ଅନୁଗୋଳ ଅଫିସ, ୨୭।୭ – ଅନୁଗୋଳ ସହର ଉପକଣ୍ଠରେ ଘଟିଥିବା ନାବାଳିକା ଛାତ୍ରୀ ବଳାତ୍କାର ଓ ହତ୍ୟା ଘଟଣାର ରାୟକୁ ସବୁ ମହଲରେ ସ୍ବାଗତ କରାଯାଇଛି। ଅନୁଗୋଳ କୋର୍ଟ ଦେଇଥିବା ଏହି ଦୃଷ୍ଟାନ୍ତମୂଳକ ରାୟ କାର୍ଯ୍ୟକାରୀ ହେଲେ ଏପରି ଅପରାଧ ହ୍ରାସ କ୍ଷେତ୍ରରେ ତାହା ସହାୟକ ହେବ ବୋଲି ସହରବାସୀ ମତବ୍ୟକ୍ତ କରିଛନ୍ତି। ସେମାନେ କହିଛନ୍ତି ଯେ, ଏବେ ବି ନ୍ୟାୟିକ ବ୍ୟବସ୍ଥା ତାହାର ଗରିମା ବଜାୟ ରଖିଛି। ଅନେକ ସମୟରେ ବିଳମ୍ବିତ ବିଚାରକୁ ନେଇ ବ୍ୟବସ୍ଥା ପ୍ରତି ଲୋକଙ୍କ ଆସ୍ଥା ତୁଟିଯାଉଥିବା ବେଳେ ଅନୁଗୋଳ କୋର୍ଟଙ୍କ ଏହି ତ୍ୱରିତ ରାୟ ସେହି ଭରସାକୁ ପୁଣି ଫେରାଇ ଆଣିବା ଦିଗରେ ଏକ ଆଶା ସୃଷ୍ଟିକରିଛି। ଲୋକଙ୍କ ସହିତ ନ୍ୟାୟାଳୟ ଯେ ସର୍ବଦା ରହିଛି ତାହା ଏହି ମାମଲାରୁ ସ୍ପଷ୍ଟ ହୋଇଛି। ମୃତା ନାବାଳିକାଙ୍କ ମା’ ବାପା ମଧ୍ୟ ରାୟକୁ ନେଇ ସନ୍ତୋଷ ବ୍ୟକ୍ତ କରିଛନ୍ତି। ସେମାନେ ନ୍ୟାୟାଳୟକୁ ମନ୍ଦିର ସହ ତୁଳନା କରିବା ସହ ଏଭଳି ଘଟଣା ଭିଆଉଥିବା ପ୍ରତ୍ୟେକ ଅପରାଧୀଙ୍କୁ କୋର୍ଟ ଫାଶୀ ଦଣ୍ଡ ପ୍ରଦାନ କଲେ ଅପରାଧ ହ୍ରାସ ପାଆନ୍ତା ବୋଲି କହିଛନ୍ତି। ନାବାଳିକାଙ୍କ ବାପା କହିଛନ୍ତି, ଏହି ରାୟ ନର ରାକ୍ଷସ ସାଜୁଥିବା ଲୋକଙ୍କ ପାଇଁ ଉଚିତ ଦଣ୍ଡ ହେବ। ଏଭଳି ତ୍ୱରିତ ବିଚାର କରାଯାଇ ଦଣ୍ଡ ଘୋଷଣା ହେଲେ ଅପରାଧ ଘଟାଇବାକୁ ଯେ କେହି ଭୟ କରିବ। ତେବେ ଦୋଷୀଙ୍କୁ ଫାଶୀ ଦିଆଯିବା ପରେ ଯାଇ ତାଙ୍କ ନାବାଳିକା ଝିଅର ଆତ୍ମା ଶାନ୍ତି ପାଇବ ବୋଲି ସେ କୋହଭରା କଣ୍ଠରେ ପ୍ରକାଶ କରିଛନ୍ତି। ନାବାଳିକାଙ୍କ ମା’ କହିଛନ୍ତି, ଝିଅକୁ ସିନା ନର ରାକ୍ଷସ ଛଡ଼ାଇ ନେଲା ହେଲେ ତା’ ପରି ଅନ୍ୟ କୁନି ଝିଅମାନଙ୍କ ଜୀବନ କୋର୍ଟ ବଞ୍ଚାଇ ଦେଲେ। ସେହିପରି ଏହି ମାମଲାରେ ଅନୁଗୋଳ ପୋଲିସ ପ୍ରଶାସନ ଯେପରି ତତ୍ପରତା ଦେଖାଇଲା ତାହାକୁ ମଧ୍ୟ ସହରବାସୀ ପ୍ରଶଂସା କରିଛନ୍ତି। ଏପରି ଅନ୍ୟ ମାମଲାଗୁଡ଼ିକୁ ପୋଲିସ ଗୁରୁତ୍ୱ ଦେଲେ ଲୋକଙ୍କ ଭରସା ଜିତିପାରନ୍ତା ବୋଲି ଲୋକେ ମତ ଦେଇଛନ୍ତି।
