ନୂଆଦିଲ୍ଲୀ,୧୩-୬: ଏନ୍ଡିଏ ସରକାର ଅମଳରେ ଜିଡିପି ହାର ଦର୍ଶାଇବାରେ ମିଥ୍ୟାର ଆଶ୍ରୟ ନିଆଯାଇଥିଲା ବୋଲି ପୂର୍ବତନ ଅର୍ଥନୈତିକ ଉପଦେଷ୍ଟା ଅରବିନ୍ଦ ସୁବ୍ରମଣ୍ୟନ୍ ଏକ ରିପୋର୍ଟ ପ୍ରକାଶ କରି ଅଭିଯୋଗ କରିଛନ୍ତି। ତେବେ ପ୍ରଧାନମନ୍ତ୍ରୀଙ୍କ ଆର୍ଥିକ ଉପଦେଷ୍ଟା କମିଟି(ପିଏମ୍-ଇଏସି) ଏହାର ଜବାବ ଦେବାକୁ ଅଣ୍ଟା ଭିଡ଼ିଛି। ସେମାନେ ବୁଧବାର ସୁବ୍ରମଣ୍ୟନ୍ଙ୍କ ଦାବିକୁ ଖଣ୍ଡନ କରିଛନ୍ତି। ସେମାନେ ଯଥାସମୟରେ ଏହାର ପଏଣ୍ଟ ବାଏ ପଏଣ୍ଟ ଜବାବ ଦେବେ ବୋଲି କହିଛନ୍ତି। ଇଏସି ପକ୍ଷରୁ ବୁଧବାର କୁହାଯାଇଛି ଯେ, ସୁବ୍ରମଣ୍ୟନ୍ଙ୍କ ଆକଳନକୁ ଭଲ ଭାବେ ଯାଞ୍ଚ କରାଯିବ। ଏହାପରେ ସରକାରଙ୍କ ପକ୍ଷରୁ ଯୋଗ୍ୟ ଜବାବ ଦିଆଯିବ। ଏ ସମ୍ପର୍କରେ ଏକ ବିବୃତି ଜାରି କରି କୁହାଯାଇଛି। ଏଥିରେ କୁହାଯାଇଛି ଯେ, ସିଇଏରେ କାର୍ଯ୍ୟ କରିବା ବେଳେ ସୁବ୍ରମଣ୍ୟନ୍ ଜିଡ଼ିପି ତଥ୍ୟକୁ ନେଇ ପ୍ରଶ୍ନ ଉଠାଇଥିବେ ଅଥବା ଏହା ଉପରେ କାର୍ଯ୍ୟ କରିବାକୁ ପରାମର୍ଶ ଦେଇଥିବେ। ତେବେ ବର୍ତ୍ତମାନ ଏ ସମ୍ପର୍କରେ ଏହାର ଜବାବ ଦେଇ ସମଗ୍ର ଘଟଣାକୁ ଅତ୍ୟନ୍ତ ସମ୍ବେଦନଶୀଳ କରିବାକୁ ଇଏସି ଚାହୁଁନାହିଁ।
