ହିନ୍ଦୁ ଶାସ୍ତ୍ର ‘ଗୀତା’ ଅନ୍ୟକୁ ଠିକ୍ ମାର୍ଗ ଦେଖାଇବା ଭଳି କୋଲକାତାର ଗୀତା ରାଓତ ମଧ୍ୟ ଅସହାୟ ଶିଶୁମାନଙ୍କୁ ଶିକ୍ଷାର ବାଟ ଦେଖାଉଛନ୍ତି। ସେ କୋଲକାତା ଷ୍ଟେଶନ ନିକଟରେ ରହୁଥିବା ଗରିବ ଅସହାୟ ପିଲାମାନଙ୍କୁ ମାଗଣାରେ ଶିକ୍ଷା ଦେବା ସହ ସେମାନଙ୍କ ପାଇଁ ଦିନକୁ ଦୁଇଓଳା ଖାଇବାର ବ୍ୟବସ୍ଥା କରିଛନ୍ତି। ଗୀତା ଏଭଳି ପିଲାମାନଙ୍କ ସହ ପିଲାଦିନରୁ ଜଡ଼ିତ। ସେ ଷ୍ଟେଶନ ଦେଇ ସ୍କୁଲକୁ ଯିବା ସମୟରେ ଭୋକରେ ଭିକ୍ଷା ମାଗୁଥିବା ପିଲାମାନଙ୍କୁ ଦେଖନ୍ତି। ସେ ସବୁଦିନ ସ୍କୁଲକୁ ନେଉଥିବା ଟିଫିନ ସେମାନଙ୍କୁ ଖାଇବାକୁ ଦେଉଥିଲେ। ଏପରିକି କୌଣସି ଦିନ ସେମାନଙ୍କୁ ଟିଫିନ ନ ଖୁଆଇଲେ ଦୁଃଖିତ ହେଉଥିଲେ। ସେବେଠାରୁ ସେମାନଙ୍କ ପାଇଁ କିଛି କରିବାର ସ୍ବପ୍ନ ଦେଖିଥିଲେ ଗୀତା। ସ୍କୁଲ ଶିକ୍ଷା ପରେ ସେ କୋଲକାତା ଷ୍ଟେଶନ ନିକଟରେ କେତେଜଣ ପିଲାଙ୍କୁ ମାଗଣାରେ ପଢ଼ାଇବା ଆରମ୍ଭ କଲେ। ଏହା ଦେଖି ତାଙ୍କ ନିକଟରେ ଅନେକ ଅଦସହାୟ ପିଲା ପହଞ୍ଚତ୍ଥିଲେ ଓ ସେ ସେମାନଙ୍କୁ ମଧ୍ୟ ପଢ଼ାଇବା ଆରମ୍ଭ କରିଦେଲେ। ଗୀତାଙ୍କ ଏହି କାର୍ଯ୍ୟ ଦେଖି କୋଲକାତାର ବ୍ୟବସାୟୀ କିଶୋର ଜୟସ୍ବାଲ ଏକ ଜାଗା ଦେଲେ ଓ ସେଠାରେ ସ୍କୁଲ ପ୍ରତିଷ୍ଠା ହେଲା। ପରେ ଦୁହିଁଙ୍କ ଉଦ୍ୟମରେ ସ୍କୁଲରେ ଏବେ ୧୫୦ ପିଲା ପଢୁଛନ୍ତି। ସେଠାରେ ପିଲାମାନେ ପଢ଼ିବା ସହ ଦୁଇ ବକତ ଖାଇବାକୁ ପାଉଛନ୍ତି। ଗୀତା ଏଥିପାଇଁ ଟିୟର୍ସ (ଟୁ ଏଡୁକେଟ ଆଣ୍ଡ୍ ରିଗେନ୍ ସ୍ମାଇଲ)ନାମକ ସଂସ୍ଥା ଖୋଲି ତା’ ମାଧ୍ୟମରେ ପରିଚାଳନା କରୁଛନ୍ତି।
