ବ୍ରହ୍ମପୁର ଅଫିସ, ୨୨ା୨-ବୈଦ୍ୟନାଥପୁର ଥାନା ଅନ୍ତର୍ଗତ ବ୍ରହ୍ମନଗରରରେ ଥିବା ଗୁରୁଦେବ ହସ୍ପିଟାଲକୁ ଶୁକ୍ରବାର ସନ୍ଧ୍ୟାରେ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ନିର୍ଦ୍ଦେଶକ୍ରମେ ସିଲ୍ କରାଯାଇଛି ।
ହସ୍ପିଟାଲ ମାଲିକ କ୍ଲିନିକାଲ ଏଷ୍ଟାବ୍ଲିସ୍ମେଣ୍ଟ ସମ୍ପର୍ର୍କିତ କାଗଜପତ୍ର ଦେଇ ନ ପାରି ନ ଥିବାରୁ ମାଜିଷ୍ଟ୍ରେଟ ଭାବେ ବ୍ରହ୍ମପୁର ତହସିଲଦାର ଶିପକ କୁମାର ପାତ୍ରଙ୍କ ଉପସ୍ଥିତିରେ ହସ୍ପିଟାଲକୁ ସିଲ୍ କରାଯାଇଛି। ଜିଲାପାଳଙ୍କ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ହସ୍ପିଟାଲ ବନ୍ଦ ରହିବ ବୋଲି ଉପଜିଲାପାଳ ସିନ୍ଧେ ଦତ୍ତାତ୍ରୟ ଭାଉସାହେବ ସୂଚନା ଦେଇଛନ୍ତି । ଅନ୍ୟପକ୍ଷରେ ଏଠାରେ ଚିକିତ୍ସିତ ହେଉଥିବା ୧୬ ମହିଳାଙ୍କ ମଧ୍ୟରୁ ଜଣଙ୍କୁ ବ୍ରହ୍ମପୁର ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଛି। ଅନ୍ୟ ୧୫ଜଣଙ୍କ ଅସ୍ତ୍ରୋପଚାର ହୋଇଥିବାରୁ ସପ୍ତାହେ ପର୍ଯ୍ୟନ୍ତ ଗୁରୁଦେବ ହସ୍ପିଟାଲରେ ହିଁ ଚିକିତ୍ସା ଚାଲିବ ବୋଲି ଡିଏମଓ ରାଜେନ୍ଦ୍ର କୁମାର ସାହୁ ସୂଚନା ଦେଇଛନ୍ତି ।
୧୫ ଜଣଙ୍କ ମଧ୍ୟରେ ୧୩ ପ୍ରସୂତି ଅଛନ୍ତି। ସପ୍ତାହେ ଧରି ସମ୍ପୃକ୍ତ ଡାକ୍ତର ସେମାନଙ୍କ ଚିକିତ୍ସା କରିବେ ବୋଲି ପ୍ରଶାସନ ତରଫରୁ ସୂଚନା ମିଳିଛି । ଶୁକ୍ରବାର ସିଟି ହସ୍ପିଟାଲର ସ୍ତ୍ରୀ ଓ ପ୍ରସୂତି ବିଭାଗ ଡାକ୍ତର ଗୀତାଞ୍ଜଳି ଦାଶ ଓ ମେଡ଼ିକାଲ ଟିମ ରୋଗୀମାନଙ୍କ ସ୍ବାସ୍ଥ୍ୟବସ୍ଥା ପଚାରି ବୁଝିଥିଲେ।
ଚିକିତ୍ସା ଅବହେଳାରୁ ଗୁରୁଦେବ ହସ୍ପିଟାଲରେ ସୋମବାର ରାତିରେ ଐଶ୍ୱର୍ଯ୍ୟା ସିଂଦେଓଙ୍କ ମୃତ୍ୟୁ ହୋଇଥିବା ଜିଲା ପ୍ରଶାସନ ନିକଟରେ ଅଭିଯୋଗ ହୋଇଥିଲା । ଉକ୍ତ ହସ୍ପିଟାଲଟି କ୍ଲିନିକାଲି ଏଷ୍ଟାବ୍ଲିସ୍ମେଣ୍ଟ ଆକ୍ଟ ଅନୁସାରେ ସମସ୍ତ ସର୍ତ୍ତାବଳୀ ପୂରଣ କରିଛି କି ନାହିଁ, ନିୟମ ଅନୁସାରେ ପଞ୍ଜୀକରଣ, ବର୍ଜ୍ୟବସ୍ତୁ ପରିଚାଳନା ଓ ଅଗ୍ନି ନିରାପତ୍ତା ବ୍ୟବସ୍ଥା ଠିକ ଭାବେ ପାଳନ କରାଯାଉଛି କି ନାହିଁ ତାହାର ପ୍ରଶାସନିକ ତଦନ୍ତ କରିବାକୁ ଜିଲାପାଳ ଗତ ୧୯ ତାରିଖରେ ନିର୍ଦ୍ଦେଶ ଦେଇଥିଲେ ା ପ୍ରଶାସନର ମିଳିତ ଟିମ ଯାଞ୍ଚ କରି ଜବତ କରିଥିବା କାଗଜପତ୍ରଗୁଡ଼ିକ ଜିଲାପାଳଙ୍କ ନିକଟକୁ ପଠାଇଥିଲା। ଗୁରୁଦେବ ହସପିଟାଲ କଳ୍ପନା ବରାଳଙ୍କ ନାମରେ ପଞ୍ଜୀକୃତ ହୋଇଛି, ହେଲେ ତାହା ଅନ୍ୟମାନଙ୍କ ଦ୍ୱାରା ପରିଚାଳିତ ହେଉଥିବା ଜଣାପଡିିଥିଲା ା
