ଭୁବନେଶ୍ୱର,୧୧।୨ (ବ୍ୟୁରୋ):
ବିଦ୍ୟୁତ ବିଭାଗ ଅଧିକାରୀମାନଙ୍କ ଖାମଖିଆଲ ମନୋଭାବ ଯୋଗୁ ଅନେକ ସମୟରେ ଦୁର୍ଘଟଣା ଘଟୁଛି। ଉଜୁଡି ଯାଉଛି ଅନେକଙ୍କ ଘର ପରିବାର। ଘଟଣା ଘଟିବାର ଦିନେ ଦୁଇଦିନ ବିଭାଗୀୟ ତତ୍ପରତା ଦେଖିବାକୁ ମିଳୁଛି। ତା’ପରେ ସବୁକିଛି ପୂର୍ବଭଳି ଶିଥିଳ ହୋଇଯାଉଛି। ଉଚ୍ଚ ପଦାଧିକାରୀଙ୍କଠାରୁ ଆରମ୍ଭ କରି ଭିତ୍ତିଭୂମି କାର୍ଯ୍ୟରେ ନିୟୋଜିତ କାର୍ଯ୍ୟ ନିର୍ବାହୀ ଯନ୍ତ୍ରୀ, କନିଷ୍ଠଯନ୍ତ୍ରୀ, ଠିକାଦାର ପର୍ଯ୍ୟନ୍ତ ସମସ୍ତେ ଏକ ହୋଇଯାଉଛନ୍ତି। ଦୀର୍ଘ ବର୍ଷ ଧରି ଭଙ୍ଗାଦଦରା ଖୁଣ୍ଟ କିମ୍ବା ତାରକୁ ବଦଳା ଯାଉନାହିଁ, ଯାହାର ପରିଣତି ଅତ୍ୟନ୍ତ ଭୟଙ୍କର ହେଉଛି। କେବଳ ଯେ ମଣିଷ ମରୁଛନ୍ତି ତାହା ନୁହେଁ, ଅନେକ ସମୟରେ ହାତୀଭଳି ଜୀବ ମଧ୍ୟ ବିଦ୍ୟୁତ ବିଭାଗର ଦାୟିତ୍ୱହୀନତା ଯୋଗୁ ଶିକାର ହେଉଛନ୍ତି। ରବିବାର ଗଞ୍ଜାମ ଜିଲାରେ ଘଟିଥିବା ହୃଦୟ ବିଦାରକ ଘଟଣା ସମଗ୍ର ରାଜ୍ୟକୁ ସ୍ତବ୍ଧ କରି ଦେଇଛି। ବିଦ୍ୟୁତ ତାର ସଂସ୍ପର୍ଶରେ ଆସି ୧୦ଟି ଜୀବନ ଯାଇଛି। ଏହି ଘଟଣା ପାଇଁ ଦାୟିତ୍ୱରେ ଅବହେଳା କରିଥିବା ୪ଜଣ ଯନ୍ତ୍ରୀଙ୍କୁ ସୋମବାର ସରକାର ଚାକିରିରୁ ନିଲମ୍ବିତ କରିଛନ୍ତି। ନିଲମ୍ବିତ ହୋଇଥିବା ଯନ୍ତ୍ରୀମାନେ ହେଲେ ବ୍ରହ୍ମପୁର ଇଲେକ୍ଟ୍ରିକାଲ ଡିଭିଜନ-୩ର କନିଷ୍ଠ ଯନ୍ତ୍ରୀ ଦେବାଶିଷ ନାୟକ, ସହକାରୀ ଯନ୍ତ୍ରୀ ବିଶ୍ୱରଞ୍ଜନ ମହାପାତ୍ରଙ୍କ ସମେତ ଗଞ୍ଜାମ ଗ୍ରାମ୍ୟ ଉନ୍ନୟନ ଡିଭିଜନର ସହକାରୀ ଯନ୍ତ୍ରୀ ପୂର୍ଣ୍ଣଚନ୍ଦ୍ର ବେହେରା ଏବଂ କନିଷ୍ଠ ଯନ୍ତ୍ରୀ ସ୍ବରାଜ କୁମାର ପାଣିଗ୍ରାହୀ। ଏହି ଘଟଣା ପରେ ଶକ୍ତିମନ୍ତ୍ରୀ ଦିବ୍ୟ ଶଙ୍କର ମିଶ୍ର ଲୋକସେବା ଭବନଠାରେ ଏକ ଉଚ୍ଚସ୍ତରୀୟ ବୈଠକ ଡାକି ଅବହେଳାର ସମୀକ୍ଷା କରିଛନ୍ତି। ବୈଠକ ପରେ ଗଣମାଧ୍ୟମକୁ ସୂଚନା ଦେଇ ମନ୍ତ୍ରୀ କହିଛନ୍ତି ଯେ ଦାୟିତ୍ୱରେ ଅବହେଳା କରିଥିବାରୁ ୪ଜଣ ଯନ୍ତ୍ରୀଙ୍କୁ ନିଲମ୍ବିତ କରାଯାଇଛି। ଏଣିକି ୧୧ କେ.ଭି. ବିଦ୍ୟୁତ ତାରଗୁଡିକ ଭୂମିପତ୍ତନରୁ ସର୍ବନିମ୍ନ ୨୦ ଫୁଟ ଉଚ୍ଚତାରେ ରହିବ। ରାଜ୍ୟର ସମସ୍ତ ୧୧ କେ.ଭି. ତାରଗୁଡ଼ିକୁ ଷ୍ଟାଣ୍ଡାର୍ଡ ଉଚ୍ଚତା କରିବାକୁ ବିଦ୍ୟୁତ ସର୍କଲଗୁଡିକର ଅଧୀକ୍ଷଣଯନ୍ତ୍ରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ଯେଉଁ ଜାଗାରେ କମ୍ ଉଚ୍ଚତାରେ ତାର ଝୁଲୁଛି ସେଠାରେ କନିଷ୍ଠଯନ୍ତ୍ରୀମାନେ ଉପରିସ୍ଥ ଅଧିକାରୀଙ୍କୁ ତୁରନ୍ତ ସୂଚନା ଦେବେ। ସୂଚନା ପାଇବା ପରେ ତୁରନ୍ତ ପଦକ୍ଷେପ ନିଆଯିବ ବୋଲି ମନ୍ତ୍ରୀ କହିଛନ୍ତି।
ଏହି ବୈଠକରେ ଶକ୍ତି ବିଭାଗ ପ୍ରମୁଖ ଶାସନ ସଚିବ, ଅନ୍ୟ ଅଧିକାରୀଙ୍କ ସମେତ ଗ୍ରାମ୍ୟ ଉନ୍ନୟନ ଏବଂ ପରିବହନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
