ଜ୍ୱାଇଁଙ୍କୁ ସଂଘବଦ୍ଧ ଆକ୍ରମଣ ଘଟଣା: ଶଳା, ଶାଶୁ, ସ୍ତ୍ରୀ ସମେତ ୪ ଅଟକ
11:56 amMarch 14, 2020

ବ୍ରହ୍ମପୁର ଅଫିସ,୧୪।୩: ଗଞ୍ଜାମ ଜିଲା କୁକୁଡାଖଣ୍ଡି ବ୍ଲକ ଅନ୍ତର୍ଗତ ଜଗଦଳପୁର ପଞ୍ଚାୟତରେ ଶୁକ୍ରବାର ରାତିରେ ଜ୍ୱାଇଁଙ୍କୁ ସଂଘବଦ୍ଧ ଆକ୍ରମଣ ହୋଇଥିଲା। ଏହି ଘଟଣାରେ ଶନିବାର ସଦର ଥାନା ପୋଲିସ ଜଗଦଳପୁର ଗ୍ରାମର ୪ ଜଣଙ୍କୁ ଅଟକ ରଖିଛି। ସେମାନେ ହେଲେ ଶଳା ସନ୍ତୋଷ ସେଠୀ, ଶାଶୁ, ସ୍ତ୍ରୀ ଏବଂ ଉକ୍ତ ପଞ୍ଚାୟତର ଜଣେ ସମିତି ସଭ୍ୟ। ଏନେଇ ଶନିବାର ସକାଳ ସୁଦ୍ଧା ଥାନାରେ ଅଭିଯୋଗ ହୋଇ ନ ଥିବା ବେଳେ ପୋଲିସ ଅଟକମାନଙ୍କୁ ଘଟଣା ସମ୍ପର୍କରେ ଜେରା ଚଳାଇଥିବା ଜଣାପଡିଛି ।
ପ୍ରକାଶ ଯେ, ଗୋପାଳପୁର ଥାନା ଅନ୍ତର୍ଗତ କରାପଲ୍ଲୀର ବୀଣା ସେଠୀ (୩୭) ଜଗଦଳପୁର ଗ୍ରାମର ସନ୍ତୋଷଙ୍କ ଭଉଣୀଙ୍କୁ କିଛିବର୍ଷ ପୂର୍ବେ ବିବାହ କରିଥିଲେ। ଘରୋଇ ଅଶାନ୍ତିକୁ କେନ୍ଦ୍ରକରି ବୀଣାଙ୍କ ସ୍ତ୍ରୀ କିଛିଦିନ ତଳେ ଭାଇ ଘର ଜଗଦଳପୁରକୁ ଚାଲିଯାଇଥିଲେ। ଶୁକ୍ରବାର ରାତିରେ ବୀଣା ସ୍ତ୍ରୀଙ୍କୁ ଡାକିବା ପାଇଁ ଜଗଦଳପୁର ଯାଇଥିଲେ। ସେଠାରେ ବୀଣା ଓ ସନ୍ତୋଷଙ୍କ ମଧ୍ୟରେ ଝଗଡ଼ା ହୋଇଥିଲା। ରାତ୍ରି ପ୍ରାୟ ସାଢ଼େ ୧୧ ଟାରେ ସନ୍ତୋଷ ଜ୍ୱାଇଁ ବୀଣାଙ୍କୁ ଆକ୍ରମଣ କରିବା ବେଳେ ତାଙ୍କ ମା’, ଭଉଣୀ ଏବଂ ଉକ୍ତ ପଞ୍ଜାୟତର ଜଣେ ସମିତି ସଭ୍ୟ ସହଯୋଗ କରିଥିବା ପୋଲିସ ଜାଣିବାକୁ ପାଇଛି। ଆକ୍ରମଣର ଶିକାର ହୋଇ ଗାଁ ଦାଣ୍ଡରେ ଅଚେତ ହୋଇପଡ଼ିଥିବା ବୀଣାଙ୍କୁ ପୋଲିସ ଉଦ୍ଧାରକରି ଏମ୍‌କେସିଜି ମେଡିକାଲରେ ଭର୍ତ୍ତି କରିଥିବା ଜଣାପଡ଼ିଛି।