ନୂଆପଡା ଅଫିସ,୧୭ା୫: ନୂଆପଡ଼ା ଜିଲାର ସବୁଠାରୁ ଦୁର୍ଗମ ସୁନାବେଡା ଅଭୟାରଣ୍ୟରେ ସ୍ବାସ୍ଥ୍ୟ ସେବା ଦୁର୍ଲଭ । ଲୋକେ ଆଜି ବି ସ୍ବାସ୍ଥ୍ୟ ଭଳି ମୌଳିକ ସେବାରୁ ବଞ୍ଚତ୍ତ ରହୁଛନ୍ତି । ସରକାରୀ ଚିକିତ୍ସା ବ୍ୟବସ୍ଥାରୁ ଆସ୍ଥା ହରାଇ ଜଡିବୁଟି ଭଳି ଘରୋଇ ଚିକିତ୍ସାକୁ ଆପଣାଉଛନ୍ତି । ହେଲେ ଏସବୁକୁ ଦୃଷ୍ଟିରେ ରଖି ଜିଲାପାଳ ଅଭିନବ ପ୍ରୟାସ ଆରମ୍ଭ କରିଛନ୍ତି । ଏଣି କି ସ୍ବାସ୍ଥ୍ୟ ବିଭାଗ କର୍ମଚାରୀମାନେ ଅଭୟାରଣ୍ୟ ଭିତରକୁ ଯାଇ ଲୋକଙ୍କ ଦ୍ୱାର ମୁହଁରେ ସେବା ଦେବା ଆରମ୍ଭ କରିଛନ୍ତି । ସମ୍ପୂର୍ଣ୍ଣା ଭଳି ଯୋଜନାରେ ଗାଁଗୁଡିକୁ ସାମିଲ କରାଯାଇ ସଫଳ ଚିକିତ୍ସାକୁ ସୁନିଶ୍ଚିତ କରାଯାଉଛି । ଏହି କ୍ରମରେ ଏକ ସ୍ବାସ୍ଥ୍ୟ ବିଭାଗର ଟିମ ସୁନାବେଡା ଅଭୟାରଣ୍ୟସ୍ଥିତ ୪ଟି ଗାଁ ପରିଦର୍ଶନ କରି ସେବା ପ୍ରଦାନ କରି ଫେରିଛନ୍ତି । ନୂଆପଡା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ତରଫରୁ ଇନଚାର୍ଜ ବୀରେନ୍ଦ୍ର କୁମାର ବାଗଙ୍କ ନିର୍ଦ୍ଦେଶକ୍ରମେ ବ୍ଲକ ପ୍ରୋଗ୍ରାମ ମ୍ୟାନେଜର ସେଖ ୱାସିମ ରାଜା ଏବଂ ପବ୍ଲିକ ହେଲଥ ଅଫିସର ଚାନ୍ଦିନୀ କିଷାନଙ୍କ ନେତୃତ୍ୱରେ ଏକ ଟିମ ଅଭୟାରଣ୍ୟସ୍ଥିତ ସୋସେଙ୍ଗ ଗ୍ରାମପଞ୍ଚାୟତକୁ ଯାଇଥିଲେ । ସେଠିକାର ପ୍ରଥମେ ଭାଓସିଲ, ଝର୍ଲାମ, ଶିବନାରାୟଣପୁର, ରାଜକେନ୍ଦୁପଡାରେ ପହଞ୍ଚତ୍ଥିଲେ । ଗୋଟିଏପଟେ ଗ୍ରୀଷ୍ମର ଟାଣ ଖରା ଏବଂ ଅନ୍ୟପଟେ ମାଓବାଦୀଙ୍କ ଗଡକୁ ଭେଦ କରି ହସ୍ପିଟାଲ ଟିମ ଚିକିତ୍ସା ସେବା ଆରମ୍ଭ କରିଥିଲେ। ସକାଳୁ ସନ୍ଧ୍ୟା ଯାଏଁ ଘରକୁ ଘର ବୁଲିଥିଲେ। ସୂଚନାଯୋଗ୍ୟ ଯେ, ସରକାର