ମୁମ୍ବାଇ,୧୧।୪(ପି.ଟି.): ଭାରତୀୟ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ଅବସର ନେବାକୁ ବାଧ୍ୟ କରାଯିବା ଉଚିତ୍ ନୁହଁ। ଏକଥା କହିଛନ୍ତି ପୂର୍ବତନ ଇଂଲଣ୍ଡ ଅଧିନାୟକ ନାସିର ହୁସେନ। ଧୋନୀଙ୍କ ଭଳି ଖେଳାଳି ଗୋଟିଏ ପିଢିରେ ଥରେ ଆସିଥାନ୍ତି। ଆଉଥରେ ଧୋନୀଙ୍କ ଭଳି ଜଣେ ଖେଳାଳି ଆସିବେ ନାହିଁ। ତେଣୁ ଅବସର ନେଇ ତାଙ୍କୁ ବାଧ୍ୟ କରିବା ପୂର୍ବରୁ ଚିନ୍ତା କରିବାର ଆବଶ୍ୟକତା ରହିଛି ବୋଲି ସେ ସ୍ପଷ୍ଟ କରିଛନ୍ତି। ଭାରତୀୟ କ୍ରିକେଟ ପାଇଁ ସେ ଆହୁରି କିଛି ଅବଦାନ ଦେଇପାରିବେ। ୩୯ ବର୍ଷୀୟ ଧୋନୀଙ୍କ ନିକଟରେ ଏବେ ବି କ୍ରିକେଟ ବାକି ଅଛି ବୋଲି ସେ କହିଛନ୍ତି।
ଥରେ ଧୋନୀ ଚାଲିଗଲେ, ଆଉ ଆସିବେ ନାହିଁ। ଅବସର ନେଇ କେବଳ ଧୋନୀଙ୍କୁ ନିଷ୍ପତ୍ତି ନେବାର ସ୍ବାଧିନତା ଦେବା ଆବଶ୍ୟକ। ଅବସର କେବେ ନେବାକୁ ହେବ ତାହା ଧୋନୀ ହିଁ ଜାଣିଛନ୍ତି ବୋଲି ୫୨ ବର୍ଷୀୟ ହୁସେନ କହିଛନ୍ତି। ଗତ ଜୁଲାଇରେ ଦିନିକିଆ ବିଶ୍ୱକପ୍ରେ ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲରେ ଧୋନୀ ଶେଷଥର ଭାରତ ପାଇଁ ଖେଳିଥିଲେ। ଏହାପରଠାରୁ ସେ କୌଣସି ପ୍ରତିଯୋଗିତାମୂଳକ କ୍ରିକେଟ ମ୍ୟାଚ୍ ଖେଳିନାହାନ୍ତି। ତେବେ ଧୋନୀ ଭାରତୀୟ ଦଳକୁ ପ୍ରତ୍ୟାବର୍ତ୍ତନ କରିବା ଏବେ କଷ୍ଟକର ବୋଲି ପୂର୍ବତନ କ୍ରିକେଟର ସୁନୀଲ ଗାଭାସ୍କର ଓ କପିଳ ଦେବ ପୂର୍ବରୁ କହିସାରିଛନ୍ତି।
ତେବେ ଧୋନୀ ଏବେବି ଭାରତୀୟ ଦଳ ପାଇଁ ଖେଳିବାର କ୍ଷମତା ରଖୁଛନ୍ତି। ଭାରତ ପାଇଁ ସେ ଆହୁରି ବହୁ ପରିମାଣରେ କ୍ରିକେଟ ଖେଳିପାରିବେ। ତେବେ ଗତ ବିଶ୍ୱକପ୍ରେ ଧୋନୀ ଏକାଧିକ ତ୍ରୁଟି କରିଥିବା କଥା ହୁସେନ କହିଛନ୍ତି। ଏହା ସତ୍ତ୍ୱେ ଧୋନୀଙ୍କ ନିକଟରେ ଏବେବି ପ୍ରତିଭା ରହିଛି। ତେଣୁ ଅବସର ନେଇ ନିଷ୍ପତ୍ତି ତାଙ୍କ ଉପରେ ଛାଡିବା ଠିକ୍ ହେବ ବୋଲି ହୁସେନ ଶନିବାର ରାତି ୭ଟାରେ ଏକ ସାକ୍ଷତ୍କାର ଦେବା ଅବସରରେ କହିଛନ୍ତି।
