ଭୁବନେଶ୍ୱର,୧୬ା୯(ବ୍ୟୁରୋ) : କାର୍ର ଆଗ ସିଟ୍ରେ ୬ବର୍ଷ କିମ୍ବା ଏହାଠାରୁ କମ୍ ବର୍ଷ ବୟସର ପିଲାଙ୍କୁ ବସାଇ ନେବା ମନା। ଏପରିକି ସିଟ୍ ବେଲ୍ଟ ବାନ୍ଧି ନିଆଯିବା ମଧ୍ୟ ଠିକ୍ ନୁହେଁ। ଏହା ଶିଶୁଙ୍କ ପାଇଁ ବିପଦ ଆଣିପାରେ। ତେଣୁ ଏହାକୁ ଦଣ୍ଡନୀୟ ଭାବେ ବିଚାର କରାଯାଇପାରେ ବୋଲି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ଆର୍ଟିଓ ସୂଚନା ଆଧାରରେ କହିଛନ୍ତି।
ମିଳିଥିବା ସୂଚନାନୁସାରେ, ନୂଆ ମୋଟର ଯାନ ଆଇନ ଲାଗୁ ହେବା ପରେ ଲୋକଙ୍କ ମଧ୍ୟରେ ଛନକା ପଶିଛି। କାରଣ ଏଯାଏ ବହୁ ନିୟମ ବିଷୟରେ ଲୋକେ ଜାଣିନାହାନ୍ତି। ଏଥିପାଇଁ କମିଶନର ଷଡ଼ଙ୍ଗୀ ସୋସିଆଲ ମିଡିଆ ମାଧ୍ୟମରେ ଲୋକଙ୍କ ସହ ଯୋଡ଼ିହୋଇଛନ୍ତି। ନିକଟରେ ଜଣେ ବ୍ୟକ୍ତି କମିଶନରଙ୍କୁ ଟୁଇଟ୍ କରି କାର୍ରେ ଛୋଟ ଶିଶୁଙ୍କ ଯାତାୟାତ ସମ୍ପର୍କରେ ଜାଣିବାକୁ ଚାହିଁଥିଲେ। ଏ ସଂକ୍ରାନ୍ତରେ ଉତ୍ତର ରଖିବା ପାଇଁ କମିଶନରେଟ ପୋଲିସ ପକ୍ଷରୁ ଆର୍ଟିଓ-୧କୁ ଜଣାଇବାକୁ କୁହାଯାଇଥିଲା। ଆର୍ଟିଓ ପ୍ରଦୀପ ମହାନ୍ତି ଜଣାଇନ୍ତି ଯେ, କାର୍ର ଆଗ ସିଟ୍ରେ ୬ ବର୍ଷ କିମ୍ବା ଏହାଠାରୁ କମ୍ ବର୍ଷର ଶିଶୁଙ୍କୁ ସିଟ୍ବେଲ୍ଟ ବାନ୍ଧି କେହି ନେଇପାରିବେ ନାହିଁ। କାରଣ ଗାଡ଼ିଟି ହମ୍ସ କିମ୍ବା ଖାଲରେ ପଡ଼ିଗଲେ ପିଲାଟି ସିଟ୍ରୁ ବାହାରି ଯିବାର ସମ୍ଭାବନା ରହିଛି। ତେଣୁ ଶିଶୁଙ୍କୁ ଏଭଳି ନେବା ଦଣ୍ଡନୀୟ। କିନ୍ତୁ କାର ଆଗରେ ଜଣେ ବୟସ୍କ ବ୍ୟକ୍ତି ଏହି ବୟସର ଶିଶୁଙ୍କୁ ଧରି ନିଜେ ସିଟ୍ବେଲ୍ଟ ବାନ୍ଧି ନେଇପାରିବେ ବୋଲି ଆର୍ଟିଓ ମହାନ୍ତି କହିଛନ୍ତି।
କେବଳ ଏହି ଗୋଟିଏ ସମସ୍ୟା ନୁହେଁ, ସାଇବର ଅପରାଧ ହେଉ କିମ୍ବା ଡିଏଲ୍ ହଜିଯିବା କଥା ହେଉ ଅଥବା ଛୋଟବଡ଼ କୌଣସି ସମସ୍ୟା ହେଉ ପୋଲିସ କମିଶନର ନିଜ ଟୁଇଟ୍ ମାଧ୍ୟମରେ ସମାଧାନର ବାଟ ବତାଉଛନ୍ତି। ଯଦି କୌଣସି ବ୍ୟକ୍ତି ଏକ ଥାନାରୁ ନ୍ୟାୟ ପାଇପାରୁନାହାନ୍ତି, ସେ ଘଟଣା ସମ୍ପର୍କରେ କମିଶନରଙ୍କୁ ଜଣାଇଲେ ତୁରନ୍ତ ତଦାରଖ କରିବା ସହ କାର୍ଯ୍ୟାନୁଷ୍ଠାନ ପାଇଁ ଥାନା ଅଧିକାରୀଙ୍କୁ ନିର୍ଦ୍ଦେଶ ଦେଉଛନ୍ତି। ତେଣୁ ଟୁଇଟ୍ ମାଧ୍ୟମରେ ସମସ୍ୟା ଜଣାଇବାକୁ କମିଶନର ଷଡ଼ଙ୍ଗୀ ଜଣାଇଛନ୍ତି।
