ସୋନପୁର,୨୪-୫(ନି.ପ୍ର.):ସୁବର୍ଣ୍ଣପୁର ଜିଲା ବିଜେଡିର ଦୁର୍ଗ ବୋଲି ପୁଣି ଥରେ ସାବ୍ୟସ୍ତ ହୋଇଛି। ସାଧାରଣ ନିର୍ବାଚନରେ ଦଳ କମାଲ କରିଛି। ମୋଦି ହାୱା ଏଠାରେ ଭାଜପାକୁ ବିଜୟୀ କରି ପାରିନି। ଜଳସମ୍ପଦ ଓ ନଗର ଉନ୍ନୟନ ମନ୍ତ୍ରୀ ନିରଞ୍ଜନ ପୂଜାରୀ ସୋନପୁରରୁ ଓ ପ୍ରାକ୍ତନ ମନ୍ତ୍ରୀ ପଦ୍ମନାଭ ବେହେରା ବୀରମହାରାଜପୁର ବିଧାନସଭା ଆସନରୁ ହ୍ୟାଟ୍ରିକ୍ ବିଜୟ ଲାଭ କରିଛନ୍ତି। ନିରଞ୍ଜନ ୨୫ହଜାର ୭୨୬ଖଣ୍ଡ ଭୋଟ ବ୍ୟବଧାନରେ ଭାଜପାର ଅଶୋକ କୁମାର ପୂଜାରୀଙ୍କୁ ଓ ପଦ୍ମନାଭ ୧୩ ହଜାର ୭୧ ଖଣ୍ଡ ଭୋଟ ବ୍ୟବଧାନରେ ଭାଜପାର ଇଂ ରଘୁଦାଥ ଜଗଦଲାଙ୍କୁ ପରାସ୍ତ କରିଛନ୍ତି। ନିର୍ବାଚନ ଫଳାଫଳ ଅନୁଯାୟୀ ବିଜୁ ଜନତା ଦଳର ନିରଞ୍ଜନ ପୂଜାରୀ ୯୯, ୦୭୩ ଖଣ୍ଡ ଭୋଟ ପାଇଥିବା ବେଳେ ଭାଜପା ପ୍ରାର୍ଥୀ ଅଶୋକ ପୂଜାରୀ ୭୩, ୩୪୭ ଖଣ୍ଡ, ଭାରତୀୟ ଜାତୀୟ କଂଗ୍ରେସର ଚିତ୍ତରଞ୍ଜନ ମିଶ୍ର ୨୩, ୩୨୬ ଖଣ୍ଡ ଭୋଟ ପାଇଛନ୍ତି। ସେହିପରି ବୀରମହାରାଜପୁରରେ ବିଜେଡି ପ୍ରାର୍ଥୀ ପଦ୍ମନାଭ ବେହେରା ୬୫,୧୯୧ ଖଣ୍ଡ ଭୋଟ ପାଇଥିବା ବେଳେ ଭାଜପାର ରଘୁନାଥ ଜଗଦଲା ୫୨,୧୨୦ ଓ ଜାତୀୟ କଂଗ୍ରେସ ପ୍ରାର୍ଥୀ ବିନୋଦ କୁମାର ପାତ୍ର ୪୦, ୭୩୦ ଖଣ୍ଡ ଭୋଟ ପାଇଛନ୍ତି। ଶାନ୍ତିଶୃଙ୍ଖଳାର ସହିତ ଗୁରୁବାର ସୋନପୁରରେ ୪୬ଟି ପର୍ଯ୍ୟାୟରେ ନିର୍ବାଚନ ମଣ୍ଡଳୀର ୩୧୯ଟି ବୁଥ୍ର ଓ ବୀରମହାରାଜପୁରରେ ୩୯ଟି ପର୍ଯ୍ୟାୟରେ ୨୬୭ଟି ବୁଥ୍ର ଭୋଟ ଗ୍ରହଣ କରାଯାଇଥିଲା ।
