କାଠ ନୁହେଁ, ବିଭିନ୍ନ ଉଦ୍ଭିଦ ଅବଶେଷ ତଥା ଶିଳ୍ପ ବର୍ଜ୍ୟବସ୍ତୁରୁ କାଗଜ ପ୍ରସ୍ତୁତ କରୁଛନ୍ତି ମହାରାଷ୍ଟ୍ରର କାବ୍ୟା ମାଡାପ୍ପା। କୋର୍ଗରେ କାବ୍ୟାଙ୍କ ଜନ୍ମ। ବେଙ୍ଗାଲୁରୁର ସେଣ୍ଟ୍ ଜୋଶେଫ୍ କଲେଜରୁ ବାଣିଜ୍ୟରେ ସ୍ନାତକ ଡିଗ୍ରୀ ହାସଲ କରିବା ପରେ ଏକ ବ୍ୟାଙ୍କରେ କାମ କରୁଥିଲେ। ପରେ କୋର୍ଗ ଫେରିଆସି ପରିବେଶ ସୁରକ୍ଷା ପ୍ରତି ମନ ବଳାଇ ୨୦୧୮ରେ ‘ବ୍ଲୁକ୍ୟାଟ୍ ପେପର’ ଷ୍ଟାର୍ଟଅପ୍ ଆରମ୍ଭ କରିଥିଲେ। ବିକଶିତ ଜ୍ଞାନ କୌଶଳକୁ ଆଧାର କରି ଓ ଗବେଷକମାନଙ୍କ ପରାମର୍ଶ ନେଇ ସେ କାଗଜ ତିଆରି କରୁଛନ୍ତି। କାଗଜ ପ୍ରସ୍ତୁତ ଲାଗି ତାଙ୍କୁ ଗୋଟିଏ ହେଲେ ବି ଗଛ କାଟିବାକୁ ପଡୁନି। କୃଷି ଓ ଶିଳ୍ପ ବର୍ଜ୍ୟବସ୍ତୁରୁ ଏହି କାଗଜ ତିଆରି କରୁଛନ୍ତି କାବ୍ୟା। କପା ଓ ରାଶିଗଛର ଅବଶେଷ, ଲେମନ୍ଗ୍ରାସ୍, ମୁଲ୍ବେରୀ, ନଡ଼ା, କଫି ଚୋପା, କଦଳୀ ଗଛ ଗଣ୍ଡି, ନଡ଼ିଆ କତା ଏପରି କି ହାତୀ ମଳ ବ୍ୟବହାର କରାଯାଉଛି। ଏହା ଯୋଗୁ ମାସକୁ ୩୦ ଟନ୍ କାଠ ଓ ଦିନକୁ ଅତି କମ୍ରେ ୫୫,୦୦୦ ଲିଟର ପାଣି ବଞ୍ଚାଯାଇପାରୁଛିି। ‘ବ୍ଲୁକ୍ୟାଟ୍ ପେପର’ ପ୍ରତି ମାସରେ ୧୦୦ ଜଣ କୃଷକ ଓ ୫ଟି ଶିଳ୍ପସଂସ୍ଥାରୁ ପ୍ରାୟ ୨୦ ଟନ୍ ବର୍ଜ୍ୟବସ୍ତୁ ସଂଗ୍ରହ କରୁଛନ୍ତି। ବେଙ୍ଗାଲୁରୁର ପିନାୟେରେ ୨୦ ହଜାର ବର୍ଗଫୁଟ୍ ଜାଗାରେ ଏହି ଫ୍ୟାକ୍ଟ୍ରି ଚାଲିଛି। ଚାଷୀମାନଙ୍କ ଠାରୁ ବର୍ଜ୍ୟବସ୍ତୁ କିଣିବା ଦ୍ୱାରା ସେମାନେ ମଧ୍ୟ ଲାଭ ପାଉଛନ୍ତି। କାଠରୁ କାଗଜ ପ୍ରସ୍ତୁତ କରିବା ଲାଗି ପ୍ରତିବର୍ଷ ୩.୩ ମିଲିୟନ ହେକ୍ଟର ଜଙ୍ଗଲ ଧ୍ୱଂସ କରାଯାଏ। ଏହା ବନ୍ୟଜୀବ, ବନବାସୀଙ୍କ ଜୀବନ ଓ ପରିବେଶକୁ ପ୍ରଭାବିତ କରେ। ଏଣୁ ଏହି ଉପାୟରେ କାଗଜ ପ୍ରସ୍ତୁତ କରି ସାରା ଦେଶରେ ଜଙ୍ଗଲ ଧ୍ୱଂସ ରୋକିବା ତାଙ୍କର ଲକ୍ଷ୍ୟ ବୋଲି କହନ୍ତି ୪୧ ବର୍ଷୀୟା କାବ୍ୟା।
