ଦିଗପହଣ୍ଡି,(ଡିଏନ୍ଏ)/ପାଟପୁର,୨୯।୧: ଗଞ୍ଜାମ-ଗଜପତି ସୀମାନ୍ତ ତପ୍ତପାଣି ଘାଟିରେ ମାରୁତି ଶ୍ରୀ ସାଇ ନାମକ ଯାତ୍ରୀବାହୀ ବସ୍ (ଓଆର୍ ୦୫- ଏ ବି ୩୫୩୦) ଓଲଟି ପଡିବାରୁ ଘଟଣାସ୍ଥଳରେ ୬ଜଣ ଯାତ୍ରୀଙ୍କ ମୃତ୍ୟୁ ଘଟିଛି। ସେମାନେ ହେଲେ ରାୟଗଡ଼ା ଜେ.କେ.ପୁରର ବିଦ୍ୟୁତ୍ ନାୟକ( ୪୦), ରେଙ୍ଗାଲି ଛକ ପୁଟ ବଗଡ ଗାଁର ଝୁନୁ ବେହେରା, କବିସୂର୍ଯ୍ୟ ନଗର ବାଲ୍ୟାସରା ଗାଁର କରିସ୍ମା ନାୟକ(୨୫), କରପଡ଼ା ଗାଁର ସୁବାସିନୀ ମହାରଣା(୫୦), ପୁରୁଷୋତ୍ତମପୁର କୁସାଳାପଲ୍ଲୀ ଗାଁର ରମେଶ ବେହେରା(୪୨)। ଅନ୍ୟ ଜଣେ ମୃତା ମହିଳାଙ୍କ ପରିଚୟ ମିଳିପାରି ନାହିଁ। ଖବର ପାଇ ଦିଗପହଣ୍ଡି ଥାନା ଆଇଆଇସି ବସନ୍ତ କୁମାର ସେଠୀ, ମୋହନା ଥାନା ଆଇଆଇସି ସୁଜିତ କୁମାର ନାୟକ ସଦଳବଳ ଘଟଣାସ୍ଥଳରେ ପହଞ୍ଚିଥିଲେ। ୫ ଆମ୍ବୁଲାନ୍ସ ସମେତ ମୋହନା, ଦିଗପହଣ୍ଡି ଓ ସାନଖେମୁଣ୍ଡି ଅଗ୍ନିଶମ ବାହିନୀ ଘଟଣାସ୍ଥଳକୁ ଆସି ଆହତ ଯାତ୍ରୀମାନଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଆହତଙ୍କୁ ଡାକ୍ତରଖାନାରେ ଭେଟିଛନ୍ତି। ପ୍ରାଥମିକ ଚିକିତ୍ସା ପରେ ୩୫ରୁ ଊଦ୍ଧର୍ବ ଆହତ ଯାତ୍ରୀଙ୍କୁ ବ୍ରହ୍ମପୁର ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଗଞ୍ଜାମ ଏସ୍ପି ବ୍ରିଜେଶ ରାୟ, ଆସିକା ଏସ୍ଡିପିଓ ସୂର୍ଯ୍ୟମଣି ପ୍ରଧାନ ପ୍ରମୁଖ ଘଟଣାସ୍ଥଳରେ ପହଞ୍ଚି ସବିଶେଷ ଅନୁଧ୍ୟାନ କରି ଫେରିଛନ୍ତି। ଦିଗପହଣ୍ଡି ବିଡ଼ିଓ ହଳଧର ଶବର, ଅତିରିକ୍ତ ତହସିଲଦାର ପ୍ରଭାତୀ ମହାରଣା, ସାନଖେମୁଣ୍ଡି ତହସିଲଦାର ଅମିତ୍ କୁମାର ନାୟକ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ଆହତମାନଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଇବାରେ ସହାୟତା କରିଥିଲେ।
ବୁଧବାର ଭୋର ପ୍ରାୟ ସାଢ଼େ ୩ଟାରେ ଦୁର୍ଘଟଣା ଘଟିଛି। ରାୟଗଡ଼ା ନିକଟ ଟିକିରି ଗାଁରୁ ବ୍ରହ୍ମପୁର ଭାୟା ଦିଗପହଣ୍ଡି ଦେଇ ଆସୁଥିବା ବସଟି ଭୋର ପ୍ରାୟ ୩ଟା ୧୫ରେ ଗଜପତି ଜିଲା ଲୁହାଗୁଡି ଛକରେ ପହଞ୍ଚିଥିଲା। ସେଠାରେ ବସ ରହିବା ପରେ ଡ୍ରାଇଭର, ବସ୍ କର୍ମଚାରୀଙ୍କ ସମେତ ବହୁ ସଂଖ୍ୟକ ଯାତ୍ରୀ ଢାବାରେ ଚା ପିଇଥିଲେ। ଡ୍ରାଇଭର ତାଙ୍କ ଗାଡ଼ିର ବ୍ରେକ୍ଫେଲ ସମ୍ପର୍କରେ କ୍ଲିନରଙ୍କୁ ସୂଚନା ଦେଇଥିଲେ। ଧୀରେ ଧୀରେ ଗାଡ଼ି ଚଳାଇ ଦିଗପହଣ୍ଡି ଯାଇ ସେଠାରେ ଗାଡ଼ି ମରାମତି ପାଇଁ ନିଷ୍ପତ୍ତି ନେଇ ଗାଡ଼ି ନେଇଥିଲେ। ତପ୍ତପାଣି ଘାଟି ପାଳୁଖଳା ନିକଟରେ ଘନ କୁହୁଡ଼ି ଯୋଗୁ ଡ୍ରାଇଭରଙ୍କୁ ରାସ୍ତା ନ ଦିଶିବାରୁ ବସ୍ଟି ରାସ୍ତାକଡ଼ ଘାଟି ତଳକୁ ଓଲଟି ପଡିଥିଲା।
