ନିଜ ଜୀବନର ଅନୁଭବ ବହୁ ସମୟରେ ଅନ୍ୟମାନଙ୍କ ସେବା ଲାଗି ପ୍ରେରଣା ଯୋଗାଇଥାଏ, ଯାହା ଘଟିଛି କର୍ନାଟକର ମଞ୍ଜୁଳାଙ୍କ କ୍ଷେତ୍ରରେ। ୧୬ ବର୍ଷ ବୟସରେ ଅନିଚ୍ଛା ସତ୍ତ୍ୱେ ଗାଁର ଜଣେ ଯୁବକଙ୍କ ସହ ତାଙ୍କର ବିବାହ କରିଦିଆଯାଇଥିଲା ଓ ୧୯ ବର୍ଷ ବୟସରେ ତାଙ୍କୁ ତାଙ୍କ ପରିବାରର ଜଣେ ସଦସ୍ୟ ଦେହଜୀବୀ ହେବା ଲାଗି ବାଧ୍ୟ କରିଥିଲେ। ଏହି ବାଟରେ ଯାଇ ସେ ଦେହଜୀବୀର ଜୀବନ ଯନ୍ତ୍ରଣା ଅନୁଭବ କରିଥିଲେ। ଏବେ ତାଙ୍କର ବୟସ ୩୭ ଓ ସେ ଜଣେ ପାରାଲିଗାଲ ସେଚ୍ଛାସେବୀ ଭାବେ ଦେହଜୀବୀଙ୍କ କଲ୍ୟାଣ ପାଇଁ କାର୍ଯ୍ୟକାରୀ ହେଉଥିବା ଅନେକ ଜିଲା, ରାଜ୍ୟ ତଥା ଜାତୀୟ ସ୍ତରର ସରକାରୀ ନେଟଓ୍ବର୍କ ଏବଂ ଏନ୍ଜିଓଗୁଡ଼ିକରେ କାମ କରୁଛନ୍ତି। ଦେହଜୀବୀଙ୍କ ଜୀବନ ଜୀବିକା ଓ ସାମାଜିକ ସୁରକ୍ଷା ସକାଶେ ଲଢ଼େଇ କରୁଛନ୍ତି। ଭୋଟର ଆଇଡିଠାରୁ ଆରମ୍ଭକରି ଆଧାର ଏବଂ ଅନ୍ୟ ପ୍ରମାଣପତ୍ର ସବୁ ପାଇବାରେ ସହଯୋଗ କରୁଛନ୍ତି ଏବଂ ଏବେ ସୁଦ୍ଧା ସେ ୫୦୦ ଦେହଜୀବୀଙ୍କୁ ସାହାଯ୍ୟ କରିସାରିଲେଣି। କେବଳ ଏତିକି ନୁହେଁ, ଭାରତରେ ଆନ୍ଧ୍ରପ୍ରଦେଶ ପରେ ଅଧିକ ସଂଖ୍ୟକ ଦେହଜୀବୀ ଥିବା କର୍ନାଟକରେ ବିଭିନ୍ନ ଯୋଜନାରେ ଅନେକଙ୍କୁ ଋଣ କରାଇଦେଇ ସଶକ୍ତ କରିପାରିଛନ୍ତି।