ଶିଶୁ ଓ ମାତୃ ମୃତ୍ୟୁହାର କମାଇବାକୁ ବର୍ତ୍ତମାନ ସମ୍ପୂର୍ଣ୍ଣା (ଶିଶୁ ଏବଂ ମାତୃ ମୃତ୍ୟୁହାର ପୂର୍ଣ୍ଣ ନିରାକରଣ ଅଭିଯାନ) କାର୍ଯ୍ୟକାରୀ କରିଛନ୍ତି । ଏଥିରେ ବିଶେଷ କରି ଦୁର୍ଗମ ଇଲାକାରେ ଯେଉଁଠି ୧୦୮ କିମ୍ବା ୧୦୨ଆମ୍ବୁଲାନ୍ସ ଯିବା କଷ୍ଟକର ହୋଇଥାଏ । ସେଠାରେ ଏହି ଯୋଜନାକୁ ପ୍ରାଧାନ୍ୟ ଦିଆଯାଇଛି। ତେବେ ଏହି ସ୍ବାସ୍ଥ୍ୟ ଟିମ ସମ୍ପୂର୍ଣ୍ଣା ଯୋଜନାକୁ ନିଶ୍ଚିତ କରିବା ସହ ଘରେ ସବୁ ପ୍ରକାର ସ୍ବାସ୍ଥ୍ୟ ସେବା ପ୍ରଦାନ କରିବାକୁ ଜିଲାପାଳଙ୍କ ନିର୍ଦ୍ଦେଶକ୍ରମେ ମୋବାଇଲ ହେଲ୍ଥ ଟିମ ମଧ୍ୟ ଗସ୍ତ କରିଥିଲା । ଏଥିରେ ଡାକ୍ତର, ନର୍ସଙ୍କ ସହ ଏକ ପୁରା ଟିମ ଔଷଧ ଧରି ଯାଇଥିଲେ। ପ୍ରତିଦ୍ୱାରକୁ ଯାଇ ପରିବାରର ସମସ୍ତ ସଦସ୍ୟଙ୍କୁ ଯାଞ୍ଚ କରି ଆବଶ୍ୟକ ଔଷଧ ପ୍ରଦାନ କରିଥିଲେ। ଏହି ଗାଁଗୁଡିକରେ ୧୨/୧୩ଜଣ ନବଜାତ ଶିଶୁ ଏବଂ ୨୫ଜଣ ଗର୍ଭବତୀ ଏବଂ ପ୍ରସୂତି ମା’ଙ୍କୁ ଚିହ୍ନଟ କରି ଚିକିତ୍ସା କରାଯାଇଥିଲା । ଏହି ଡାକ୍ତର ଟିମକୁ ଦେଖି ଗ୍ରାମବାସୀ ଖୁସି ପ୍ରକଟ କରିଥିଲେ। ଦିନଥିଲା ଏଠାରେ ସାଧାରଣ ଝାଡାବାନ୍ତି ଭଳି ରୋଗରେ ଲୋକେ ମୃତ୍ୟୁବରଣ କରୁଥିଲେ। ଏମାନଙ୍କୁ ଚିକିତ୍ସା ସେବା ଉପଲବ୍ଧ ହେବା ସ୍ବପ୍ନ ଥିଲା । ତେବେ ଏଭଳି ସେବାକୁ ନିୟମିତ କରିବାକୁ ଗ୍ରାମବାସୀ ଦାବି କରିଥିଲେ। ଟିମରେ ଅନ୍ୟମାନଙ୍କ ମଧ୍ୟରେ ଏଲଏଚବି ପୁଷ୍ପଲତା ନାଥ, କିର୍ତ୍ତିକା ଚନ୍ଦ୍ରିକା ପ୍ରମୁଖ ସାମିଲ ଥିଲେ। ଏହିଭଳି ପ୍ରତି ମାସର ତୃତୀୟ ଗୁରୁବାର ଅଭୟାରଣ୍ୟ ଗସ୍ତ କରିବାର କାର୍ଯ୍ୟସୂଚୀ ରହିଥିବା ଟିମ ମୁଖ୍ୟ ସେଖ ୱାସିମ ସୂଚନା ଦେଇଛନ୍ତି ।
