କେନ୍ଦୁଝର, ୪ା୨(ଡି.ଏନ୍.ଏ.)-କେନ୍ଦୁଝର ଜିଲା ବାଂଶପାଳ ବ୍ଲକ ଫୁଲଝର ପଞ୍ଚାୟତର କାଶିଆଠାରୁ କେନ୍ଦୁଘାଟି ପର୍ଯ୍ୟନ୍ତ ବୈତରଣୀ ନଦୀ ଉପରେ ପୋଲ ନିର୍ମାଣ ପାଇଁ ଉଚ୍ଚ ନ୍ୟାୟାଳୟଙ୍କ ଆଦେଶ କାର୍ଯ୍ୟକାରୀ କରିବାକୁ ସ୍ଥାନୀୟ ଲୋକେ ସୋମବାର ଜିଲାପାଳଙ୍କ ନିକଟରେ ଏକ ଦାବିପତ୍ର ପ୍ରଦାନ କରିଛନ୍ତି। ଏହି ସମସ୍ୟାକୁ ନେଇ ଜନସାଧାରଣଙ୍କ ତରଫରୁ ଉଚ୍ଚନ୍ୟାୟାଳୟରେ ଜନସ୍ବାର୍ଥ ମାମଲା ଦାଏର ହୋଇଥିଲା। ମାନ୍ୟବର ଉଚ୍ଚ ନ୍ୟାୟାଳୟ ୮ ସପ୍ତାହ ମଧ୍ୟରେ ସେତୁ ନିର୍ମାଣ କାର୍ଯ୍ୟ ପାଇଁ ପ୍ରଶାସନ ଆବଶ୍ୟକ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ। କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଏହି ସେତୁ କାର୍ଯ୍ୟ ପାଇଁ ଆବଶ୍ୟକ ପଦକ୍ଷେପ ନିଆଯାଇନାହିଁ। ସୂଚନାଯୋଗ୍ୟଯେ, ବର୍ଷାଦିନେ କେନ୍ଦୁଘାଟୀ ଗଁାର ଲୋକେ ମୁଖ୍ୟାଳୟଠାରୁ ବିଚ୍ଛିନ୍ନ ହୋଇ ଜଳବନ୍ଦୀ ଅବସ୍ଥାରେ ରହିବା କିଛି ନୂଆକଥା ନୁହେଁ। ବାଂଶପାଳ ବ୍ଲକ ଫୁଲଝର ପଞ୍ଚାୟତର ୧ନଂ ଓ ୨ନଂ ୱାର୍ଡକୁ ନେଇ କେନ୍ଦୁଘାଟି ଗ୍ରାମ ଗଠିତ। ଭୌଗୋଳିକ ଦୃଷ୍ଟି କୋଣରୁ କେନ୍ଦୁଘାଟି ଗ୍ରାମର ୨ପାର୍ଶ୍ୱକୁ ଘେରି ରହିଛି ବୈତରଣୀ ଏବଂ ମଣନ୍ଦା ନଦୀ। ବର୍ଷା ଦିନେ ବୈତରଣୀ ଓ ମଣନ୍ଦା ନଦୀ ଦୁଇଟିର ଜଳସ୍ତର ବୃଦ୍ଧି ପାଉଥିବାରୁ କେନ୍ଦୁଘାଟି ଗ୍ରାମ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡେ। ସେହି ସମୟରେ ସରକାରଙ୍କ ପିଡିଏସ୍ ସହିତ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ଗାଁକୁ ପହଞ୍ଚି ପାରେ ନାହିଁ। ସେଠାରେ ଥିବା ସ୍କୁଲ ଓ ଅଙ୍ଗନୱାଡି ବାଧ୍ୟ ହୋଇ ବନ୍ଦ କରାଯାଏ। ଏଠାକାର ଲୋକଙ୍କ ନିକଟକୁ ସ୍ବାସ୍ଥ୍ୟସେବା ପହଞ୍ଚି ପାରୁନଥିବାରୁ ବହୁ ଦୂର୍ଦ୍ଦଶାର ସମ୍ମୁଖୀନ ହେବାକୁ ପଡିଥାଏ। କେନ୍ଦୁଘାଟି ଗ୍ରାମର କାଶିଆ ଗ୍ରାମ ପଟକୁ ବୈତରଣୀ ନଦୀ ଉପରେ ପୋଲ ନିର୍ମାଣ ପାଇଁ ଗ୍ରାମବାସୀଙ୍କ ପକ୍ଷରୁ ବହୁ ବର୍ଷ ହେଲା ବାରମ୍ବାର ଦାବି ହୋଇ ଆସୁଥିଲେ ମଧ୍ୟ ପୋଲ ନିର୍ମାଣ ହେଉ ନ ଥିବା ଯୋଗୁଁ କେନ୍ଦୁଘାଟି ଗ୍ରାମବାସୀ ବର୍ଷ ବର୍ଷ ଧରି ଦୁଃଖ ଭୋଗୀ ଆସୁଛନ୍ତି। ତେଣୁ ଜିଲା ପ୍ରଶାସନ ତୁରନ୍ତ ପଦକ୍ଷେପ ଗ୍ରହଣ କରି ବୈତରଣୀ ନଦୀ ଉପରେ ପୋଲ ନିର୍ମାଣ କରିବାକୁ ଫୁଲଝର ଗ୍ରାମ ପଞ୍ଚାୟତ କେନ୍ଦୁଘାଟିର କିନାରୀ ନାଏକ, ସୁଲୋଚନା ଦେହୁରୀ, ସୁକାନ୍ତି ସେଠୀ ଓ ସୁଜୁନି ଦେହୁରୀ ପ୍ରମୁଖ ସୋମବାର ଜିଲାପାଳଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି।
