ଭୁବନେଶ୍ୱର, ୫।୧୨(କ୍ରୀଡ଼ା ପ୍ରତିନିଧି)- ଓଡ଼ିଶା ଟେନିସ ପ୍ରିମିୟର ଲିଗ୍(ଓଟିପିଏଲ)ର ତୃତୀୟ ସଂସ୍କରଣ ବୁଧବାର କିଟ୍ ପରିସରରେ ଆରମ୍ଭ ହୋଇଛି। ରାଜ୍ୟପାଳ ପ୍ରଫେସର ଗଣେଶୀ ଲାଲ ମୁଖ୍ୟ ଅତିଥିଭାବେ ଯୋଗଦେଇ ପ୍ରତିଯୋଗିତାର ଶୁଭାରମ୍ଭ କରିଛନ୍ତି। ଅନ୍ୟ ଅତିଥିଙ୍କ ମଧ୍ୟରେ କ୍ରୀଡ଼ା ସଚିବ ବିଶାଲ ଦେବ, କିଟ୍ ଓ କିସ୍ର ପ୍ରୋ ଚାନ୍ସେଲର ପ୍ରଫେସର ସସ୍ମିତା ସାମନ୍ତ, କ୍ରୀଡ଼ା ନିର୍ଦ୍ଦେଶକ ଗଗନେନ୍ଦୁ ଦାଶ, ଜାତୀୟ ଚଳଚ୍ଚିତ୍ର ପୁରସ୍କାରପ୍ରାପ୍ତ ଅକ୍ଷୟ କୁମାର ପରିଜା ପ୍ରମୁଖ ଉଦ୍ଘାଟନୀ ଉତ୍ସବରେ ଉପସ୍ଥିତ ଥିଲେ। ଓଡ଼ିଶା ଟେନିସ ଆସୋସିଏଶନ ସ୍ବିକୃତିପ୍ରାପ୍ତ ଏହି ପ୍ରତିଯୋଗିତାରେ ଦେଶର ୩୨ ଶୀର୍ଷ ର଼୍ୟାଙ୍କପ୍ରାପ୍ତ ଖେଳାଳି ଏବଂ ୩୨ ଜୁନିୟର ଖେଳାଳି ଅଂଶଗ୍ରହଣ କରିଛନ୍ତି। ଲିଗ୍ ୫ ଦିନଧରି ଚାଲିବ। ଫର୍ମାଟ ଅନୁସାରେ ଖେଳାଳିମାନଙ୍କୁ ୮ଟି ଦଳରେ ବିଭକ୍ତ କରାଯାଇଛି। ଦଳ ଗୁଡ଼ିକର ନାମ ହେଲା ଭୁବନେଶ୍ୱର ଓ୍ବାରିୟର୍ସ, କଟକ କନ୍କ୍ୱରର୍ସ, ପୁରୀ ଓ୍ବେଭର୍ସ, କେନ୍ଦ୍ରାପଡ଼ା କଣ୍ଟେଣ୍ଡର୍ସ, ଯାଜପୁର ଶୁଟର୍ସ, ଭଦ୍ରକ ଭିକ୍ଟର୍ସ, କ୍ୟାପିଟାଲ କିଙ୍ଗ୍ସ ଓ କିଟ୍ କିଲର ବିଜ୍। ”୨୦୧୭ରେ ଏହି ପ୍ରତିଯୋଗିତା ପରୀକ୍ଷାମୂଳକଭାବେ ଆରମ୍ଭ ହୋଇଥିଲା। ଏଥିରେ ଅନେକ ଅନ୍ତର୍ଜାତୀୟ ଖେଳାଳି ଅଂଶଗ୍ରହଣ କରୁଥିବାରୁ ସ୍ଥାନୀୟ ଖେଳାଳିମାନେ ସେମାନଙ୍କ ସହ ଖେଳି ନିଶ୍ଚିତ ଅନେକ ଅଭିଜ୍ଞତା ହାସଲ କରିପାରିବେ। ଭାଗ ନେଉଥିବା ୩୨ ଜୁନିୟର ଖେଳାଳି ଅଭିଜ୍ଞଙ୍କ ସହ ଖେଳିବା ପାଇଁ ଭଲ ସୁଯୋଗ ପାଇବେ“ ବୋଲି ଟୁର୍ନାମେଣ୍ଟ ନିର୍ଦ୍ଦେଶକ ଦିଲୀପ ମହାନ୍ତି ପ୍ରକାଶ କରିଛନ୍ତି। ଦିଲ୍ଲୀ ଭିତ୍ତିକ ନୀଳାଚଳ ସ୍ପୋଟର୍ସ ଫାେଉଣ୍ଡଶନର ମାନସ ସନ୍ତାନ ଓଟିପିଏଲ ୮ ତାରିଖରେ ଶେଷ ହେବ।
