ଓ୍ବାଶିଂଟନ,୨୫।୫(ଏଏଫ୍ପି)- ଆଇସିସି ସ୍ବୀକୃତି ମିଳିବା ୬ ମାସ ପରେ ୟୁଏସ୍ଏ କ୍ରିକେଟ ବୋର୍ଡ ଏକ ବଡ଼ ଘୋଷଣା କରିଛି। ଦେଶରେ କ୍ରିକେଟର ଭିତ୍ତିଭୂମୀ ବିକାଶ, ଆଞ୍ଚଳିକ ଏକାଡେମୀ ପ୍ରତିଷ୍ଠା ଓ ଏକ ଟି୨୦ ଲିଗ୍ ଆୟୋଜନ ପାଇଁ ଓ୍ବିଲୋ ଟିଭି ଓ ଟାଇମ୍ସ ଅଫ୍ ଇଣ୍ଡିଆ ସହ ୧ ବିଲିୟନ ଡଲାର ଚୁକ୍ତି କରାଯାଇଛି। ଏଥିନେଇ ୟୁଏସ୍ଏ କ୍ରିକେଟ ଅଧ୍ୟକ୍ଷ ପରାଗ ମରାଠି ଘୋଷଣା କରିଛନ୍ତି। ଗତ ନଭେମ୍ବରରେ ବୋର୍ଡ ଏକାଡେମୀ ନିର୍ମାଣ, ପାଣ୍ଠି ସଂଗ୍ରହ ଓ ପ୍ରଥମ ପେଶାଦାର ଟି୨୦ ଲିଗ୍ ପରିଚାଳନା କରିବା ଲାଗି ପାଟନର୍ସ ଖୋଜିବା ଆରମ୍ଭ କରିଥିଲା। ଟି୨୦ ଲିଗ୍ ୨୦୨୧ ସୁଦ୍ଧା ଆରମ୍ଭ କରିବା ନେଇ ଯୋଜନା କରାଯାଇଛି। ଆଇପିଏଲ ଭଳି ଆମେରିକୀୟ ଓ ବିଦେଶୀ ଖେଳାଳିଙ୍କୁ ନେଇ ଲିଗ୍ ଖେଳାଯିବ। ଏହାକୁ ୟୁନାଇଟେଡ୍ ଷ୍ଟେଟ୍ରେ ଏହି ଲିଗ୍କୁ ଓ୍ବିଲୋ ଟିଭି ପ୍ରସାରଣ କରିବ। ଓ୍ବିଲୋ ଟିଭି ହେଉଛି ଉତ୍ତର ଆମେରିକାର ସବୁଠୁ ବଡ଼ କ୍ରିକେଟ ପ୍ରସାରଣକାରୀ ଚ୍ୟାନେଲ, ଯାହାକି ଦେଶରେ ଆଇସିସି ଇଭେଣ୍ଟ ସମେତ ଆଇପିଏଲ ଓ ପିଏସ୍ଏଲର ସିଧା ପ୍ରସାରଣ କରେ।
