ଚାନ୍ଦବାଲି, ୨୦।୬ (ଡି.ଏନ.ଏ) – ଭଦ୍ରକ ଜିଲା ଧାମରା ମାଛଧରା ବନ୍ଦର ଅଧୀନ ଚନ୍ଦନୀପାଳ ମାଛଧରା କେନ୍ଦ୍ର(ବେସ୍)ରେ ଏକପ୍ରକାର ବିରଳ ପ୍ରଜାତିର ୧୦ଟି ମାଛ ଗୁରୁବାର ମଧ୍ୟାହ୍ନରେ ସମୁଦ୍ରରୁ ଧରାଯାଇଛି। ଏହି ମାଛର ନଁା ତେଲିଆଶିଳା ବୋଲି ଜଣାପଡ଼ିଛି। ସ୍ଥାନୀୟ ମତ୍ସ୍ୟଜୀବୀଙ୍କ ମଧ୍ୟରେ ଏହାର ଡାକନାମ ତେଲିଆ। ଏହାର ବିଜ୍ଞାନ ନାମ ପ୍ରୋଟନବିଅନ ଡାଇକନଥେସିସ୍। ଏହା ସ୍ଥାନୀୟ ସମୁଦ୍ରରେ କମ୍ ପରିମାଣରେ ଧରା ହୋଇଥାନ୍ତି। ଏହାର କିଲୋ ପ୍ରତି ୫ରୁ ୬ ହଜାର ଟଙ୍କାରେ ବିକ୍ରି ହୋଇଥାଏ ବୋଲି ସ୍ଥାନୀୟ ମତ୍ସ୍ୟଜୀବୀ କହିଛନ୍ତି। ଏହି ମାଛରେ ଓମେଗା ଥ୍ରୀର ପରିମାଣ ଅଧିକ ଥାଏ। ଏହାକୁ ତରକାରି କରି ଖାଇବା ବଦଳରେ ଏଥିରୁ କେତେକ ଔଷଧ ପ୍ରସ୍ତୁତ ହୋଇଥାଏ। ଏହି ମାଛକୁ ଖଣ୍ଡ ଖଣ୍ଡ କରି ଟାଣ ଖରା ବଦଳରେ ହାଲ୍କା ଖରାରେ ଶୁଖାଇ ଏହାର ଚର୍ବି ଅଂଶକୁ ସଂରକ୍ଷିତ କରାଯାଇଥାଏ। ସ୍ଥାନୀୟ ଓ ରାଜ୍ୟ ବଜାର ଅପେକ୍ଷା ହାଓ୍ବଡ଼ା, ଦୀଘା, ସିଲିଗୁଡି, ଆସାମ ବଜାରକୁ ଏହି ମାଛ ପଠାଇ ମତ୍ସ୍ୟଜୀବୀମାନେ ଲାଭବାନ ହୋଇଥାନ୍ତି। ଗୁରୁବାର ଏପରି ୧୦ଟି ମାଛ ଧରା ହୋଇଥିବା ବେଳେ ଗୋଟିକର ଓଜନ ୨୫ କିଲୋରୁ ବେଶୀ ହେବ। ଏହାର ଦାମ୍ ଦେଢ଼ ଲକ୍ଷ ଟଙ୍କାରୁ ଊର୍ଦ୍ଧ୍ୱ ବୋଲି ଜଣାଯାଇଛି। ଗଭୀର ସମୁଦ୍ରକୁ ଟ୍ରଲର ଓ ଗିଲ୍ନେଟ ଭଳି ଯନ୍ତ୍ରଚାଳିତ ଡଙ୍ଗା ନେଇ ଯାଉଥିବା ମତ୍ସ୍ୟଜୀବୀମାନେ କେବେ କେବେ ଏହି ମାଛକୁ ଜାଲରେ ଧରିଥାନ୍ତି। ସରକାରୀ କଟକଣା ଯୋଗୁ ଦୀର୍ଘଦିନ ଧରି ଧାମରାରେ ମାଛଧରା ବନ୍ଦ ଥିବାବେଳେ ଏଭଳି ଦାମିକା ମାଛ ଧରା ହେବାକୁ ନେଇ ମତ୍ସ୍ୟଜୀବୀମାନେ ମଧ୍ୟ ଉତ୍ସାହିତ ହୋଇଛନ୍ତି। ତେବେ ଏହି ମାଛକୁ ଦେଖିବାକୁ ଚନ୍ଦନୀପାଳ ମାଛଧରା ବେସ୍ରେ ଭିଡ଼ ଜମିଥିଲା।
