ଓ୍ବାଶିଂଟନ,୬ା୬: କରୋନା ରୋଗୀଙ୍କୁ ଦିଆଯାଉଥିବା ମ୍ୟାଲେରିଆ ନିରୋଧୀ ଔଷଧ ହାଇଡ୍ରୋକ୍ସିକ୍ଲୋରୋକୁଇନ୍ (ଏଚ୍ସିକ୍ୟୁ) ବିରୋଧରେ ଏକପ୍ରକାର ଷଡ଼ଯନ୍ତ୍ର କରାଯାଇଥିବା ମନେହେଉଛି। କାରଣ ଏହି ଔଷଧ କରୋନା ରୋଗୀଙ୍କ ପାଇଁ ନିରାପଦ ନୁହେଁ ବୋଲି ମେଡିକାଲ ଜର୍ନାଲ ‘ଦ ଲାନ୍ସେଟ୍’ ପକ୍ଷରୁ ଏକ ଅଧ୍ୟୟନ ପ୍ରକାଶ ପାଇଥିଲ। ହେଲେ ଉକ୍ତ ଅଧ୍ୟୟନରେ ସାମିଲ ଥିବା ୪ଜଣଙ୍କ ମଧ୍ୟରୁ ୩ଜଣ ଗୁରୁବାର ସେମାନଙ୍କ ଦାବିକୁ ପ୍ରତ୍ୟାହାର କରିନେଇଛନ୍ତି। ଏକ ହେଲ୍ଥ କେୟାର କମ୍ପାନୀକୁ ସେମାନେ ଦାୟୀ କରିବା ସହ ଅଧ୍ୟୟନ ପାଇଁ କମ୍ପାନୀ ଡାଟା ଯୋଗାଇଥିବା ଦର୍ଶାଇଛନ୍ତି।
କରୋନାର ଉପଚାର ପାଇଁ ଠିକ୍ ଔଷଧ ଓ ପ୍ରତିଷେଧକ ଟିକା ସନ୍ଧାନ ଏବେ ବି ଜାରି ରହିଛି। ହେଲେ ରୋଗକୁ ସୀମିତ କରିବାରେ ହାଇଡ୍ରୋକ୍ସିକ୍ଲୋରୋକୁଇନ୍ ବିଶେଷ ଭାବେ ସହାୟକ ହେଉଥିବା ବହୁ ସ୍ବାସ୍ଥ୍ୟ ବିଶେଷଜ୍ଞ ଅନୁଭବ କରୁଛନ୍ତି। ଫଳରେ ଏହି ଔଷଧର ଚାହିଦା ସାରା ବିଶ୍ୱରେ ବୃଦ୍ଧି ପାଇଛି। ବିଶ୍ୱର ୭୦% ହାଇଡ୍ରୋକ୍ସିକ୍ଲୋରୋକୁଇନ୍ ଉତ୍ପାଦନ କରୁଥିବା ଭାରତ ଉପରେ ରପ୍ତାନି ପାଇଁ ଗତ ମାର୍ଚ୍ଚରେ ଚାପ ପଡ଼ିଥିଲା। ଏହାସହିତ ଦେଖିବାକୁ ମିଳିଥିଲା ରାଜନୈତିକ ଓ କୂଟନୈତିକ ଘଟଣାମାନ ସାଙ୍ଗକୁ ବାଦବିବାଦ। ପରବର୍ତ୍ତୀ ସମୟରେ ଏହି ଔଷଧକୁ ନେଇ ବିଶ୍ୱ ଦୁଇଭାଗରେ ବିଭକ୍ତ ହେବା ସହ ଦେଶଗୁଡ଼ିକ ଭିନ୍ନ ଭିନ୍ନ ନୀତି ଆପଣାଇଥିବା ଦେଖିବାକୁ ମିଳିଛି। ଅନେକ ଦେଶ ଏହାର ବ୍ୟବହାର ନିଷେଧ କରିଥିବାବେଳେ ଆଉ କେତେକ ଦେଶ ପ୍ରୋତ୍ସାହନ ଦେଇ ଚାଲିଛନ୍ତି। ସେହିପରି କେତେକ ଦେଶ କ୍ଲିନିକାଲ୍ ପରୀକ୍ଷଣରେ ଏହି ଔଷଧ ବ୍ୟବହାରକୁ ସୀମିତ ରଖିଛନ୍ତି। ତେବେ କେତେକ ଦେଶ ଏଚ୍ସିକ୍ୟୁ ବିରୋଧ କରିବା ପଛର ବଡ଼ କାରଣ ହେଉଛି ଲାନ୍ସେଟ୍ରେ ଗତ ମେ ୨୨ରେ ପ୍ରକାଶିତ ଅଧ୍ୟୟନ ରିପୋର୍ଟ। ସେଥିରେ ଉଲ୍ଲେଖ ଥିଲା ଯେ, ଦୁଇଟି ଔଷଧ ‘ହାଇଡ୍ରୋକ୍ସିକ୍ଲୋରୋକୁଇନ୍’ ଓ ‘କ୍ଲୋରୋକୁଇନ୍’ କରୋନା ରୋଗୀଙ୍କ କୌଣସି ଉପକାର କରିପାରୁନାହିଁ। ବରଂ ଏହାଦ୍ୱାରା ହୃଦ୍ ସମସ୍ୟା ସୃଷ୍ଟି ହୋଇ ରୋଗୀଙ୍କ ମୃତ୍ୟୁ ଆଶଙ୍କା ବଢ଼ାଉଛି। ଏହାପରେ ବିଶ୍ୱ ସ୍ବାସ୍ଥ୍ୟ ସଂଗଠନ(ଡବ୍ଲ୍ୟୁଏଚ୍ଓ) କରୋନା ଚିକିତ୍ସାରେ ହାଇଡ୍ରୋକ୍ସିକ୍ଲୋରୋକୁଇନ୍ର ବ୍ୟବହାର ସମ୍ପର୍କିତ କ୍ଲିନିକାଲ ପରୀକ୍ଷଣକୁ ସ୍ଥଗିତ କରିଥିଲା। ବହୁ ବିଶେଷଜ୍ଞ ଅଧ୍ୟୟନ ପଦ୍ଧତି ଉପରେ ପ୍ରଶ୍ନ ଉଠାଇ ରୋଗୀଙ୍କ ଚିକିତ୍ସାରେ ଏଚ୍ସିକ୍ୟୁର ଉପାଦେୟତା ଥିବା କହିଥିଲେ। କିନ୍ତୁ ତାହା ଅନେକ ଦେଶ ଉପରେ ପ୍ରଭାବ ପକାଇ ନ ଥିଲା। ଫଳସ୍ବରୂପ ସେହି ଦେଶଗୁଡ଼ିକରେ କରୋନା ରୋଗୀଙ୍କୁ ଏହି ଔଷଧ ଦିଆଯିବା ଏବଂ ତାହାର କ୍ଲିନିକାଲ ପରୀକ୍ଷଣ ବନ୍ଦ ହୋଇଯାଇଥିଲା। ଏବେ ଘଟଣାକ୍ରମ ଭିନ୍ନମୋଡ଼ ନେଇଛି। ୨ ଦିନ ତଳେ ଡବ୍ଲ୍ୟୁଏଚ୍ଓ ଏଚ୍ସିକ୍ୟୁର ସୁରକ୍ଷା ସମୀକ୍ଷା କରି ତାହାର କ୍ଲିନିକାଲ ପରୀକ୍ଷଣ ପୁନଃ ଆରମ୍ଭ କରିବାକୁ କହିଥିଲା। ଗୁରୁବାର ୩ ଅଧ୍ୟୟନକାରୀ ମଧ୍ୟ ଏଚ୍ସିକ୍ୟୁର ସୁରକ୍ଷାକୁ ନେଇ କରିଥିବା ଆଶଙ୍କାରୁ ଓହରିଯାଇଛନ୍ତି।
ଉକ୍ତ ଅଧ୍ୟୟନର ନେତୃତ୍ୱ ନେଇଥିବା ହାର୍ଭାର୍ଡ ବିଶ୍ୱବିଦ୍ୟାଳୟର ପ୍ରଫେସର ମନଦୀପ ମେହେରାଙ୍କ ସହ ତାଙ୍କ ସହଯୋଗୀ ଜୁରିଚ୍ ୟୁନିଭର୍ସିିଟି ହସ୍ପିଟାଲର ଫ୍ରାଙ୍କ୍ ରୁଶିଟ୍ଜକା ଏବଂ ଆମେରିକାର ଉଟା ବିଶ୍ୱବିଦ୍ୟାଳୟର ପ୍ରଫେସର ଅମିତ୍ ପଟେଲ କହିଛନ୍ତି ଯେ, ସେମାନେ ତୃତୀୟ ପକ୍ଷ ଦ୍ୱାରା ଡାଟାର ସମୀକ୍ଷା କରିବାକୁ ଚେଷ୍ଟା କରିଥିଲେ। କିନ୍ତୁ ଡାଟା ଯୋଗାଇଥିବା ଶିକାଗୋର ହେଲ୍ଥ କେୟାର ଆନାଲିଟିକ୍ସ ସଂସ୍ଥା ‘ସୁର୍ଗିସ୍ଫେର’ ସମୀକ୍ଷକମାନଙ୍କୁ ସହଯୋଗ କରିବାକୁ ମନା କରିଦେଇଥିଲା। ଫଳରେ ସେମାନେ ପାଇଥିବା ଡାଟା ଉପରେ ଭରସା କରିବା ଉଚିତ ହେବନାହିଁ। ତେଣୁ ସେମାନେ ଅଧ୍ୟୟନ ରିପୋର୍ଟକୁ ପ୍ରତ୍ୟାହାର କରିନେଇଥିବା କହିଛନ୍ତି।
