ଛତ୍ରପୁର,୭।୬(ଡି.ଏନ୍.ଏ.): ଗଞ୍ଜାମ ଜ଼ିଲା ଚମାଖଣ୍ଡି ଥାନା ଅଧୀନ ଆଇଆର୍ଇ ଛକ ନିକଟ ଜାତୀୟ ରାଜପଥରେ ଗୁରୁବାର ବିଳମ୍ବିତ ରାତିରେ ଏକ ଦୁର୍ଘଟଣା ଘଟିଛି। ଟିପ୍ପର ସହ କାରର ଧକ୍କା ହୋଇ ଜଣଙ୍କ ମୃତ୍ୟୁ ହୋଇଥିବା ବେଳେ ୨ ଜଣ ଆହତ ହୋଇଛନ୍ତି। ମୃତ ବ୍ୟକ୍ତି ଜଣଙ୍କ ହେଲେ ବ୍ରହ୍ମପୁରର ରାମକୃଷ୍ଣ ପାତ୍ର। ଆହତମାନେ ହେଲେ ମୃତ ରାମକୃଷ୍ଣଙ୍କ ସ୍ତ୍ରୀ ସ୍ବପ୍ନା ଓ ପୁଅ ସାଇ।ସୂଚନାଯୋଗ୍ୟ, ରାତିରେ ଏକ କାର (ଓଡି-୦୭ପି-୧୩୦୦) ଯୋଗେ ଭୁବନେଶ୍ୱରରୁ ରାମକୃଷ୍ଣ ଓ ତାଙ୍କ ପରିବାର ବ୍ରହ୍ମପୁରକୁ ଫେରୁଥିବା ବେଳେ ଉକ୍ତ ଛକ ନିକଟ ଜାତୀୟ ରାଜପଥରେ ଏକ ଟିପ୍ପର ସହ ଧକ୍କା ହୋଇଥିଲା। ଗୁରୁତର ଅବସ୍ଥାରେ ସମସ୍ତଙ୍କୁ ଚିକିତ୍ସା ପାଇଁ ବ୍ରହ୍ମପୁର ବଡ଼ ମେଡିକାଲକୁ ନିଆଯାଇଥିଲା। ସେଠାରେ ଡାକ୍ତର ରାମକୃଷ୍ଣଙ୍କୁ ମୃତ ଘୋଷଣାକରିଥିଲେ।
