ରତ୍ନଗିରି, ୩୧।୫ (ଡି.ଏନ୍.ଏ.) -କରୋନା ପାଇଁ ଲକ୍ଡାଉନ୍ ଯୋଗୁ ଦୁଇ ମାସ ଧରି ବସ୍ ଚଳାଚଳ ବନ୍ଦ ରହିଥିଲା। ମାତ୍ର ଜୁନ୍ ୧ରୁ ବସ୍ ଚଳାଚଳ ପାଇଁ ସରକାର ନିଷ୍ପତ୍ତି ନେଇଛନ୍ତି। ହେଲେ ଦାବି ପୂରଣ ନ ହେଲା ଯାଏ ବସ୍ ଚଳାଚଳରେ ସହଯୋଗ କରିବୁ ନାହିଁ ବୋଲି କହିଛି ବରୀ ବସ୍ ଚାଳକ ସଂଘ। ଏ ନେଇ ସଂଘ ପକ୍ଷରୁ ରବିବାର ମୁଖ୍ୟମନ୍ତ୍ରୀ, ପରିବହନ ମନ୍ତ୍ରୀ ଓ ଯାଜପୁର ଜିଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ବରୀ ତହସିଲଦାରଙ୍କୁ ପ୍ରଦାନ କରାଯାଇଛି। ଏହି ପରିପ୍ରେକ୍ଷୀରେ ରବିବାର ବରୀ କୃପାସିନ୍ଧୁ ବିଦ୍ୟାଭବନ ଖେଳ ପଡିଆଠାରେ ବସ୍ ଡ୍ରାଇଭର, କଣ୍ଡକ୍ଟର ଓ ହେଲ୍ପରମାନଙ୍କ ଏକ ବୈଠକ ବସିଥିଲା। ଆଲୋଚନା ଅନୁଯାୟୀ ସଂଘ ପକ୍ଷରୁ ତହସିଲଦାରଙ୍କୁ ଦାବିପତ୍ର ପ୍ରଦାନ କରାଯାଇଛି। ବସ୍ରେ ଯାତ୍ରା କରିବା ସମୟରେ ଡ୍ରାଇଭର, କଣ୍ଡକ୍ଟର ଓ ହେଲପରମାନେ କରୋନା ସଂକ୍ରମିତ ହେବାର ଅଧିକ ଆଶଙ୍କା ରହିଛି। ତେଣୁ ସମସ୍ତ ଡ୍ରାଇଭର, କଣ୍ଡକ୍ଟର ଓ ହେଲପରଙ୍କ ବୀମା କରାଯିବାକୁ ଦାବିପତ୍ରରେ ଉଲ୍ଲେଖ କରାଯାଇଛି ବୋଲି ବସ୍ ଚାଳକ ସଂଘ ସଭାପତି ପ୍ରଣବ କୁମାର ଦାସ, ଉପସଭାପତି ଅମର ଚରଣ ଜେନା, ସମ୍ପାଦକ ରମାକାନ୍ତ ବେହେରା, ସହ ସମ୍ପାଦକ ଅମର ପଣ୍ଡା ଓ ଉପାଧ୍ୟକ୍ଷ ଶୁଭକାନ୍ତ ବାରିକ ଗଣମାଧ୍ୟମକୁ ସୂଚନା ଦେଇଛନ୍ତି।
