ବିବାହ ଜୀବନର ଟର୍ଣ୍ଣିଂ ପଏଣ୍ଟ ବୋଲି କୁହାଯାଏ। କାରଣ ବିବାହ ପରେ ଉଭୟ ବରକନ୍ୟା ଆଉ ଏକ ନୂଆ ଜୀବନ ଆରମ୍ଭ କରିଥାଆନ୍ତି। ତେଣୁ କେତେକେ ବିବାହର ମୁହୂର୍ତ୍ତକୁ ଅଭୁଲା କରିବା ଲାଗି ଚେଷ୍ଟା କରିଥାଆନ୍ତି। ଏଥିପାଇଁ କିଏ ବଡ ବଡ ହୋଟେଲ ତ ପୁଣି କିଏ ରାଜପ୍ରାସାଦ ଭଳି ମଣ୍ଡପ ସଜାଇ ବିବାହ ଉତ୍ସବର ଆୟୋଜନ କରିଥାଆନ୍ତି। ହେଲେ ଆମେରିକା ନ୍ୟୁ ଜର୍ସିର ଏକ ଦମ୍ପତି ଶୌଚାଳୟରେ ବିବାହ କରିବା ଘଟଣା ବେଶ୍ ଚର୍ଚ୍ଚାର ବିଷୟ ପାଲଟିଥିଲା। ଏହାର କାରଣ ବି ଥିଲା ଖୁବ୍ ନିଆରା। ଆମେରିକା ନ୍ୟୁ ଜର୍ସିର ଏକ ଦମ୍ପତି ବିବାହ ପାଇଁ ହୋଟେଲ୍ ବୁକ୍ କରିଥିଲେ। ଯଥାରୀତି ବିବାହ କାର୍ଯ୍ୟର ଆୟୋଜନ ମଧ୍ୟ କରାଯାଇଥିଲା। ବରବଧୂଙ୍କ ସହ ଉଭୟ ପକ୍ଷରୁ ଅତିଥିମାନେ ଆସି ସେଠାରେ ଯୋଗ ଦେଇଥିଲେ। ହେଲେ ହଠାତ୍ ବରଙ୍କ ମା’ ଶୌଚାଳୟ ଯାଇଥିବା ସମୟରେ ଅସୁସ୍ଥ ହୋଇ ପଡିଥିଲେ। ସେଠାରୁ ତାଙ୍କୁ ବାହାର କରିବା କଷ୍ଟକର ବ୍ୟାପାର ଥିଲା। ତେଣୁ ଶୌଚାଳୟରେ ହିଁ ତାଙ୍କୁ ଅକ୍ସିଜେନ୍ ଲଗାଇ ଦିଆଯାଇଥିଲା। ଏପଟେ ବିବାହ ସମୟ ଗଡି ଯାଉଥିଲା। କାରଣ ସେଠାରେ ଥରେ ବିବାହ ବନ୍ଦ ହେଲେ ମ୍ୟାରେଜ୍ ଲାଇସେନ୍ସ ପାଇଁ ୪୫ ଦିନ ଅପେକ୍ଷା କରିବାକୁ ପଡିଥାଆନ୍ତା। ଅପରପକ୍ଷରେ ସେଠାରେ ମା’ଙ୍କ ସାମ୍ନାରେ ବର ବିବାହ କରିବାର ରୀତି ରହିଛି। ତେଣୁ ବରବଧୂ ଶୌଚାଳୟରେ ମା’ଙ୍କ ଉପସ୍ଥିତିରେ ବିବାହ କରିବାକୁ ନିଷ୍ପତ୍ତି ନେଇଥିଲେ। ପରେ ଓକିଲଙ୍କ ଉପସ୍ଥିତିରେ ମ୍ୟାରେଜ ରେଜିଷ୍ଟ୍ରେଶନ କରାଯାଇ ଶୌଚାଳୟରେ ହିଁ ବିବାହ କାର୍ଯ୍ୟ ସମ୍ପନ୍ନ କରାଯାଇଥିଲା।
