ବେଜିଂ,୩୦।୧(ପି.ଟି.)- ବହୁ ଚର୍ଚ୍ଚିତ କରୋନା ଭାଇରସ ପ୍ରଭାବିତ ଅଞ୍ଚଳରୁ ଆସିଥିବାର ଚାଇନାର ୪ଜଣ ମହିଳା ଫୁଟବଲର ଅଷ୍ଟ୍ରେଲିଆର ସିଡନୀରେ ଖେଳାଯିବାକୁ ଥିବା ଟୋକିଓ ଅଲିମ୍ପିକ୍ସ ମହିଳା ଫୁଟବଲ୍ କ୍ୱାଲିଫାଇଙ୍ଗ୍ ମ୍ୟାଚ୍ ଖେଳିବେ ନାହିଁ। ଚାଇନିଜ ଫୁଟବଲ ଆସୋସିଏଶନ (ସିଏଫ୍ଏ) ବୁଧବାର ଏ ନେଇ ସୂଚନା ଦେଇଛି। ଏହି ମହିଳା ଫୁଟବଲରଙ୍କ ମଧ୍ୟରେ ତାରକା ଷ୍ଟ୍ରାଇକର ଓ୍ବାଙ୍ଗ୍ ଶୁଆଙ୍ଗ୍ ସାମିଲ ରହିଛନ୍ତି। କରୋନା ଭାଇରସ ପ୍ରଭାବିତ ଉହାନ ସହରରେ ରହୁଥିବା ୩ଜଣ ଖେଳାଳି ହେଲେ ଓ୍ବାଙ୍ଗ୍ ଶୁଆଙ୍ଗ, ୟାଓ ଓ୍ବେଇ ଓ ଲିଓ ୟୁଏୟୁନ। ସେହିପରି ଲି ମେନ୍ଓ୍ବେନ୍ ଝେଜିଆଙ୍ଗ୍ ପ୍ରୋଭିନ୍ସରେ ରହୁଛନ୍ତି। ଏପିଡେମିକ୍ କଣ୍ଟ୍ରୋଲ ବା ମହାମାରୀ ନିୟନ୍ତ୍ରଣ ଚାଲୁ ରହିଥିବାରୁ ଏହି ଖେଳାଳିମାନେ ଅଷ୍ଟ୍ରେଲିଆରେ ଦଳସହ ସାମିଲ ହୋଇପାରିବେ ନାହିଁ ବୋଲି ସିଏଫ୍ଏ ତରଫରୁ କୁହାଯାଇଛି।
ଗତ ୨୩ ତାରିଖରୁ ଭାଇରସ୍ ପ୍ରଭାବିତ ଅଞ୍ଚଳକୁ ବାହ୍ୟଜଗତରୁ ବିଚ୍ଛିନ୍ନ କରାଯାଇଛି। ଫଳରେ ଲୋକମାନେ ଏହି ସ୍ଥାନରୁ ଯିବା ଆସିବା କରିପାରୁନାହାନ୍ତି। ଚାଇନାରେ କରୋନା ଭାଇରସ୍ କାରଣରୁ ଏପର୍ଯ୍ୟନ୍ତ ୧୩୨ଜଣ ଲୋକ ପ୍ରାଣ ହରାଇଛନ୍ତି। ତେବେ ଏହି ଭାଇରସ୍ରେ ୬,୦୦୦ ଲୋକ ସଂକ୍ରମିତ ହୋଇଛନ୍ତି। ଭାଇରସ ଓ ସଂକ୍ରମଣକୁ ନିୟନ୍ତ୍ରଣକୁ ଆଣିବାକୁ ଚାଇନା କର୍ତ୍ତୃପକ୍ଷ ବିଭିନ୍ନ ପ୍ରକାର ବ୍ୟବସ୍ଥା ଗ୍ରହଣ କରୁଛନ୍ତି।
ତାରକା ମହିଳା ଫୁଟବଲର ଓ୍ବାଙ୍ଗ କ୍ରମାଗତ ତୃତୀୟଥର ପାଇଁ ଚାଇନିଜ ଫିମେଲ ଫୁଟବଲର ଅଫ୍ ଦି ଇୟର ବିବେଚିତ ହୋଇଛନ୍ତି। ସେ ମଧ୍ୟ ଜଣାଶୁଣା କ୍ଲବ ପ୍ୟାରିସ ସେଣ୍ଟ ଜର୍ମାନ ତରଫରୁ ଖେଳୁଛନ୍ତି। ଚାଇନା ଦଳରେ ଓ୍ବାଙ୍ଗ୍ ଜଣେ ହାଇପ୍ରୋଫାଇଲ ଖେଳାଳି ରୂପେ ବିବେଚିତ ହେଉଛନ୍ତି। ସେହିପରି ମିଡ୍ ଫିଲ୍ଡର ୟାଓ ମଧ୍ୟ ନାମୀ ଫୁଟବଲ ଭାବେ ପରିଚିତ। ଅଷ୍ଟ୍ରେଲିଆ ଗସ୍ତ ପୂବରୁ ଚାଇନାର ସବୁ ୨୧ଜଣ ଖେଳାଳିଙ୍କର ଏହି ଭାଇରସ ଟେଷ୍ଟ ହୋଇଛି ଓ ସବୁର ଫଳାଫଳା ନେଗେଟିଭ୍ ଆସିଛି ବୋଲି ସିଏଫ୍ଏ ତରଫରୁ କୁହାଯାଇଛି। ବୁଧବାର ଚାଇନା ଦଳ ବ୍ରିସ୍ବେନ୍ରେ ପହଞ୍ଚିଛି ଓ ଆଗାମୀ ୨ ଦିନ ମଧ୍ୟରେ ଦଳ ସିଡନୀ ଯାତ୍ରା କରିବାର କାର୍ଯ୍ୟକ୍ରମ ରହିଛି।
