ପୁରୀ ଅଫିସ,୨୨।୬: ସୁପ୍ରିମକୋର୍ଟଙ୍କ ରାୟ ଅନୁସାରେ ଚଳିତବର୍ଷ ବଡ଼ଦାଣ୍ଡରେ ଗଡ଼ିବ ନାହିଁ ରଥ। ସର୍ବୋଚ୍ଚ ଅଦାଲତଙ୍କ ଏହି ରାୟକୁ ରାଜ୍ୟ ସରକାର ସ୍ବାଗତ କରିଛନ୍ତି। ହେଲେ ଏହାକୁ ଗ୍ରହଣ କରିପାରୁ ନାହାନ୍ତି କୋଟି କୋଟି ଜଗନ୍ନାଥ ପ୍ରେମୀ। ସୁପ୍ରିମକୋର୍ଟଙ୍କ ରାୟର ପୁନର୍ବିଚାର କରିବା ପାଇଁ ଦାଖଲ ହୋଇଛି ଏକାଧିକ ଆବେଦନ। ଏପରି କି ଜଗଦ୍ଗୁରୁ ଶଙ୍କରାଚାର୍ଯ୍ୟ ମଧ୍ୟ ରାୟର ପରିବର୍ତ୍ତନ ସପକ୍ଷରେ ମତ ଦେଇଥିବାବେଳେ ଗଜପତି ମହାରାଜା ମଧ୍ୟ ରଥଯାତ୍ରା ବନ୍ଦ ନ କରିବାକୁ ଶନିବାର ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଜଣାଇଛନ୍ତି। ମଙ୍ଗଳବାର ରଥଯାତ୍ରା ଥିବାରୁ ମଝିରେ ସୋମବାର ଗୋଟିଏ ଦିନ। ସୁପ୍ରିମକୋର୍ଟରେ ହୋଇଥିବା ପୁନର୍ବିଚାର ଆବେଦନର ଶୁଣାଣି ସୋମବାର ହେବାକୁ ଧାର୍ଯ୍ୟ ମଧ୍ୟ ହୋଇଛି। ବିଚାରପତି ଏସ୍.ରବୀନ୍ଦ୍ର ଭଟ୍ଟ ଆବେଦନଗୁଡ଼ିକର ଶୁଣାଣି କରିବେ। ତେଣୁ କୋର୍ଟଙ୍କ ରାୟକୁ ସମସ୍ତଙ୍କ ଅପେକ୍ଷା। କିଛି ଚମତ୍କାର ଘଟିବା ଅପେକ୍ଷାରେ ରହିଛନ୍ତି କୋଟି କୋଟି ଭକ୍ତ ଓ ଜଗନ୍ନାଥପ୍ରେମୀ।
ମହାପ୍ରଭୁ ଶ୍ରୀଜଗନ୍ନାଥଙ୍କ ରଥଯାତ୍ରାକୁ ନେଇ ଏପର୍ଯ୍ୟନ୍ତ ଦ୍ୱନ୍ଦ୍ୱ ଦୂର ହୋଇନି। ଏବେ ବି ଘୋଷଯାତ୍ରାକୁ ନେଇ ଆଶା ଓ ଆଶଙ୍କାର ଲୁଚକାଳି ଖେଳ ଜାରି ରହିଛି। ମହାମାରୀ କରୋନା ପାଇଁ ଏଥର ରଥଯାତ୍ରା ହେବ ନାହିଁ ବୋଲି ସୁପ୍ରିମକୋର୍ଟ ଗତ ୧୮ ତାରିଖରେ ରାୟ ଦେଇଥିଲେ। ଏହି ରାୟକୁ ରାଜ୍ୟ ସରକାର ଚୂଡ଼ାନ୍ତ ବୋଲି ଗ୍ରହଣ କରି ନେଇଥିବାବେଳେ ପୁନଶ୍ଚ ଶ୍ରୀମନ୍ଦିର ଛତିଶା ନିଯୋଗ ଓ ପରିଚାଳନା କମିଟି ମିଳିତ ବୈଠକର ନିଷ୍ପତ୍ତି ପୁଣି ଆଶା ଉଜ୍ଜୀବିତ କରିଛି। ସୁପ୍ରିମ୍କୋର୍ଟରେ ଦାଖଲ ପିଟିଶନର ନିଷ୍ପତ୍ତି କ’ଣ ଆସୁଛି ସୋମବାରକୁ ଅପେକ୍ଷା କରିବାକୁ ପଡ଼ିବ ବୋଲି କମିଟି ଅଧ୍ୟକ୍ଷ ଗଜପତି ମହାରାଜା କହିଛନ୍ତି। ମୂଳପୀଠରେ କୌଣସି ପରିସ୍ଥିତିରେ ରଥଯାତ୍ରା ବନ୍ଦ ନ କରିବାକୁ ଗଜପତି ମୁଖ୍ୟମନ୍ତ୍ରୀଙ୍କ ଦେଇଥିବା ଚିଠିରେ ଉଲ୍ଲେଖ କରିଛନ୍ତି। ସେହିପରି ଶଙ୍କରାଚାର୍ଯ୍ୟ ମଧ୍ୟ ସୁପ୍ରିମକୋର୍ଟଙ୍କ ରାୟକୁ ନେଇ ଉଦ୍ବେଗ ପ୍ରକାଶ କରିଛନ୍ତି। ତେଣୁ ରଥଯାତ୍ରାକୁ ନେଇ ଭକ୍ତମହଲରେ ଆଶା ଉଜ୍ଜୀବିତ ହୋଇଛି। ଅପପକ୍ଷରେ ତିନିରଥ ମଧ୍ୟ ପ୍ରସ୍ତୁତ ହୋଇରହିଛି। ରବିବାର ରଥରେ କନା ପଡିବା ସହ ଅନ୍ୟାନ୍ୟ ଆନୁଷଙ୍ଗିକ କାମ ମଧ୍ୟ ଶେଷ ହୋଇଛି।
ପୁରୀ ସହର ବାସିନ୍ଦା ରାଜୀବ ପାତ୍ର କହିଛନ୍ତି, ମହାପ୍ରଭୁଙ୍କ ରଥଯାତ୍ରା ବନ୍ଦ ହେବ ଏହି କଥାକୁ କେବେ ବିଶ୍ୱାସ କରିପାରୁନି। ପିଲାଟି ଦିନରୁ ରଥଯାତ୍ରା ଦେଖିଆସୁଛି। ହେଲେ ଏଥର ଯଦି ମହାମାରୀ କରୋନା ବାଧକ ସାଜିଛି ତେବେ ବିନା ଭକ୍ତରେ ରଥଯାତ୍ରା କରାଯାଉ, ସମ୍ପୂର୍ଣ୍ଣ ବନ୍ଦ ନ ହେଉ। ସେମିତି ବି ହେବ। ମହାପ୍ରଭୁ ନିଶ୍ଚିତ ଶେଷ ମୁହୂର୍ତ୍ତରେ କିଛି ଚମତ୍କାରିତା କରିବେ ବୋଲି ବିଶ୍ୱାସ ରଖିଛନ୍ତି ରାଜୀବ। କେବଳ ରାଜୀବ ନୁହଁନ୍ତି, ପ୍ରାୟ ସମସ୍ତେ ରଥଯାତ୍ରାକୁ ନେଇ ସକାରାତ୍ମକ ଆଭିମୁଖ୍ୟ ରଖିଛନ୍ତି।
