ଜଗତ୍ସିଂହପୁର ଅଫିସ, ୫।୪: କରୋନା ଭୂତାଣୁ (କୋଭିଡ୍-୧୯ ) ସଂକ୍ରମଣକୁ ନେଇ ଜିଲାବାସୀଙ୍କ ମଧ୍ୟରେ ଦେଖା ଦେଇଥିବା ଭୟ ଆପାତତଃ ଦୂର ହୋଇଛି। କାରଣ ଖବର ଲେଖାହେବା ଭିତରେଜଗତସିଂହପୁର ଜିଲାରୁ ଯାଇଥିବା ସମସ୍ତ 38ଟି ଯାକ ନମୁନା ରିପୋର୍ଟ ନେଗେଟିଭ୍ ଆସିଛି । ଏହି ସୂଚନା ଦେଇଛନ୍ତି ଜିଲାପାଳ ସଂଗ୍ରାମ କେଶରୀ ମହାପାତ୍ର। ଜିଲାପାଳ କହିଛନ୍ତି, ଦିଲ୍ଲୀ ନିଜାମୁଦ୍ଦିନ ତବଲିଗ ଜମାତ ଧର୍ମସଭାରୁ ଫେରିଥିବା ୨ ଜଣଙ୍କ ସମେତ ମୋଟ ୩୮ ଜଣଙ୍କ ଦେହରେ କରୋନା ଭୂତାଣୁ ଥିବା ସନ୍ଦେହ କରାଯାଇ ସେମାନଙ୍କ ସ୍ବାବ୍ ପରୀକ୍ଷା ପାଇଁ କଟକ ପଠାଯାଇଥିଲା। ଏହିସବୁ ନମୁନା କରୋନା ନେଗେଟିଭ୍ ଥିବା ଜଣାଯାଇଛି । ସେହିପରି ବିଦେଶରୁ ଫେରିଥିବା ଜିଲାର ୧୬୮ ଜଣଙ୍କୁ ଅଲଗା ଭାବେ ରହିବାକୁ ପରାମର୍ଶ ଦିଆଯାଇଥିଲା । ସେମାନେ ଏଥିମଧ୍ୟରେ ୧୪ ଦିନ କାଟି ସାରିଥିଲେ ସୁଦ୍ଧା ଅସୁସ୍ଥ ହୋଇନାହାନ୍ତି।
