ସିଡ୍ନୀ, ୯।୧ (ଏଏଫ୍ପି)- ଅଷ୍ଟ୍ରେଲୀୟ କ୍ରିକେଟର ତଥା ବିଗ୍ ବାସ୍ ଲିଗ୍ (ବିବିଏଲ୍)ରେ ସିଡ୍ନୀ ଥଣ୍ଡର୍ସ ପକ୍ଷରୁ ଖେଳୁଥିବା ଅଫ୍ ସ୍ପିନର କ୍ରିସ୍ ଗ୍ରୀନ ୩ ମାସ ଲାଗି ବୋଲିଂ କରିପାରିବେ ନାହିଁ। ଅବୈଧ ବୋଲିଂ ଶୈଳୀ ଲାଗି କ୍ରିକେଟ୍ ଅଷ୍ଟ୍ରେଲିଆ (ସିଏ) ତାଙ୍କୁ ୩ ମାସ ପାଇଁ ବାସନ୍ଦ କରିଛି। ଜାନୁୟାରୀ ୨ରେ ମେଲବୋର୍ନ ଷ୍ଟାରସ୍ ଓ ସିଡ୍ନୀ ଥଣ୍ଡର୍ସ ମଧ୍ୟରେ ଅନୁଷ୍ଠିତ ବିବିଏଲ୍ ମ୍ୟାଚ୍ ବେଳେ ୨୬ ବର୍ଷୀୟ ଗ୍ରୀନଙ୍କ ବୋଲିଂ ଶୈଳୀକୁ ନେଇ ଆପତ୍ତି ଉଠିଥିଲା। ଏହାପରେ କ୍ରିକେଟ୍ ଅଷ୍ଟ୍ରେଲିଆର ପ୍ରୋଟୋକଲ୍ସ ଅନୁଯାୟୀ ଗ୍ରୀନ୍ ନ୍ୟାଶନାଲ କ୍ରିକେଟ୍ ସେଣ୍ଟରରେ ବୋଲିଂ ପରୀକ୍ଷା କରିଥିଲେ। ଏଥିରେ ତାଙ୍କ ବୋଲିଂ ଶୈଳୀ ଅବୈଧ ରହିଥିବା ଜଣାପଡ଼ିଛି। ବୋଲିଂ କରିବାରୁ ବଞ୍ଚତ୍ତ ହୋଇଥିଲେ ମଧ୍ୟ ସେ ସିଡ୍ନୀ ପାଇଁ ଜଣେ ବ୍ୟାଟ୍ସମ୍ୟାନ ଭାବେ ଖେଳିପାରିବେ ବୋଲି ଜଣାପଡ଼ିଛି। ସେହିଭଳି ଗତ ଆଇପିଏଲ୍ ନିଲାମୀରେ କୋଲକାତା ନାଇଟ୍ ରାଇଡର୍ସ ତାଙ୍କୁ ୨୦ ଲକ୍ଷ ଟଙ୍କାରେ କ୍ରୟ କରିଥିଲା। ଯେହେତୁ ତାଙ୍କୁ କେବଳ ଅଷ୍ଟ୍ରେଲିଆ ପକ୍ଷରୁ ବୋଲିଂରୁ ବାସନ୍ଦ କରାଯାଇଛି, ସେ ଆଗାମୀ ଆଇପିଏଲ୍ ଖେଳିବାରେ କୌଣସି ଅସୁବିଧା ନାହିଁ। କିନ୍ତୁ ତାଙ୍କ ବୋଲିଂ ଉପରେ କଡ଼ା ନଜର ରହିବ।
