ବ୍ରହ୍ମପୁର ଅଫିସ, ୩୧ା୫- କୋଭଡ୍ ଡ୍ୟୁଟି ସାରି ଫେରିଥିବା ଆୟୁଷ ଡାକ୍ତରଙ୍କୁ କରାଣ୍ଟାଇନ୍ ସମୟ ଅବଧି ସରିବା ପୂର୍ବରୁ ପୁନଃ କୋଭିଡ୍ ଡ୍ୟୁଟିରେ ଯୋଗଦେବା ନେଇ ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ (ସିଡିଏମ୍ପିଏଚଓ)ଙ୍କ ନିକଟରୁ ନିର୍ଦ୍ଦେଶ ଦିଆଯାଇଛି। ପାରଳା ମହାରାଜା ଇଞ୍ଜିନିୟରିଂ କଲେଜ ଓ ବିଜୁ ପଟ୍ଟନାୟକ ହୋମିଓପାଥି କଲେଜ କୋଭିଡ୍ କେୟାର ସେଣ୍ଟରରୁ ଡ୍ୟୁଟି ସାରି ଫେରିଥିବା ଆୟୁଷ ଡାକ୍ତରମାନେ ଏଭଳି ଅଭିଯୋଗ କରିଛନ୍ତି। ଶନିବାର ସିଡିଏମ୍ପିଏଚ୍ଓଙ୍କୁ ସାକ୍ଷାତ୍ କରିବା ସହ କ୍ବାରାଣ୍ଟାଇନ୍ ଅବଧି ହେବା ଶେଷ ପରେ କାର୍ଯ୍ୟରେ ଯୋଗଦେବାକୁ କହିିଛନ୍ତି। ସୂଚନାପ୍ରକାରେ, ବ୍ରହ୍ମପୁର ବିଜୁ ପଟ୍ଟନାୟକ ହୋମିଓପାଥି କଲେଜ କୋଭିଡ୍ କେୟାର ସେଣ୍ଟରରୁ ୬ ଆୟୁଷ ଡାକ୍ତର ଗତ ୧୮ତାରିଖରେ ଡ୍ୟୁଟିସାରି ଫେରିଥିଲେ। ସେହିପରି ପାରଳା ମହାରାଜା ଇଞ୍ଜିନିୟରିଂ ସ୍କୁଲ କୋଭିଡ୍ କେୟାର ସେଣ୍ଟରରୁ ୯ ଆୟୁଷ ଡାକ୍ତର ଗତ ୨୬ତାରିଖରେ ଡ୍ୟୁଟିରୁ ଫେରିଥିଲେ। ସମସ୍ତଙ୍କୁ ଘରେ ୧୪ ଦିନ କ୍ବାରାଣ୍ଟାଇନ୍ରେ ରହିବାକୁ କୁହାଯାଇଥିଲା। କିନ୍ତୁ କ୍ୱାରାଣ୍ଟାଇନ୍ ଅବଧି ସରିବା ପୂର୍ବରୁ ସମସ୍ତଙ୍କୁ ପୁନଃ କାର୍ଯ୍ୟରେ ଯୋଗଦେବାକୁ ଶୁକ୍ରବାର ନିର୍ଦ୍ଦେଶନାମା ଜାରି କରାଯାଇଛି। ଅବଧି ପୂର୍ବରୁ ପୁନଃ କାର୍ଯ୍ୟରେ ଯୋଗଦେଲେ ସଂକ୍ରମଣ ଆଶଙ୍କା ରହୁଥିବା ସେମାନେ କହିଛନ୍ତି। ଅବଧି ଶେଷ ପରେ କାର୍ଯ୍ୟରେ ଯୋଗଦେବାକୁ ନିର୍ଦ୍ଦେଶନାମା ଜାରି କରିବା ନେଇ ଡାକ୍ତରମାନେ ସିଡିଏମ୍ପିଏଚଓଙ୍କୁ ନିବେଦନ କରିଛନ୍ତି।
ଏହାବ୍ୟତୀତ ଏପ୍ରିଲ ୬ ରୁ କୋଭିଡ୍ କାର୍ଯ୍ୟରେ ଆୟୁଷ ଡାକ୍ତରଙ୍କୁ ନିୟୋଜିତ କରିବା ପରେ ଜିଲାରେ ଥିବା ଆୟୁର୍ବେଦ ଓ ହୋମିଓପାଥି ଚିକିତ୍ସାଳୟ ବନ୍ଦ ହୋଇଛି। ଖୁବଶୀଘ୍ର ଆୟୁର୍ବେଦ ଓ ହୋମିଓପାଥି ଚିକିତ୍ସାଳୟକୁ ଖୋଲିବାକୁ ପଦକ୍ଷେପ ନେବାକୁ ଡାକ୍ତରମାନେ ଦାବି କରିଛନ୍ତି। ଏନେଇ ସିଡିଏମ୍ପିଏଚଓ ଡା. ଉମାଶଙ୍କର ମିଶ୍ରଙ୍କୁ ଦାବିପତ୍ର ପ୍ରଦାନ କରିଛନ୍ତି। ଅନ୍ୟପକ୍ଷରେ ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁସାରେ ଆୟୁଷ ଡାକ୍ତରଙ୍କୁ ପୁନଃ କାର୍ଯ୍ୟରେ ଯୋଗଦେବା ନେଇ ନିର୍ଦ୍ଦେଶନାମା ଜାରି କରାଯାଇଥିବା ଡା. ମିଶ୍ର କହିଛନ୍ତି।
