ପ୍ରାଣଘାତୀ କରୋନାକୁ ମୁକାବିଲା କରିବା ପାଇଁ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଇଛି। ଜନତା କର୍ଫ୍ୟୁଠାରୁ ଆରମ୍ଭ କରି ଲକ୍ଡାଉନ୍ ଘୋଷଣା କରାଯାଇଛି। ଜନସାଧାରଣ ବାହାରକୁ ନ ଆସି ଘରେ ରହିବାକୁ ପରାମର୍ଶ ଦିଆଯାଇଛି। ସାମାଜିକ ଦୂରତା ଉପରେ ଗୁରୁତ୍ୱ ଦିଆଯାଇଛି। ଏହାର ପ୍ରଭାବ ସମସ୍ତ ସହର ପରି ରାଉରକେଲାରେ ପଡିଛି। ତେବେ ଏହି ସହରରେ ରହୁଥିବା ରାସ୍ତାକଡ଼ର ମଣିଷଙ୍କ ଉପରେ ଏହି କଟକଣା ଦାଉ ସାଧିଛି। ଗରିବ,ଦୁଃଖୀ ଓ ନିରାଶ୍ରୟମାନେ କ’ଣ ଖାଇ ବଞ୍ଚତ୍ବେ ସେ ଚିନ୍ତା ସେମାନଙ୍କୁ ହିଁ ଘାରିଛି। ଇସ୍ପାତ୍ ସହରରେ ଅଟୋରିକ୍ସା ଓ ସାଧାରଣ ରିକ୍ସା ଚଳାଇ ଗୁଜୁରାଣ ମେଣ୍ଟାଉଥିବା ଲୋକମାନେ ଏବେ ମୁଣ୍ଡରେ ହାତ ଦେଇ ବସିଛନ୍ତି। କାମଧନ୍ଦା ଅଭାବରୁ ଦିନ ମଜୁରିଆମାନେ କିପରି ପରିବାର ପ୍ରତିପୋଷଣ କରିବେ ଚିନ୍ତା କରିପାରୁ ନାହାନ୍ତି। ସେମାନଙ୍କ ମୁଣ୍ଡରେ ବି ଚଡକ ପଡିଛି। ସେମାନେ ୨୧ଦିନ ଯାଏ କେମିତି ଘରେ ମୁହଁ ପୋତି ପଡି ରହିବେ ସେହି ଉତ୍ତର କାହା ପାଖରେ ନାହିଁ। ଏଭଳି ପରିସ୍ଥିତିରେ ଧାରଉଧାର କେହି ଦେବାକୁ ମଙ୍ଗୁ ନାହାନ୍ତି। ସରକାର ପିଡିଏସ୍ ସାମଗ୍ରୀ କେଉଁ ତାରିଖ ସୁଦ୍ଧା ପ୍ରଦାନ କରିବେ ସେ ନେଇ ନିର୍ଦ୍ଦିଷ୍ଟ ଭାବେ କିଛି ସୂଚନା ନାହିଁ। ଏମାନଙ୍କ ବ୍ୟତୀତ ବର୍ଜ୍ୟବସ୍ତୁ ସଂଗ୍ରହ କରି ପେଟ ପୋଷୁଥିବା ଲୋକେ ବି ହତାଶ ହୋଇଛନ୍ତି। ଫୁଟପାଥରେ ଠେଲା ରଖି ବ୍ୟବସାୟ କରୁଥିବା କ୍ଷୁଦ୍ର ବ୍ୟବସାୟୀ, ଚା, ପାନ, ଗୁପ୍ଚୁପ୍, ଚାଟ ଆଦି ବିକୁଥିବା ଦୋକାନୀଙ୍କ ଅବସ୍ଥା ଆହୁରି ସଙ୍କଟମୟ ହୋଇପଡିଛି। ଏହି ଦୋକାନୀମାନେ ଯାହ କିଛି ଟଙ୍କା ସଞ୍ଚୟ କରି ରଖିଥିଲେ ତାହା ବି ବଜାର ସାମଗ୍ରୀର ଚଢ଼ାଦର ଯୋଗୁ ସରିବାକୁ ବସିଛି। ବହୁ କଳ କାରଖାନାରେ ତାଲା ଝୁଲୁଛି। ଯଦି ଲକ୍ଡାଉନ ଅବଧି ୨୧ରୁ ଆଉ ଅଧିକ କିଛିଦିନ ବୃଦ୍ଧି ଘଟେ ପରିସ୍ଥିତି ଅସମ୍ଭାଳ ହେବ ବୋଲି ସାଧାରଣରେ ମତ ପ୍ରକାଶ ପାଇଛି। – ବସନ୍ତ କୁମାର ଧଳ
