ଉମରକୋଟ, ୧୨।୯(ଡି.ଏନ୍.ଏ.)- ଉମରକୋଟ ବ୍ଲକ କାରଗା ନିକଟରେ ବୁଧବାର ରାତିରେ ଦୁଇଟି ବାଇକ୍ ମୁହାଁମୁହିଁ ଧକ୍କା ହେବାରୁ ଜଣଙ୍କର ମୃତ୍ୟୁ ହୋଇଛି ଓ ଅନ୍ୟଜଣେ ଏଥିରେ ଗୁରୁତର ଅଛନ୍ତି। ମୃତକ ହେଲେ ଫୁକାଗୁଡ଼ା ଗ୍ରାମର କୈଳାସ ମାଝି। ସେହିଭଳି ଗୁରୁତର ସିଂସାରୀ ଗ୍ରାମର ରଣବିଜୟ ଶର୍ମାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ପ୍ରକାଶ ଯେ, ଫୁକାଗୁଡ଼ ଗାଁର ଏକ ଛୋଟ ଛୁଆର ନାକରୁ ରକ୍ତ ପଡିବାରୁ କୈଳାସ ଓ ଅନ୍ୟଜଣେ ଉକ୍ତ ଶିଶୁକୁ ବାଇକ୍ ଯୋଗେ ଉମରକୋଟ ଡାକ୍ତରଖାନାକୁ ନେଉଥିଲେ। କାରଗା ନିକଟ ପୋଲ ପାଖରେ ବିପରୀତ ଦିଗରୁ ଆସୁଥିବା ରଣବିଜୟଙ୍କ ବାଇକ୍ ସହ କୈଳାସଙ୍କ ଗାଡି ଧକ୍କା ହୋଇଥିଲା। ଘଟଣାସ୍ଥଳରେ କୈଳାସ ପ୍ରାଣ ହରାଇଥିଲେ। ଏହାପରେ ରଣବିଜୟଙ୍କୁ ସ୍ଥାନୀୟ ଜିଲା ପରିଷଦ ରବି ଧଳଙ୍କ ସହାୟତାରେ ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସ୍ବାସ୍ଥ୍ୟାବସ୍ଥା ଗୁରୁତର ଥିବାରୁ ତାଙ୍କୁ ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରୁ ରଣବିଜୟଙ୍କୁ କୋରାପୁଟ ଶହୀଦ ଲକ୍ଷ୍ମଣ ନାୟକ ମେଡିକାଲ୍ କଲେଜକୁ ପଠାଯାଇଛି। ସୀଙ୍ଗସାରି ଥାନାଧିକାରୀ ଘଟଣାସ୍ଥଳରେ ପହଞ୍ଚତ୍ ବାଇକ୍ ଦୁଇଟିକୁ ଜବତ କରି ଅଧିକ ତଦନ୍ତ ଚଳାଇଛନ୍ତି।
