ପର୍ଲା, ୬।୨ (ଡି.ଏନ୍.ଏ.)- କଳାହାଣ୍ଡି ଜିଲା ଦଣ୍ଡପାଟ ଅଂଚଲରେ ଦିନୁଦିନ୍କେ ଦାଦନ ସମସିଆ ବଢ଼ତେଲ ଯାଉଛେ। ଦାଦନ ସମସିଆର ସଂଗେ ଯୁଝବାର ଲାଗି ସରକାର ଅନେକ ଯୋଜନା କାଯ୍କାରୀ କରୁଥିଲେ ବି କିଛି କାମ୍ ନାଇଁଦେବାର। ଶ୍ରମିକମାନେ ଟଁକା ଲୋଭ୍ରେ ଦାଦନ ଦଲାଲକଁର ଝଁାସେ ପଡ଼ି ହଇରାନ ହରକତ୍ ହେଉଛନ୍। ଏହେଦେ ଦଣ୍ଡପାଟ ଅଂଚଲର ଭିନେ ଭିନେ ଗଁାର ୧୮ରୁ ଅଧ୍କା ଦାଦନ ଶ୍ରମିକ ତେଲେଙ୍ଗାନାର ପଏଦାପାଲି ଜିଲା କରିମନଗରରେ ବଁଧକ୍ ପଡ଼ିଥିବାର ଜନାଯାଇଛେ। ବଁଧା ପଡ଼ିଥିବାର ଶ୍ରମିକମାନକୁ ଉଧାର କରବାର ଲାଗି ତାକର ପରିବାର ଲୋକ୍ମାନେ ଧର୍ମଗଡ଼ ଉପଜିଲାପାଳକଁରନେ ଫେରାଦ ହେଇଥିବାର ଜନାପଡ଼ିଛେ।
ସୂଚନା ଅନ୍ସାରେ ନୂଆପଡ଼ା ଜିଲାର ଝନେ ଦାଦନ ଦଲାଲ ବିଶ୍ୱମ୍ବର ଧଅରପୁର ଗଁାର ରାଜମୋହନ ପରାଭୋଏ (୨୪), ତାକର ମାଏକିନା ଭବାନୀ (୨୨), ଜଗତା ନନ୍ଦ (୫୫), ତାକର ମାଏକିନା ପ୍ରେମଶିଳା (୫୨), ଗାୟତ୍ରୀ ପରାଭୋଏ (୧୪), ଭଗବାନ ପରାଭୋଏ (୪), ଆମ୍ବପାଣି ଥାନା ଅଧୀନ ଭୁର୍ଷାଗୁଡ଼ାର ଖିଡି ପରାଭୋଏ (୬୦), ତାକର ମାଏକିନା କୁମାରି ପରାଭୋଏ (୫୮), ଫଗଣୁ ପରାଭୋଏ (୩୦), ଦ୍ରୌପଦୀ ପରାଭୋଏ (୨୭), ଉମାକାନ୍ତ ପରାଭୋଏ (୧୨), ଯଶୋଦା ପରାଭୋଏ (୨) ସମେତ ଧର୍ମଗଡ଼ ଥାନା ଅଧୀନ ତେନ୍ତୁଳିଆ ପଡ଼ାର କେତେ ଦାଦନ ଶ୍ରମିକୁଁ ନେଇ ସେଠାନେ ଝନେ ଦାଦନ ସରଦାର ନରେଶ ସେଠ୍ ପାସେ ଛାଡ଼ି ଆସିଥିଲେ। ସେଠାନେ ଇ ଦାଦନ ଶ୍ରମିକମାନକୁ ଦିନକ ୧୨ରୁ ୧୮ ଘଁଟା ତକ୍ ଇଟା ଗଢ଼ା କାମ୍ରେ ଖଟାଯାଉଛେ। ଶ୍ରମିକମାନେ ଇତାର ପରତିବାଦ୍ କଲେ ସେମାନକୁ ଗାଲିଗୁଲଜ, ମାଡ଼ ମାରାଯାଉଥିବାର ଅଭିଯୋଗ ହେଇଛେ। ସେନ୍ତା ମାଲିକ ଶ୍ରମିକମାନକୁ ବଁଧକ କରି ରଖଲା ଲେଖେଁ ରଖିଛେ ବଲି ସେଠାନୁ ଅକଲ କରି ପଲେଇ ଆସିଥିବାର ଶ୍ରମିକ ରାଜମୋହନ କହିଛନ୍। ରାଜମୋହନ ନିଜର ଅଜାଆଈର ସଂଗେ ଗଲା ୩ ତାରିଖ ଧର୍ମଗଡ଼ ଉପଜିଲାପାଳକଁୁ ବାକି ଶ୍ରମିକ ଭାଇମାନକୁ ଉଧାର କରବାକେ ଗୁହାରି କରିଛନ୍। ଇ ବାବ୍ଦେ ସହକାରୀ ଶ୍ରମ ଅଧ୍କାରୀ ଜୟନ୍ତ କୁମାର ପଣ୍ଡାକୁଁ ପଚ୍ରାଲାରୁ ସେ ତେଲେଙ୍ଗାନା ଲିଆସନିଙ୍ଗ ଅଧ୍କାରୀ ଟି.ରମେଶକଁର ସଂଗେ କଥା ହେଇଛେଁ। ସେଠାନର ଲେବର କମିଶନକଁର ସହଯୋଗରେ ଅଟକ ଥିବାର ଦାଦନ ଶ୍ରମିକମାନକୁ ବହୁତ୍ ଜଲ୍ଦି ଉଧାର କରାଯିବା ବଲି ସେ କହିଛନ୍।
