ସମାଜରେ ଖୁବ୍ କମ୍ ଲୋକ ଅଛନ୍ତି ଯେଉଁମାନେ ଚାକିରି କରିବା ସହ ନିଜକୁ ସମାଜ ସେବାରେ ନିୟୋଜିତ କରିଥାନ୍ତି। ଏମାନଙ୍କ ମଧ୍ୟରୁ ରାଜସ୍ଥାନର କନଷ୍ଟେବଳ ଧର୍ମବୀର ଜାଖଡ ଜଣେ। ସେ ଚୁରୁଠାରୁ ୪ କିମି ଦୂର ଗଜସାର ହନୁମାନଗଡି ବସ୍ତିରେ ୨୦୧୬ରେ ଆରମ୍ଭ କରିଥିବା ଏକ ନନ୍ଫର୍ମାଲ ସ୍କୁଲ୍ ଗରିବ ପିଲାମାନଙ୍କୁ ଶିକ୍ଷାର ବାଟ ଦେଖାଉଛି। ୩୫ ବର୍ଷୀୟ ଜାଖଡ ଏହି ସ୍କୁଲ୍ର ନାମ ରଖିଛନ୍ତି ‘ଆପ୍ନି ପାଠଶାଳା’। ଏଠାରେ ପ୍ରଥମରୁ ପଞ୍ଚମ ଶ୍ରେଣୀ ଯାଏ ପିଲା ପଢୁଛନ୍ତି। କିନ୍ତୁ ଷଷ୍ଠରୁ ଊର୍ଦ୍ଧ୍ୱ ଶ୍ରେଣୀର ପିଲାଙ୍କ ପାଇଁ ଏକ୍ସଟ୍ରା କ୍ଲାସ୍ କରାଯାଉଛି। ଜାଖଡ ବସ୍ତି ତଥା ଆଖପାଖ ଗାଁରେ ରହୁଥିବା ଗରିବ ପରିବାରର ପିଲାମାନେ ଯେଉଁମାନେ ପାଠ ଛାଡି ଭିକ୍ଷା ମାଗୁଛନ୍ତି, ଶିଶୁ ଶ୍ରମିକ ଭାବେ କାର୍ଯ୍ୟ କରୁଛନ୍ତି ସେମାନଙ୍କୁ ଉଦ୍ଧାର କରି ପୁଣି ସ୍କୁଲ୍କୁ ପଠାଉଛନ୍ତି କିମ୍ବା ଆପ୍ନି ପାଠଶାଳାକୁ ଆଣୁଛନ୍ତି। ଏଭଳି ୫୦୦ ପିଲାଙ୍କୁ ସେ ପଢାଉଛନ୍ତି। ଜାଖଡ ଜଣେ ଶିକ୍ଷକ ହେବା ପାଇଁ ଚାହଁୁଥିଲେ। କିନ୍ତୁ ପରିବାରର ଆର୍ଥିକ ଅବସ୍ଥା ସ୍ବଚ୍ଛଳ ନ ଥିବାରୁ ସେ ଚାକିରି କରିଥିଲେ। କନ୍ଷ୍ଟେବଳ ଚାକିରି କରି ବସ୍ତିରେ ଏକ ଛୋଟ ଘରେ ଆପ୍ନି ପାଠଶାଳା ଆରମ୍ଭ କରି ପିଲାମାନଙ୍କୁ ପଢାଇବା ଆରମ୍ଭ କରିଥିଲେ। ତାଙ୍କ ସୀମିତ ଆୟରେ ପରିବାର ଚଳାଇ ଓ ପିଲାମାନଙ୍କ ଲାଗି ସ୍କୁଲ୍ ଘର କରିବା ତାଙ୍କ ପାଇଁ କଷ୍ଟକର ଥିଲା । ଏଠାରେ ନିୟମିତ ମଧ୍ୟାହ୍ନରେ ପିଲାମାନଙ୍କ ପାଇଁ ଖାଦ୍ୟ ବ୍ୟବସ୍ଥା କରାଯାଉଛି। ଏଥପାଇଁ ଏହି ଏନ୍ଜିଓ ସମେତ ଅନ୍ୟ ବ୍ୟକ୍ତିମାନେ ବି ସାହାଯ୍ୟ ଦେଉଛନ୍ତି।
