ବାରିପଦା ଅଫିସ,୧୯ା୯- ନୂତନ ମୋଟର ଯାନ ଆଇନ ଆସିବା ପରେ ଏହାକୁ କାର୍ଯ୍ୟକାରୀ କରିବା ପାଇଁ କିଛି ଦିନ ହେବ ପୋଲିସ କର୍ମଚାରୀ ଓ ଅଧିକାରୀମାନେ ବହୁତ ତତ୍ପରତା ଦେଖାଉଛନ୍ତି। ଏଥିପାଇଁ ପୋଲିସ ଓ ଜନସାଧାରଣଙ୍କ ମଧ୍ୟରେ ବିଭିନ୍ନ ସ୍ଥାନରେ ଅପ୍ରୀତିକର ପରିସ୍ଥିତି ସୃଷ୍ଟି ହେଉଛି। ଏଥିଯୋଗୁଁ ପୋଲିସର ଭାବମୂର୍ତ୍ତି ନଷ୍ଟ ହେଉଥିବା ବେଳେ କେତେକ ପୋଲିସ କର୍ମଚାରୀ ସେମାନଙ୍କ ମନୋଭାବ ପରିବର୍ତ୍ତନ କରୁ ନାହାନ୍ତି। ଅନ୍ୟପକ୍ଷେ କିଛି ପୋଲିସ କର୍ମଚାରୀ ଜନସାଧାରଣଙ୍କୁ ସେବା ଯୋଗାଇ ଦେଇ ପ୍ରଶଂସିତ ମଧ୍ୟ ହେଉଛନ୍ତି। ବାରିପଦା ସହରର ବ୍ୟସ୍ତବହୁଳ ତକତପୁର ଛକ ତଥା ଜାତୀୟ ରାଜପଥ ନଂ. ୧୮ରେ ଜଣେ ଦିବ୍ୟାଙ୍ଗ ବୃଦ୍ଧାଙ୍କୁ ରାସ୍ତା ପାର କରାଇବାରେ ସହଯୋଗ କରି ଚର୍ଚ୍ଚାକୁ ଆସିଛନ୍ତି ଜଣେ ଟ୍ରାଫିକ ପୋଲିସ କର୍ମଚାରୀ। ଏହି କର୍ମଚାରୀଙ୍କ ନାମ ସୁଦୀପ ମହାନ୍ତି। ଏହି ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ ତାଙ୍କ ନିକଟକୁ ପ୍ରଶଂସାର ସୁଅ ଛୁଟିଛି। ଜନବହୁଳ ଏହି ରାସ୍ତାରେ ସବୁବେଳେ ଭରିଯାନ ଚଲାଚଳ କରେ। ରାସ୍ତା ଖରାପ ଥିବାରୁ ଜଣେ ବ୍ୟକ୍ତିଙ୍କୁ ରାସ୍ତା ପାର ହେବା ପାଇଁ ବହୁ ସାବଧାନତା ଅବଲମ୍ବନ କରିବାକୁ ପଡେ। ତେବେ ଟ୍ରାଫିକ କର୍ମଚାରୀ ସୁଦୀପଙ୍କ କହିବା ମୁତାବକ ଦିନ ପ୍ରାୟ ୧୧.୩୦ ବେଳେ ଜଣେ ଦିବ୍ୟାଙ୍ଗ ମହିଳା ବାରମ୍ବାର ରାସ୍ତା ପାର ହେବାକୁ ଉଦ୍ୟମ କରିଥିଲେ। ବହୁ ଚେଷ୍ଟା ସତ୍ତ୍ୱେ ରାସ୍ତା ପାର ହୋଇ ନ ପାରି ଫେରି ଆସୁଥିଲେ। ଏମିତି ଅଧଘଣ୍ଟା ଧରି ବୃଦ୍ଧା ଜଣକ ଉଦ୍ୟମ କରି ବିଫଳ ହୋଇ ରାସ୍ତା କଡରେ ଠିଆ ହୋଇ ରହିଥିଲେ। ଏହି ଘଟଣାକୁ ଦୀର୍ଘ ସମୟ ଅନୁଧ୍ୟାନ କରିବା ପରେ ସୁଦୀପ ତୁରନ୍ତ ତାଙ୍କୁ ରାସ୍ତା ପାର ହେବାରେ ସାହାଯ୍ୟ କରିଥିଲେ। ରାସ୍ତାରେ ଗାଡ଼ି ଅଟକାଇ ତାଙ୍କୁ ରାସ୍ତା ପାର କରାଇଥିଲେ। ଲୋକଙ୍କ ସେବା କରିବା ହିଁ ପୋଲିସ ବିଭାଗର ପ୍ରଥମ କାର୍ଯ୍ୟ ବୋଲି ସୁଦୀପ କହିଛନ୍ତି।
