ଓଟଓ୍ବା, ୨୮ା୫: କରୋନା ସଂକ୍ରମଣକୁ ନେଇ ସାରା ପୃଥିବୀରେ ଆତଙ୍କର ବାତାବରଣ ସୃଷ୍ଟି ହୋଇଛି। ଏହି ସଂକ୍ରମଣଠାରୁ କିଭଳି ଦୂରେଇ ରହିହେବ ଏବଂ ସଂକ୍ରମିତଙ୍କୁ ଶୀଘ୍ର ଚିହ୍ନଟ କରିହେବ ସେଥିନେଇ ଚିକିତ୍ସା ବିଜ୍ଞାନୀମାନେ ଗବେଷଣା ଜାରି ରଖିଛନ୍ତି। ସଂକ୍ରମଣରୁ ଦୂରେଇ ରହିବା ପାଇଁ ନିୟମିତ ନିର୍ଦ୍ଦିଷ୍ଟ ସମୟ ବ୍ୟବଧାନରେ ହାତ ଧୋଇବା, ମାସ୍କ୍୍ ପିନ୍ଧିବା, ସାମାଜିକ ଦୂରତା ବଜାୟ ରଖିବା ଉପରେ ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ମାର୍ଗଦର୍ଶିକା ଜାରି ହୋଇଛି। ବାହାରକୁ ବାହାରିବା ସମୟରେ ମାସ୍କ୍ ପିନ୍ଧିବା ଜରୁରୀ ବୋଲି ଏଥିରେ ଦର୍ଶାଯାଇଛି। ତେବେ କେଉଁ ପ୍ରକାରର ମାସ୍କ୍ କରୋନା ସଂକ୍ରମଣରୁ ଦୂରେଇ ରଖିବାକୁ ସକ୍ଷମ ହେବ ସେ ନେଇ କାନାଡ଼ାର ମାକମାଷ୍ଟର ବିଶ୍ୱବିଦ୍ୟାଳୟ ପକ୍ଷରୁ ହୋଇଥିବା ଏକ ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି। ରିପୋର୍ଟରେ ଉଲ୍ଲେଖ କରାଯାଇଛି ଯେ, ସୂତା କପଡ଼ାରେ ତିଆରି ମାସ୍କ୍(କଟନ ମାସ୍କ୍) କରୋନା ଭୂତାଣୁକୁ ରୋକିବାରେ ସକ୍ଷମ ହୋଇଥାଏ। ଏକାଧିକ ପରସ୍ତ ଥିବା କପଡ଼ା ମାସ୍କ୍ ବ୍ୟବହାର କଲେ କରୋନା ଭୂତାଣୁ ସହଜରେ ପାଟି ଅବା ନାକ ଦ୍ୱାରା ପ୍ରବେଶ କରିପାରି ନ ଥାଏ। ସଂକ୍ରମିତଙ୍କ ଛିଙ୍କ,କାଶ ଅଥବା କଥା କହିବା ଦ୍ୱାରା ତାଙ୍କଠାରୁ ୬ ମିଟର ଦୂରତା ମଧ୍ୟରେ ଘୁରି ବୁଲୁଥିବା କ୍ଷୁଦ୍ର ଜଳ କଣିକା ଯଦି କପଡ଼ା ମାସ୍କ୍ ପିନ୍ଧିଥିବା ସୁସ୍ଥ ଲୋକଙ୍କ ପାଖରେ ପହଞ୍ଚେ ତେବେ ତାହା କପଡ଼ାରେ ଲାଗି ରହିଥାଏ କିମ୍ବା ଖସି