ସ୍ବାଧୀନତାର ଦୀର୍ଘ ବର୍ଷ ପରେ ଭାରତରେ ଜଳସେଚନର ଆବଶ୍ୟକ ଲକ୍ଷ୍ୟ ହାସଲ ହୋଇପାରିନାହିଁ। ବହୁ ଅଞ୍ଚଳରେ ଫସଲରେ ପାଣି ମଡ଼ାଇବା ଲାଗି ଚାଷୀମାନେ ବିଦ୍ୟୁତଚାଳିତ ପାଣିପମ୍ପ ଉପରେ ନିଭର୍ର କରୁଛନ୍ତି। ଏଥିରେ ବି ବିଦ୍ୟୁତ ସମସ୍ୟା ଦେଖାଯାଉଛି। ଏହି ସମସ୍ୟାକୁ ଦୂରକରି ଚାଷୀମାନଙ୍କୁ ଲାଭ ଦେବା ଲାଗି ଝାଡ଼ଖଣ୍ଡରେ ଜୋହାର ପ୍ରୋଜେକ୍ଟ ଦ୍ୱାରା ସୋଲାର ପମ୍ପ ଫିଟ ହୋଇଥିବା ସାଇକେଲ ଚାଷୀମାନଙ୍କର ପ୍ରିୟ ହୋଇପାରିଛି। ୫୦ଟି ସାଇକେଲରେ ସୋଲାର ପ୍ୟାନେଲ ସହ ୦.୫ ଏଚପିର ପାଣିପମ୍ପ ଫିଟ୍ କରାଯାଇଛି। ପ୍ୟାନେଲରୁ ଉପତ୍ାଦିତ ସୌରଶକ୍ତିରେ ଏହି ପମ୍ପ ଚାଲୁଛି। ଘଣ୍ଟାକୁ ଡିଜେଲ ପମ୍ପ୍ରେ ୧୦୦ ଟଙ୍କା ଖର୍ଚ୍ଚ ହେଉଥିବାବେଳେ ଏଥିରେ ଖର୍ଚ୍ଚ କରିବାକୁ ପଡୁଛି ମାତ୍ର ୪୦ ଟଙ୍କା। ଏହାଦ୍ୱାରା ରାଜ୍ୟରେ ୬୦,୦୦୦ କୃଷକ ଉପକୃତ ହୋଇପାରୁଛନ୍ତି। କୃଷକମାନେ କୃଷିରୁ ଯେତିକି ରୋଜଗାର କରୁଥିଲେ ଏବେ ତା’ଠାରୁ ଅଧିକ ପାଉଛନ୍ତି। ଜମିରେ ଗୋଟିଏ ଫସଲ ବଦଳରେ ତିନି ତିନିଟା ଫସଲ କରିବାକୁ ସକ୍ଷମ ହୋଇଛନ୍ତି। ଏଭଳି ଜଳସେଚନର ସୁବିଧା ପାଇ ବହୁ ଗାଁରେ କୃଷକମାନେ କମ୍ୟୁନିଟି ଫାର୍ମିଂ ମଧ୍ୟ କରୁଛନ୍ତି। ଜୋହାର ପ୍ରୋଜେକ୍ଟ ସୌରଶକ୍ତି ଚାଳିତ ପାଣି ପମ୍ପ ଫିଟ କରାଯାଇଥିବା ୧୩୦୦ ସାଇକେଲ ଯୋଗାଇ ଦେବାର ଲକ୍ଷ୍ୟ ରଖି ଏବେ ସୁଦ୍ଧା ୫୦ଟି କାର୍ଯ୍ୟକାରୀ କରି ସାରିଛି। ଏହି ସାଇକେଲକୁ ସହଜରେ ବିଭିନ୍ନ ସ୍ଥାନକୁ ନିଆଯାଇ ପାରୁଛି।
