ଚେନ୍ନାଇ, ୩୧।୧୦- ସ୍ଥାନୀୟ ଜବାହାରଲାଲ ନେହରୁ ଷ୍ଟାଡିୟମରେ ବୁଧବାର ଅନୁଷ୍ଠିତ ଇଣ୍ଡିଆନ ସୁପର ଲିଗର ଏକାଦଶ ମ୍ୟାଚରେ ଘରୋଇ ଚେନ୍ନାଇନ ଏଫସିକୁ ୧-୦ ଗୋଲରେ ହରାଇ ଏଟିକେ ଏଫସି କ୍ରମାଗତ ଦ୍ୱିତୀୟ ବିଜୟ ହାସଲ କରିଛି l ବିଜୟୀ ଦଳ ପକ୍ଷରୁ ୪୮ତମ ମିନିଟରେ ଡେଭିଡ ୱିଲିୟମ୍ସ ଏକମାତ୍ର ଗୋଲଟି ସ୍କୋର କରିଥିଲେ l ପ୍ରବୀର ଦାସଙ୍କ କ୍ରସ ଉପରେ ଜାଭିୟର ହର୍ନାଣ୍ଡେଜ ମାରିଥିବା ଶଟ୍କୁ ଚେନ୍ନାଇନ ଗୋଲକିପର ବିଶାଳ କାଇଥ ଅଟକାଇବାକୁ ଚେଷ୍ଟା କରିଥିଲେ l ବଲ ରିବାଉଣ୍ଡ ହୋଇ ଫେରି ଆସୁଥିବା ବେଳେ ୱିଲିୟମ୍ସ ତାହାକୁ ନେଟ ଭିତରକୁ ପଠାଇ ଦେଇଥିଲେ l ହିରୋ ଇଣ୍ଡିଆନ ସୁପର ଲିଗରେ ଏହା ଥିଲା ୧୦୦୦ତମ ଗୋଲ l
ଏହି ବିଜୟ ସହିତ ଦୁଇ ଥରର ଚାମ୍ପିୟନ ଏଟିକେ ୩ଟି ମ୍ୟାଚରୁ ୬ ପଏଣ୍ଟ ପାଇ ଜାମସେଦପୁର ଏଫସି ସହିତ ଟେବୁଲ ଶୀର୍ଷରେ ପହଞ୍ଚତ୍ଛି l ଅନ୍ୟ ପକ୍ଷରେ ଚଳିତ ସିଜନରେ ପ୍ରଥମ ବିଜୟ ପାଇଁ ବ୍ୟଗ୍ର ଥିବା ୨ ଥର ଟାଇଟଲ ବିଜେତା ଚେନ୍ନାଇନ ଏଫସିର ଉଦ୍ୟମ ପୁନର୍ବାର ବ୍ୟର୍ଥ ହୋଇଛି l ଚେନ୍ନାଇନ ଏହା ପୂର୍ବରୁ ତାର ପ୍ରଥମ ମ୍ୟାଚରେ ଏଫସି ଗୋଆ ଠାରୁ ୦-୩ ଗୋଲରେ ହାରିବା ପରେ ମୁମ୍ବାଇ ସିଟି ଏଫସି ସହିତ ଦ୍ୱିତୀୟ ମ୍ୟାଚ ଗୋଲଶୁନ୍ୟ ଭାବେ ଡ୍ର କରିଥିଲା l ଅନ୍ୟ ପକ୍ଷରେ ଏଟିକେ ତାର ପୂର୍ବ ମ୍ୟାଚରେ ହାଇଦରାବାଦ ଏଫସିକୁ ୫-୦ ଗୋଲରେ ପରାସ୍ତ କରିଥିଲା l ବୁଧବାର ମ୍ୟାଚରେ ମାରୁତି ସୁଜୁକି ଲିମିଟଲେସ ପ୍ଲେୟାର ଅଫ ଦି ମ୍ୟାଚ ପୁରସ୍କାର ମାଇକେଲ ସୁସାଇରାଜଙ୍କୁ ଏବଂ ହିରୋ ଅଫ ଦି ମ୍ୟାଚ ପୁରସ୍କାର ଡେଭିଡ ୱିଲିୟମ୍ସଙ୍କୁ ପ୍ରଦାନ କରାଯାଇଥିଲା। ସେହିପରି ଲାଲିଆନଜୁଆଲା ଛାଙ୍ଗଟେ ଆଇସଏଲ ଇମର୍ଜିଂ ପ୍ଲେୟର ଅଫ ଦି ମ୍ୟାଚ ପୁରସ୍କାର ଲାଭ କରିଥିଲେ l
