ଫୁଲବାଣୀ ଅଫିସ, ୨୧ା୬- କନ୍ଧମାଳ ଭଳି ପଛୁଆ ଜିଲାକୁ ସାରା ଦେଶରେ ପରିଚିତ କରାଇଛନ୍ତି ଅଞ୍ଚଳର ଜଣେ ଝିଅ। ଏହି ଜିଲାର ଝିଅ କୌଣସି ଗୁଣରେ କମ୍ ନୁହନ୍ତି ବୋଲି ସେ ପ୍ରମାଣ କରି ଦେଖାଇଛନ୍ତି। ପ୍ରତିରକ୍ଷା କ୍ଷେତ୍ରରେ ଜିଲାରୁ ପ୍ରଥମ ଫ୍ଲାଇଂ ଅଫିସର ହୋଇ ଦେଶ, ରାଜ୍ୟ ଓ କନ୍ଧମାଳ ମାଟିକୁ ଗୌରବାନ୍ବିତ କରିଛନ୍ତି। ସେ ହେଲେ ଫୁଲବାଣୀ ସହର କେନ୍ଦୁପଦର ନାରାୟଣ ମହାନ୍ତି ଏବଂ ମିନତୀଙ୍କ ଝିଅ ସୁଶ୍ରୀ ସାଇପ୍ରଣିତା।
ସାଇପ୍ରଣିତା କନ୍ଧମାଳରୁ ପ୍ରାଥମିକ ଶିକ୍ଷା ପରେ ୨୦୧୭ରେ ଇନ୍ଦିରା ଗାନ୍ଧୀ ଅଟୋନୋମିକ ରିସର୍ଚ୍ଚ ସେଣ୍ଟରରେ ଯୋଗଦେଇ ପଦାର୍ଥ ବିଜ୍ଞାନ(ଫିଜିକ୍ସ)ରେ ପିଏଚ୍ଡି କରୁଥିଲେ। ପିଲାଦିନରୁ ବାୟୁସେନାରେ ଯୋଗଦେବାକୁ ଆଗ୍ରହ ଥିବାରୁ ଏହା ତାଙ୍କୁ ପ୍ରତିରକ୍ଷା କ୍ଷେତ୍ରକୁ ଫେରାଇ ଆଣିଥିଲା। ୨୦୧୯ ଜୁନ୍ରେ ସେ ବାୟୁସେନା ଏକାଡେମୀରେ ଯୋଗ ଦେଇଥିଲେ। ୨୦୨୦ ଜୁନ ୨୦ରେ ସେ ଏହି ଏକାଡେମିରୁ ଫ୍ଲାଇଙ୍ଗ୍ ଅଫିସର ଭାବେ ଯୋଗ୍ୟ ବିବେଚିତ ହୋଇ ମେଟ୍ରୋଲୋଜି ଅଫିସର ଭାବେ ଗ୍ବାଲିଅରରେ ଯୋଗ ଦେଇଛନ୍ତି। ତାଙ୍କୁ ଗ୍ବାଲିଅର ବାୟୁସେନାରେ ପୋଷ୍ଟିଂ କରାଯାଇଛି। ୩ମାସ ପାଇଁ ଉକ୍ତ ବିଭାଗରେ କୋଏମ୍ବାଟୁରରେ ଟ୍ରେନିଂ ପାଇଁ ନିର୍ଦ୍ଦେଶ ପାଇଛନ୍ତି। ସାଇପ୍ରଣିତାଙ୍କ ଜେଜେ ପ୍ରକାଶ ମହାନ୍ତି ସ୍ଥଳସେନାର ଅବସର ପ୍ରାପ୍ତ ନାଏକ ଓ ଦାଦା ପରିକ୍ଷିତ ମହାନ୍ତି ଜଣେ ମେଜର। ଦାଦାଙ୍କ ବ୍ୟକ୍ତିତ୍ୱ ସହ ନିଜର ଚେଷ୍ଟା ଓ ଅଧ୍ୟୟନ ପ୍ରତି ଥିବା ପ୍ରବଳ ଆଗ୍ରହ ତାଙ୍କୁ ଆଜି ଏହି ସ୍ତରରେ ପହଞ୍ଚାଇଛି।
