ଭୁବନେଶ୍ୱର,୮।୫(ବ୍ୟୁରୋ): ବିଭିନ୍ନ ସଂସ୍ଥା ପାଇଁ ରାଜ୍ୟ ସରକାର ଓ୍ବାର୍କିଂ ଆଓ୍ବାର ବଢ଼ାଇଛନ୍ତି। ଦୈନିକ ୮ ଘଣ୍ଟା ବଦଳରେ ଓ୍ବାର୍କିଂ ଆଓ୍ବାରକୁ ୧୨ ଘଣ୍ଟା କରିଛନ୍ତି। ଦୁଇଟି ସିଫ୍ଟରେ ଏହାକୁ କରାଯିବ। ଏଥିପାଇଁ ପାରିଶ୍ରମିକ ମଧ୍ୟ ଅଧିକ ମିଳିବ ବୋଲି ଶୁକ୍ରବାର ଗୀତଗୋବିନ୍ଦ ସଦନରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଓ ଲୋକସମ୍ପର୍କ ବିଭାଗ ସଚିବ ସଞ୍ଜୟ ସିଂହ ସୂଚନା ଦେଇଛନ୍ତି।
ସେ କହିଛନ୍ତି, ୨୨ ମାର୍ଚ୍ଚରେ ଜନତା କର୍ଫ୍ୟୁ ପରେ ରାଜ୍ୟ ସରକାର ୨୩ ମାର୍ଚ୍ଚରେ ଲକ୍ଡାଉନ୍ ଘୋଷଣା କରିଥିଲେ। ପରେ ୨୪ ମାର୍ଚ୍ଚରୁ ସର୍ବଭାରତୀୟସ୍ତରରେ ଲକ୍ଡାଉନ୍ କରାଯାଇଥିଲା। ୨୨ ମାର୍ଚ୍ଚରୁ ଏବେ ପର୍ଯ୍ୟନ୍ତ ରାଜ୍ୟରେ ଥିବା ବୃହତ୍ତ, ମଧ୍ୟମ ଏବଂ କ୍ଷୁଦ୍ର ବ୍ୟବସାୟ ପ୍ରତିଷ୍ଠାନଗୁଡ଼ିକରେ ଉତ୍ପାଦନ କମିଥିବା ଦେଖାଯାଇଛି। ଏହାକୁ ନେଇ ପ୍ରତିଷ୍ଠାନଗୁଡ଼ିକ ପକ୍ଷରୁ ସରକାରଙ୍କୁ କାମ କରିବା ସମୟସୀମାକୁ କୋହଳ କରିବା ପାଇଁ କୁହାଯାଇଥିଲା। ତେବେ ପୁଣିଥରେ ରାଜ୍ୟରେ ଅର୍ଥବ୍ୟବସ୍ଥା ସୁଧାରିବା ପାଇଁ ରାଜ୍ୟ ସରକାର ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଛନ୍ତି। ରାଜ୍ୟ ସରକାର ଶୁକ୍ରବାର ଏକ ବିଜ୍ଞପ୍ତି ଜରିଆରେ କାମ କରିବାର ସମୟସୀମାକୁ କୋହଳ କରିଛନ୍ତି। ପ୍ରଥମେ ବୟସ୍କ ଶ୍ରମଜୀବୀ ୮ ଘଣ୍ଟା ପର୍ଯ୍ୟନ୍ତ ଦିନକୁ ହିସାବରେ ୪୮ଘଣ୍ଟା ସପ୍ତାହକୁ କାମ କରୁଥିଲେ। ବର୍ତ୍ତମାନ ଏହାକୁ ସରକାର କୋହଳ କରି ଦିନକୁ ୧୨ ଘଣ୍ଟା କରାଯାଇଛି ଏବଂ ସପ୍ତାହକୁ ୭୨ ଘଣ୍ଟା କରାଯାଇଛି। ଗୋଟିଏ ସିଫ୍ଟ ୬ ଘଣ୍ଟାର ରହିଛି। ଏହାପରେ ଅଧଘଣ୍ଟା ବିରତି ଦିଆଯିବ। ଏହାଛଡ଼ା ମହିଳା ଶ୍ରମଜୀବୀମାନେ ରାତି ୭ଟା ପରଠାରୁ ସକାଳ ୬ଟା ପର୍ଯ୍ୟନ୍ତ ଯଦି ସ୍ବତନ୍ତ୍ର ପରମିଶନ ନାହିଁ ତେବେ କାମ କରିବେ ନାହିଁ। ଅଧିକ କାର୍ଯ୍ୟ ସମୟ ପାଇଁ ଅଧିକ ୪ ଘଣ୍ଟାର ଦରମା ମିଳିବ। ସପ୍ତାହରେ ଜଣେ ଅତି ବେଶି ୨୪ ଘଣ୍ଟାର ଓଭରଟାଇମ୍ ରହିପାରିବେ। ଏଥିରେ କୋଭିଡର ଗାଇଡଲାଇନ ପାଳନ ନେଇ ନଜର ରଖାଯିବ ବୋଲି ସେ ମଧ୍ୟ କହିଛନ୍ତି।
