ଭୁବନେଶ୍ୱର, ୧୦।୫ (ବ୍ୟୁରୋ): କରୋନାକୁ ରୋକୁଥିବା ମୁଖ୍ୟଅସ୍ତ୍ର ସାମାଜିକ ଦୂରତ୍ୱ ନିୟମ ଅନୁପାଳନ କ୍ଷେତ୍ରରେ ସାଲିସ୍ କରାଯାଉଥିବା ଦେଖିବାକୁ ମିଳିଛି। କ୍ଷୁଦ୍ର ଓ ମଧ୍ୟମ ବ୍ୟବସାୟୀଙ୍କ ପାଇଁ ତାଲାବନ୍ଦ ଥିବାବେଳେ ବଡ଼ ବ୍ୟବସାୟୀଙ୍କ ପାଇଁ ଭୁବନେଶ୍ୱର ବଜାର ଖୋଲା ରହିବା ନାନା ପ୍ରଶ୍ନବାଚୀ ସୃଷ୍ଟି କରୁଛି।
ସୂଚନାଥାଉ କି, ଗୋଟିଏ ସ୍ଥାନରେ କିମ୍ବା ଗୋଟିଏ ଛାତ ତଳେ ୫ରୁ ଊର୍ଦ୍ଧ୍ୱ ଦୋକାନ ଥିଲେ ତାହାକୁ ମାର୍କେଟ କମ୍ପ୍ଲେକ୍ସ ଘୋଷଣା ସହ ସେଠାରେ ଦୋକାନଗୁଡ଼ିକୁ ବନ୍ଦ ରଖାଯିବ ବୋଲି ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି। ହେଲେ ଭୁବନେଶ୍ୱରର ବିଭିନ୍ନ ସ୍ଥାନରେ ଏବେ ସମ୍ପୂର୍ଣ୍ଣ ବିପରୀତ ଚିତ୍ର ଦେଖିବାକୁ ମିଳୁଛି। ବିଏମ୍ସିର କେତେଜଣ ଅଧିକାରୀ ହାତଗୁଞ୍ଜା ନେଇ ଦୋକାନ ଖୋଲିବାକୁ ବ୍ୟବସାୟୀଙ୍କୁ ଅନୁମତି ଦେଇଥିବା ଚର୍ଚ୍ଚା ହେଉଛି। ନିର୍ଦ୍ଦେଶ ଉଲ୍ଲଂଘନ କରି ବ୍ୟବସାୟ ମେଲିଥିବା ବ୍ୟବସାୟୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ବଞ୍ଚତ୍ତ ଦୋକାନୀମାନେ ଦାବି କରିଛନ୍ତି। ଭୁବନେଶ୍ୱର ମୁଖ୍ୟ ବ୍ୟବସାୟିକ ଅଞ୍ଚଳ କୁହାଯାଉଥିବା ଜନପଥ, ବାପୁଜୀନଗର, ଜୟଦେବ ବିହାରରୁ ନନ୍ଦନକାନନ ରାସ୍ତା ପାର୍ଶ୍ୱ, ରାଜମହଲରୁ ଏଜି ଛକ, ସିଆର୍ପି ଛକ ନିକଟ ବିଲ୍ଡିଂଗୁଡ଼ିକରେ ଏକାଧିକ ଦୋକାନ ଘର ଖୋଲା ରହୁଛି। ଏପରି କି ଜନପଥ କଡ଼ରେ ଥିବା ସିଙ୍ଗଲ୍ ବ୍ରାଣ୍ଡ୍ ମଲ୍, ଗହଣା ଦୋକାନଗୁଡ଼ିକ ମଧ୍ୟ ଖୋଲା ରହୁଥିବା ନଜରକୁ ଆସିଛି।
ଏ ସମ୍ପର୍କରେ ବିଏମ୍ସି ଦକ୍ଷିଣ ପୂର୍ବ ଜୋନ୍ର ଜୋନାଲ ଡେପୁଟି କମିଶନର ଅଂଶୁମାନ ରଥ କହିଛନ୍ତି, କେଉଁଠି କେଉଁ ଦୋକାନ ଖୋଲା ରହିବ ତାର ନିଷ୍ପତ୍ତି କମିଶନର ଚୌଧାରୀ ନେଉଛନ୍ତି। ମୁଖ୍ୟତଃ ଭେଣ୍ଡିଂ ଜୋନ୍ଗୁଡ଼ିକୁ ବ୍ୟବସାୟୀମାନେ ଖୋଲିପାରିବେ ବୋଲି ଅନୁମତି ଦିଆଯାଇଛି। କେତେଜଣ ବ୍ୟବସାୟୀ ବିଏମ୍ସିର ନିର୍ଦ୍ଦେଶନାମାକୁ ମାନୁ ନାହାନ୍ତି। ସେମାନଙ୍କଠାରୁ ମୋଟା ଅଙ୍କର ଜରିମାନା ଆଦାୟ କରାଯାଉଛି ଡେପୁଟି କମିଶନର ରଥ କହିଛନ୍ତି। ତେବେ ଏନେଇ ବିଏମ୍ସି କମିଶନରଙ୍କ କୌଣସି ପ୍ରତିକ୍ରିୟା ମିଳିପାରିନି।
ଉଲ୍ଲେଖଯୋଗ୍ୟ, ଦୋକାନ ବନ୍ଦ ଯୋଗୁ ଦୀର୍ଘଦିନ ଧରି ହାତବାନ୍ଧି ବସିଥିବାରୁ ପ୍ରତିଷ୍ଠାନ ଖୋଲି ବ୍ୟବସାୟ କରିବାକୁ ବ୍ୟବସାୟୀମାନେ ବ୍ୟାକୁଳ ହେବା ସ୍ବାଭାବିକ୍। କିନ୍ତୁ ନିର୍ଦ୍ଦେଶ ପ୍ରୟୋଗରେ ଭେଦଭାବ କରାଯିବାରୁ ଓ ବିଏମ୍ସି ଅଧିକାରୀଙ୍କୁ ସନ୍ତୁଷ୍ଟ କରିପାରି ନ ଥିବା କ୍ଷୁଦ୍ର ଓ ମଧ୍ୟମ ବ୍ୟବସାୟୀ ଦୋକାନ ଖୋଲିପାରୁ ନାହାନ୍ତି। ଏଥିନେଇ ସେମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଥିବାବେଳେ ବିଏମ୍ସି ନିର୍ଦ୍ଦେଶନାମା ସମସ୍ତଙ୍କ ପାଇଁ ସମାନ ହେବା ଆବଶ୍ୟକ ବୋଲି ଦାବି କରିଛନ୍ତି। ସାମଜିକ ଦୂରତ୍ୱ ନିୟମକୁ ପାଳନ କରି ନିୟନ୍ତ୍ରଣରେ ବ୍ୟବସାୟ ହେଲେ ସଂକ୍ରମଣରୁ ରକ୍ଷା ମିଳିବା ସହ ସହରର ଅର୍ଥନୀତି ଗାଡ଼ି ମଧ୍ୟ ଗଡ଼ିବା ଆରମ୍ଭ କରିବ ବୋଲି ବୁଦ୍ଧିଜୀବୀମାନେ ମତବ୍ୟକ୍ତ କରିଛନ୍ତି।