ପଡ଼ିଥାଏ। ଏଭଳି ମାସ୍କ୍ରେ ଏକାଧିକ ପରସ୍ତ ଥିବାରୁ ଭୂତାଣୁ ସହଜରେ ନାକ କି ପାଟି ନିକଟରେ ପହଞ୍ଚି ପାରି ନ ଥାଏ ବୋଲି ରିପୋର୍ଟରେ ଦର୍ଶାଯାଇଛି। ଏହି ରିପୋର୍ଟ ଆନାଲ୍ସ ଅଫ୍ ଇଣ୍ଟରନାଲ ମେଡ଼ିସିନ୍ ଜର୍ନାଲରେ ପ୍ରକାଶ ପାଇଛି। ତିନି ପରସ୍ତ କପଡ଼ାରେ ପ୍ରସ୍ତୁତ ମାସ୍କ୍ ଦ୍ୱାରା ୮୮ରୁ ୯୯ ପ୍ରତିଶତ ସୁଫଳ ମିଳିଥାଏ ବୋଲି ମାକମାଷ୍ଟର ବିଶ୍ୱବିଦ୍ୟାଳୟର ପ୍ରଫେସର କ୍ୟାଥେରାଇନ୍ କ୍ଲଜ୍ ସୂଚନା ଦେଇଛନ୍ତି। ତେବେ ସାର୍ସ-୨ ଭୂତାଣୁକୁ ରୋକିବାରେ ଏଭଳି ମାସ୍କ୍ କେତେଦୂର ଉପଯୋଗୀ ହେବ ସେ ନେଇ କୌଣସି ପ୍ରତ୍ୟକ୍ଷ ପ୍ରମାଣ ମିଳିନାହିଁ ବୋଲି ସେ କହିଛନ୍ତି। ସେହିପରି ବ୍ୟବସାୟିକ ଭାବେ ୪ ପରସ୍ତ କପଡ଼ାରେ ତିଆରି ହେଉଥିବା ମାସ୍କ୍ ୯୯ ପ୍ରତିଶତ ସୁଫଳ ପ୍ରଦାନ କରିଥାଏ। ଅପରପକ୍ଷରେ ମେଡିକାଲ ମାସ୍କ୍ରୁ ୯୬ରୁ୯୯ ପ୍ରତିଶତ ପର୍ଯ୍ୟନ୍ତ ସୁଫଳ ମିଳିପାରିଥାଏ ବୋଲି ରିପୋର୍ଟରେ ଦର୍ଶାଯାଇଛି। ଗୋଟିଏ ପରସ୍ତ କପଡ଼ାରେ ତିଆରି ହେଉଥିବା ମାସ୍କ୍ ୧୦ରୁ ୪୦ ପ୍ରତିଶତ ପର୍ଯ୍ୟନ୍ତ ସୁରକ୍ଷା ଦେଇଥାଏ। ସୂତା କପଡ଼ାରେ ତିଆରି ହୋଇଥିବା ୨ ପରସ୍ତ ମାସ୍କ୍ ଦ୍ୱାରା କରୋନା ଭୂତାଣୁ ସଂକ୍ରମଣ ରୋକିବାରେ ୯୦ ପ୍ରତିଶତ ପର୍ଯ୍ୟନ୍ତ ସଫଳତା ମିଳିଥାଏ। ତେଣୁ ମାସ୍କ୍ ତିଆରି ସମୟରେ ଅଧିକ ପରସ୍ତ ଉପରେ ଧ୍ୟାନ ଦେବାର ଆବଶ୍ୟକତା ରହିଥିବା ରିପୋର୍ଟରେ କୁହାଯାଇଛି। ମାସ୍କ୍ର ପରସ୍ତ ବଢ଼ିବା ସହିତ ସୁରକ୍ଷା ବ୍ୟବସ୍ଥା ମଧ୍ୟ ବଢ଼ିଥାଏ। କରୋନା ମହାମାରୀ ସଙ୍କଟରେ ଏଭଳି ମାସ୍କ୍ ବେଶ୍ ଉପଯୋଗୀ ବୋଲି କ୍ୟାଥେରାଇନ୍ କହିଛନ୍ତି।
