ନୂଆପଡା ଅଫିସ,୨ା୯
ପୂର୍ବବର୍ଷ ଭଳି ଭାଦ୍ରବ ମାସ ପଞ୍ଚମୀ ତିଥିରେ ସମଗ୍ର ପଶ୍ଚିମ ଓଡିଶାରେ ନୂଆଖାଇ ପାଇଁ ଦିନ ଧାର୍ଯ୍ୟ ହୋଇଛି । ଏଥିପାଇଁ ସବୁଠି ଏକ ପ୍ରକାର ପ୍ରସ୍ତୁତି ଶେଷ ହୋଇଯାଇଛି । ସହର ବଜାର ଚଳଚଞ୍ଚଳ ହୋଇପଡିଥିବାବେଳେ ଦୂରଦୂରାନ୍ତରୁ ପୁଅଝିଅ ଘରକୁ ଲେଉଟିବା ଆରମ୍ଭ କରି ଦେଇଛନ୍ତି । ହେଲେ ସରକାରୀସ୍ତରରେ ଯେତିକି ଗୁରୁତ୍ୱ ଦିଆଯିବା କଥା ସେତି କି ଦିଆଯାଇ ନ ଥିବା ଲୋକେ ଅଭିଯୋଗ କରୁଛନ୍ତି । ପଶ୍ଚିମ ଓଡିଶାର ଲୋକ ସଂସ୍କୃତି ପ୍ରତି ଉପେକ୍ଷା କରାଯାଉଥିବା ନେଇ ଭିନ୍ନ ମତ ପ୍ରକାଶ ପାଉଛି ।
ଗଣପର୍ବ ନୂଆଁଖାଇ କୃଷି ପର୍ବ ବୋଲି କୁହାଯାଉଥିବା ପର୍ବରେ ଲୋକଙ୍କୁ ନୂଆଁ ଅନ୍ନ ମିଳିବ। ଇଷ୍ଟଦେବୀ ସମଲେଇଙ୍କୁ ଅନ୍ନ ଦେଇ ସମସ୍ତେ ଅନ୍ନ ଛୁଇଁବେ। ସେଥିପାଇଁ ପ୍ରତି ପରିବାରରେ ପ୍ରସ୍ତୁତି କରାଯାଇଛି। ସମସ୍ତଙ୍କ ଘରେ ଲିପାପୋଛା କାମ ସରିଯାଇଛି । ଗାଁରେ ମା’ମାନେ ଘର ଅଗଣାକୁ ନୂତନ ଭାବେ ସଜ୍ଜିତ କରିଛନ୍ତି । ଏମିତିକି ଜିଲାର ଉପାନ୍ତ ସୁନାବେଡା ଅଭୟାରଣ୍ୟ ଭିତରେ ମଧ୍ୟ ଆଦିବାସୀମାନେ ନୂଆଁଖାଇ ପାଇଁ ସ୍ବତନ୍ତ୍ର ଭାବେ ସଜ୍ଜାଇଥିବା ଦେଖାଯାଇଛି । ପିଲାଠୁ ବୁଢା ଏହି ଦିନ ନୂଆଁ ବସ୍ତ୍ର ପରିଧାନ ପରମ୍ପରା ରହିଥିବାରୁ ଦୋକାନ ବଜାରରେ ଭିଡ ଦେଖିବାକୁ ମିଳିଛି । ନୂଆଁଖାଇ ପାଇଁ ବ୍ୟବହୃତ ମାଟି ପାତ୍ର, ଚାଙ୍ଗିଡି, ଝାଡୁ ଆଦି ମା’ମାନେ ବଜାରରୁ ସଂଗ୍ରହ କରୁଛନ୍ତି । ଘରର ଝିଅ ପୁଅ ଯେତିକି ଦୂରେ ଥାଆନ୍ତୁ ନା କାହିଁିକି ଘରକୁ ଲେଉଟି ଆସିଛନ୍ତି । ପଡୋଶୀ ଛତିଶଗଡ, ଝାଡଖଣ୍ଡ ଅଞ୍ଚଳରେ ବାସ କରୁଥିବା ଲୋକେ ଗାଡି ଭଡା କରି ନିଜ ଗାଁକୁ ଫେରୁଥିବା ଦେଖାଯାଉଛି । ଏକାଠି ବସି ସମସ୍ତେ ନୂଆଁଖାଇବେ । ଏହା ପଶ୍ଚିମ ଓଡିଶାର ଗଣପର୍ବ । ଏହାକୁ ସମସ୍ତ ପର୍ବ ମଧ୍ୟରେ ରାଜା ପର୍ବ ବୋଲି କେହି କେହି ଆଖ୍ୟା ଦିଅନ୍ତି । ହେଲେ ସରକାରୀସ୍ତରରେ ଯେତିକି ଗୁରୁତ୍ୱ ଦିଆଯିବା କଥା ତାହା ଦିଆଯାଉ ନ ଥିବା ଲୋକେ ଅଭିଯୋଗ କରନ୍ତି। ଏହି ପ୍ରସଙ୍ଗରେ ଜିଲା ଗ୍ରାମପଞ୍ଚାୟତ କାର୍ଯ୍ୟନିର୍ବାହୀ ସଂଘ ସଭାପତି ଭାନୁ ଦଣ୍ଡସେନାଙ୍କ କହିବାନୁଯାୟୀ ରାଜ୍ୟ ସରକାର ନୂଆଁଖାଇ ସମେତ ୫ ଦିନ ଧରି କୌଣସି ଅଧିକାରୀ ନିଜ କାର୍ଯ୍ୟସ୍ଥଳ ନ ଛାଡିବାକୁ ଚିଠି କରିଛନ୍ତି । ଏହାକୁ ନେଇ ସବୁସ୍ତରରେ ଅସନ୍ତୋଷ ପ୍ରକାଶ ପାଇଛି ବୋଲି କହିଛନ୍ତି । ଏହିଭଳି ଏକ ଗୁରୁତ୍ୱପୂର୍ଣ୍ଣ ପର୍ବରେ ଜିଲାର ନୂଆପଡା ଭଳି ଜିଲା ସଦର ମହକୁମାର ସମସ୍ତ ଏଟିଏମ ଆଜକୁ ୨ ଦିନ ହେବ ବନ୍ଦ ହୋଇପଡିଛି । ପେଟ୍ରୋଲ ପମ୍ପଗୁଡିକ ଅଚଳ ହୋଇପଡିଛି । ଲୋକେ ସାଧାରଣ ସେବା ପାଇଁ ହଇରାଣ ହେଉଥିବାରୁ ଜନ ଅସନ୍ତୋଷ ବୃଦ୍ଧିପାଉଛି । ଏହା ଉପରେ ରାଜ୍ୟ ସରକାର ହସ୍ତକ୍ଷେପ କରି ଲୋକ ସଂସ୍କୃତି ପ୍ରତି ଧ୍ୟାନ ଦେବା ଜରୁରୀ ବୋଲି ଦାବି ହେଉଛି ।
