ଓଡ଼ିଶା ଯାତ୍ରା ଜଗତରେ ଏବେ ଯେଉଁ କେତେଜଣ ଯୁବପ୍ରତିଭା ନେଗେଟିଭ୍ ଭୂମିକାକୁ ଏକ ନୂଆଟ୍ରେଣ୍ଡ ଦେବା ଆରମ୍ଭ କରିଛନ୍ତି ସେମାନଙ୍କ ମଧ୍ୟରେ ଜଣେ ହେଉଛନ୍ତି ଯୁବ ଖଳନାୟକ ପୀୟୂଷ ତ୍ରିପାଠୀ। ପୀୟୂଷଙ୍କ ଅଭିନୀତ ‘ମୁଁ କେନ୍ଦ୍ରାପଡ଼ାର ବାବା’, ‘ରାଧା ପିନ୍ଧିଦେଲା ମୀରା ସିନ୍ଦୂର’, ‘କଉଡ଼ିଖେଳ (ଦ୍ୱିତୀୟଭାଗ)’ ଆଦି ନାଟକକୁ ଏହାର ଗୋଟିଏ ଗୋଟିଏ ଉଦାହରଣ ଭାବରେ ନିଆଯାଇପାରେ। ମଞ୍ଚରେ ଗର୍ଜନ ତର୍ଜନ ନାହିଁ, ଚେହେରାରେ ବୀଭତ୍ସତା ନାହିଁ; ମାତ୍ର ଅଭିନୟରେ ରହିଛି ପ୍ରଚୁର ଖଳନାୟକୀ। ହସିହସି ସଂଳାପ କୁହାଯାଉଥିବ ସତ; ହେଲେ ସେଇଥିରେ ଦର୍ଶକଙ୍କ ରକ୍ତ ତାତୁଥିବ ଆଉ ଛାତି ଥରୁଥିବ। ଖଳନାୟକର ଏହି ନୂଆ ଟ୍ରେଣ୍ଡକୁ ଦର୍ଶକ ବି ବେଶ୍ ପସନ୍ଦ କରୁଛନ୍ତି। ସେଥିଲାଗି, ସେମାନଙ୍କୁ ‘ଖଳନାୟକ’ ବୋଲି ନ କହି କେହିକେହି ‘ଆଣ୍ଟିହିରୋ’ ବୋଲି ମଧ୍ୟ କହିବା ଆରମ୍ଭ କରିଛନ୍ତି। ନେଗେଟିଭ ଭୂମିକାରେ ଆଜି ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ପୀୟୂଷଙ୍କ କ୍ୟାରିୟର ଯେ, ଆରମ୍ଭ ହୋଇଥିଲା ନାୟକ (ହିରୋ) ଭାବରେ ହୁଏତ ଏକଥା ଖୁବ୍ କମ୍ ଦର୍ଶକ ଜାଣିଥିବେ। କଟକ ଲିଙ୍କରୋଡ଼ ଖପୁରିଆର ଏହି କଳାପ୍ରେମୀ ଯୁବକଜଣକ ଯାତ୍ରାପ୍ରତି ଆକର୍ଷିତ ହୋଇ ପ୍ରଥମେ ଯୋଗ ଦେଇଥିଲେ ବିଶ୍ୱଜନନୀ ଗଣନାଟ୍ୟରେ। ସେଠାରେ ତାଙ୍କର ନାଟକ ଥିଲା ‘ଶାଗୁଣା ଯାଉଛି ଶ୍ୱଶୁର ଘର’ ଏବଂ ‘ମୋ ସ୍ବାମୀ ନାହାନ୍ତି ଘରେ’। ଏଥିରେ ସେ ନାୟକ ଭାବରେ ଅଭିନୟ କରିଥିଲେ। ପରବର୍ଷ ସେ ଯୋଗଦେଲେ କୋଣାର୍କ ଗଣନାଟ୍ୟରେ। ସେଇଠି ବଦଳିଗଲା ତାଙ୍କ ଅଭିନୟର ଧାରା। କୋଣାର୍କରେ ତାଙ୍କର ବିଶିଷ୍ଟ ଅଭିନେତା ଦୈତ୍ୟାରୀ ପଣ୍ଡାଙ୍କ ସହ ସାକ୍ଷାତ ହେଲା। ସେ ପୂର୍ବରୁ ଦୈତ୍ୟାରୀ ପଣ୍ଡାଙ୍କ ଦ୍ୱାରା ପ୍ରଭାବିତ ହୋଇଥିଲେ। ସେ ହିଁ ତାଙ୍କୁ ଖଳଚରିତ୍ରରେ ଅଭିନୟ କରିବାକୁ କହିଲେ। ଖାଲି କହିଲେନି, ହାତ ଧରି ଯେମିତି ପିଲାକୁ ଖଡ଼ି ମଡ଼ାଯାଏ ସେମିତି ଅଭିନୟ ଶିଖେଇଲେ। ପୀୟୂଷ କହନ୍ତି : ‘ମୁଁ ଆଜି ଯାହା ହୋଇଛି ଦଇତାରୀନନାଙ୍କ ପାଇଁ ହୋଇଛି। ସେ ମୋ ଅଭିନୟ ଜୀବନର ବାପା। ସେ ମୋ ଗୁରୁ। ସେ ମୋର ଆଦର୍ଶ। ସେ ମୋର ସବୁକିଛି।’ ଇତିମଧ୍ୟରେ ଯାତ୍ରା ଜଗତରେ ପାଞ୍ଚବର୍ଷ ଅତିବାହିତ କରିସାରିଥିବା ପୀୟୂଷ ବିଶ୍ୱଜନନୀ, କୋଣାର୍କ, ଇନ୍ଦ୍ରଭୁବନ, ରଙ୍ଗମହଲ ଆଦିରେ ନିଜର ଅଭିନୟ ପ୍ରଦର୍ଶନ କରି ସମ୍ପ୍ରତି ପାର୍ବତୀରେ ଅଭିନୟ କରୁଥିବା ବେଳେ ଆସନ୍ତା ସିଜନ୍ରେ ସେ ଯାତ୍ରା ସୂର୍ଯ୍ୟମନ୍ଦିରରେ ଯୋଗଦେବେ ବୋଲି ସୂଚନା ଦେଇଛନ୍ତି। ସେଥିପାଇଁ ନିଜକୁ ପ୍ରସ୍ତୁତ କରୁଛନ୍ତି ସେ। ବର୍ତ୍ତମାନର ଯୁବପିଢ଼ି ‘ଫିଟ୍ ଆଣ୍ଡ ଫାଇନ୍’ ଉପରେ ଗୁରୁତ୍ୱ ଦେଉଥିବାରୁ ସେ ନିଜର ବଡ଼ି ଫିଟ୍ନେସ୍ ଉପରେ ଅଧିକ ଗୁରୁତ୍ୱ ଦେଉଛନ୍ତି। ଯାତ୍ରାକୁ ନେଇ ଅନେକ କ୍ଷୋଭ ରହିଛି ପୀୟୂଷଙ୍କ ମନରେ। ସେ କହନ୍ତି, ଯାତ୍ରା ପ୍ରତି ସରକାରଙ୍କର ନଜର ନାହିଁ। ପୁଣି ଯାତ୍ରାରେ ଅନେକ ରାବଣ ରହିଛନ୍ତି ଯେଉଁମାନେ ସବୁବେଳେ ଗୋଡ଼ଟଣା ନୀତି ଅବଲମ୍ବନ କରୁଛନ୍ତି। ଫଳରେ ପ୍ରତିଭାବାନ ଯୁବକମାନେ ଆଗକୁ ଆସିପାରୁ ନାହାନ୍ତି। ସେଥିଲାଗି ଯାତ୍ରାକୁ ନେଇ କୌଣସି ସ୍ବପ୍ନ ଦେଖି ହେଉନାହିଁ। ଓଡ଼ିଶାରେ ଯାତ୍ରାର ଏକ ବଡ଼ ପରମ୍ପରା ରହିଛି। ହେଲେ ପ୍ରଥମେ ଏସବୁରୁ ଯାତ୍ରା ମୁକ୍ତ ହେବା ଦରକାର। ବାପା ନଗେନ୍ଦ୍ରନାଥ ତ୍ରିପାଠୀ, ମା’ ଉଷାରାଣୀ ତ୍ରିପାଠୀ, ପତ୍ନୀ ରିଙ୍କି ତଥା ଏକମାତ୍ର ପୁତ୍ର ଆୟୁଷକୁ ନେଇ ସୁଖର ଜୀବନ ବିତାଉଥିବା ପୀୟୂଷଙ୍କର ଗୋଟିଏ ସ୍ବପ୍ନ ହେଉଛି, ତାଙ୍କ ଗୁରୁ ଦଇତାରୀ ପଣ୍ଡା ‘କଂସେଇଖାନା’ରେ ଯେଭଳି ଏକ ମାଇଚିଆ ଚରିତ୍ରରେ ଆସିଥିଲେ ସେ ବି ସେମିତି ଏକ ଚରିତ୍ରରେ ଅଭିନୟ କରନ୍ତେ। ସେ କେବଳ ସମୟ ଆଉ ସୁଯୋଗର ଅପେକ୍ଷାରେ ଅଛନ୍ତି।
