ଦୈନନ୍ଦିନ ଜୀବନରେ ପ୍ଲାଷ୍ଟିକ୍ ବର୍ଜନ କରିବା ଲାଗି ଆମେ ଉଦ୍ୟମ ଜାରି ରଖିଛୁ। କିନ୍ତୁ ଗୋଟିଏକୁ ଆମେ ଛାଡ଼ିପାରୁନୁ ତାହା ହେଉଛି ପ୍ଲାଷ୍ଟିକ୍ ମୁଠା ଝାଡୁ। ଏହି ଝାଡୁ ଅଦରକାରୀ ହୋଇଗଲେ ମୁଠା ସହ ତାହାକୁ ଫିଙ୍ଗି ଦେଉ । ଆକଳନରୁ ଜଣାପଡ଼ିଛି ଯେ, ପ୍ରାୟ ୪୦,୦୦୦ ମେଟ୍ରିକ ଟନ୍ ପ୍ଲାଷ୍ଟିିକ୍ ଝାଡୁ ମୁଠା ତିଆରି କରିବାରେ ବ୍ୟବହାର କରାଯାଏ ଓ ଶେଷରେ ତାହା ବାହାରେ ପଡି ରହି ପରିବେଶକୁ ପ୍ରଦୂଷିତ କରେ। ଏଭଳି ପ୍ଲାଷ୍ଟିକ୍ ବ୍ୟବହାର ଦୂର କରିବା ପାଇଁ ତ୍ରିପୁରାରେ ଅବସ୍ଥାପିତ ୨୦୧୦ ବ୍ୟାଚ୍ର ଆଇଏଫ୍ଏସ ଅଧିକାରୀ ପ୍ରସାଦ ରାଓ ଏକ ନୂଆ ଉପାୟ ବାହାର କରିଛନ୍ତି, ଯାହାଦ୍ୱାରା ପ୍ଲାଷ୍ଟିକ୍ ବ୍ୟବହାର ଦୂର ହେବା ସହ ପରିବେଶକୁ ବି ଉପକାର ହୋଇପାରିବ। ଝାଡୁ ମୁଠା ପାଇଁ ରାଓ ଓ ତାଙ୍କ ସାଥୀମାନେ ପ୍ଲାଷ୍ଟିକ୍ ବଦଳରେ ବାଉଁଶ ମୁଠା ଲଗାଉଛନ୍ତି। ଏହି ମୁଠା ହାଲ୍କା ଓ ଜଙ୍ଗଲରେ ଶୀଘ୍ର ବଢୁଥିବା ଏକ ପ୍ରକାର ବାଉଁଶରୁ ପ୍ରସ୍ତୁତ କରାଯାଉଛି। ଏହା ଆମ ଦେଶରେ ସହଜରେ ଉପଲବ୍ଧ ଓ ଖର୍ଚ୍ଚ ବି ଅଧିକ ନୁହେଁ। ଲୋକମାନେ ଏହାକୁ ସହଜରେ ବ୍ୟବହାର କରିପାରିବେ ବୋଲି କହନ୍ତି ରାଓ। ବନ ଧନ ବିକାଶ କାର୍ଯ୍ୟକ୍ରମ ଜରିଆରେ ସେ ଏଭଳି ଝାଡୁ ତିଆରି କରୁଛନ୍ତି। ୭ ମାସ ତଳେ ଆରମ୍ଭ କରିଥିବା ଏହି ଯୋଜନାରେ ପାଖାପାଖି ୧ ହଜାର ଆଦିବାସୀ ପରିବାରକୁ କାମ ଯୋଗାଇ ଦେଇଛନ୍ତି। ଚଳିତ ବର୍ଷ ଏହି ଯୋଜନାରେ ୪ ଲକ୍ଷ ଝାଡୁ ଓ ଆସନ୍ତା ବର୍ଷ ଏହାଠାରୁ ୧୦ ଗୁଣ ଅଧିକ ଝାଡୁ ତିଆରି କରିବାର ଲକ୍ଷ୍ୟ ରଖିଛନ୍ତି । ପ୍ଲାଷ୍ଟିକ ମୁଠା ଝାଡୁ ମୂଲ୍ୟଠାରୁ ଏହା ବହୁତ ଶସ୍ତା ହେବ ବୋଲି କହନ୍ତି ରାଓ।
