସଭାଗୃହ ମଧ୍ୟରେ ଅନୁଷ୍ଠିତ ହୋଇଯାଇଛି। ବ୍ଲକ ଚେୟାରମ୍ୟାନ ଅନ୍ତର୍ଯାମୀ ସ୍ବାଇଁଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା ଅତିଥି ଭାବେ ଯୋଗ ଦେଇ ପ୍ରତି ବିଭାଗର ସମୀକ୍ଷା କରିଥିଲେ। କୌଣସି ବିଭାଗର ଅଧିକାରୀ କିମ୍ବା କର୍ମଚାରୀ ସୁଚାରୁରୂପେ କାର୍ଯ୍ୟ କରୁ ନ ଥିବାରୁ ସେମାନଙ୍କୁ ତାଗିଦ କରିଥିଲେ। ବିଶେଷ କରି କୃଷି ବିଭାଗ ଓ ଆର୍ଡବ୍ଳ୍ୟୁଏସ୍ଏସ୍ର କର୍ମଚାରୀ କାର୍ଯ୍ୟରେ ଅବହେଳା କରିବା ସହ ଜନସାଧାରଣଙ୍କ ସ୍ବାର୍ଥ ଅପେକ୍ଷା ନିଜ ସ୍ବାର୍ଥ ପ୍ରତି ଧ୍ୟାନ ଦେଉଥିବାରୁ ବିଧାୟକଙ୍କ ସମେତ ବୈଠକରେ ଉପସ୍ଥିତ ଲୋକ ପ୍ରତିନିଧିମାନେ କ୍ଷୋଭ ପ୍ରକାଶ କରିଥିଲେ। ପ୍ରତି ପଞ୍ଚାୟତରେ ପାନୀୟ ଜଳର ଅବ୍ୟବସ୍ଥା ରହିଥିବାବେଳେ ସେଥିପ୍ରତି ପଦକ୍ଷେପ ବିଷୟରେ ଲୋକପ୍ରତିନିଧିମାନେ ପ୍ରଶ୍ନ କରିବାରୁ ଯନ୍ତ୍ରୀ ଜ୍ୟୋତିରଞ୍ଜନ ବେହେରା କୌଣସି ସନ୍ତୋଷଜନକ ଉତ୍ତର ଦେଇପାରି ନ ଥିଲେ।
ଚାଷୀମାନଙ୍କ ପାଇଁ ସରକାର ବିଭିନ୍ନ ଯୋଜନା କରୁଥିବା ବେଳେ କୃଷି ବିଭାଗ ଦ୍ୱାରା ତାହା ଲୋକାଭିମୁଖୀ କରାଯାଉ ନାହିଁ। ଏପରି କି ଲୋକ ପ୍ରତିନିଧିମାନେ ମଧ୍ୟ ସୂଚନା ପାଇପାରୁ ନାହାନ୍ତି। ତେଣୁ ଲୋକ ପ୍ରତିନିଧିଙ୍କ ମାଧ୍ୟମରେ ଲୋକମାନଙ୍କୁ ଏସବୁ ଜଣାଇବା ପାଇଁ ଗତ ସାଧାରଣ ଅଧିବେଶନରେ କୃଷି ଅଧିକାରୀଙ୍କୁ ବିଧାୟକ ନିର୍ଦ୍ଦେଶ ଦେଇଥିଲେ। କିନ୍ତୁ ଲୋକ ପ୍ରତିନିଧିଙ୍କୁ କିଛି ନ ଜଣାଇ ଅନେକ କାର୍ଯ୍ୟକ୍ରମ କରାଯାଇଥିବା କୃଷି ଅଧିଦର୍ଶକ କୁମୁଦୁନୀ ଦେଈ ସୂଚନା ଦେଇଥିଲେ। ଏଥିରେ ବିଧାୟକ କ୍ଷୁବ୍ଧ ହେବା ସହ ଯଥାଶୀଘ୍ର ଲୋକ ପ୍ରତିନିଧିଙ୍କୁ ନେଇ ବୈଠକ କରିବା ପାଇଁ ନିର୍ଦ୍ଦେଶ ଦେଇଥିଲେ। ଜାକେଡା ପଞ୍ଚାୟତରେ ଉଦ୍ୟାନ ବିଭାଗ କାଜୁ ଲଗାଇ ଦୁର୍ନୀତି କରିଥିବା ପ୍ରସଙ୍ଗ ସରପଞ୍ଚ ତ୍ରିଲୋଚନ ସାହୁ ଉଠାଇଥିବା ବେଳେ ଉଦ୍ୟାନ ସମ୍ପ୍ରସାରଣ କର୍ମୀ କୃଷ୍ଣଚନ୍ଦ୍ର ବାରିକ ନୂଆକରି ଯୋଗ ଦେଇଥିବାରୁ ଏ ବିଷୟରେ ଜାଣି ନାହାନ୍ତି କହି କଥାକୁ ଏଡାଇ ଦେଇଥିଲେ। ଯଥାଶୀଘ୍ର ପାନୀୟ ଜଳ ଯୋଗାଣ ଅବ୍ୟବସ୍ଥାରେ ସୁଧାର ଆଣିବା ସହ ବାହାଡାଝୋଲାରେ ୧୫ଦିନ ମଧ୍ୟରେ ପାନୀୟ ଜଳର ବ୍ୟବସ୍ଥା ନ ହେଲେ ବିଭାଗୀୟ ଯନ୍ତ୍ରୀମାନଙ୍କ ପ୍ରତି ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଧାୟକ କହିଥିଲେ। ଉକ୍ତ ବୈଠକରେ ବିଧାୟକ ବେହେରା, କନ୍ଧମାଳ ଏମ୍ପିଙ୍କ ପ୍ରତିନିଧି ବିଜୟ କୁମାର ସାସମଲ, ଜିଲା ପରିଷଦ ସଭ୍ୟ ସୁଦୀପ୍ତ କୁମାର ରାୟ, ନୂଆଗାଁ ବ୍ଲକ ଚେୟାରମ୍ୟାନ ସ୍ବାଇଁ, ବ୍ଲକ ଉପାଧ୍ୟକ୍ଷ ପୁଷ୍ପାଞ୍ଜଳି ସାହୁ, ବିଡିଓ ଶିରିୟାଲ ଶୁଭ୍ର ପଟେଲଙ୍କ ସମେତ ବ୍ଲକ କର୍ମଚାରୀ, ବିଭିନ୍ନ ବିଭାଗୀୟ ଅଧିକାରୀ ଓ ଲୋକ ପ୍ରତିନିଧି ଉପସ୍ଥିତ ଥିଲେ ।
