ସମାଜରେ ହିନ୍ଦୁ ଓ ମୁସଲମାନ ଏକାଠି ବିଭିନ୍ନ ପର୍ବ ପାଳନ କରୁଥିବାର ଦୃଷ୍ଟାନ୍ତ ରହିଥିବାବେଳେ ବିହାରର ଏକ ଗାଁ ଏଥିରୁ ବାଦ୍ପଡିନି। ଗାଁର ନାମ ବଥୁଆ ବୁଜୁର୍ଗ। ସମସ୍ତିପୁର ଜିଲା ଅନ୍ତର୍ଗତ ସରାୟରଞ୍ଜନ ବ୍ଲକ୍ର ଏହି ଗାଁ ଛଟ୍ ଅବସରରେ ଧର୍ମର ପାଚେରିକୁ ଭାଙ୍ଗିଦେଇ ସଦ୍ଭାବନାର ବାର୍ତ୍ତା ଦେଇଛନ୍ତି। ଏଠାରେ ମୁସଲମାନଙ୍କର ଛଟ୍ ପ୍ରତି ଅଗାଧ ଶ୍ରଦ୍ଧା ରହିଛି ଓ ସେମାନେ ହିନ୍ଦୁମାନଙ୍କ ସହ ଏକାଠି ଏହାକୁ ପାଳନ କରୁଛନ୍ତି। ବଥୁଆ ବୁଜୁର୍ଗରେ ଏହି ପରମ୍ପରା ଶହ ଶହ ବର୍ଷ ଧରି ଚଳିଆସୁଛି। ପ୍ରଥମେ ଗାଁରେ ରହୁଥିବା ତିନୋଟି ମୁସଲମାନ ପରିବାର ଏହି ବ୍ରତ ଆରମ୍ଭ କରିଥିଲେ। ଏବେ ସେମାନଙ୍କ ପରିବାର ସଂଖ୍ୟା ୧୫ରେ ପହଞ୍ଚିଲାଣି। ଉକ୍ତ ଗାଁରେ ଥିବା ଏକ ପୁଷ୍କରିଣୀ ଘାଟରେ ଉଭୟ ହିନ୍ଦୁ ଓ ମୁସଲମାନ ସମୁଦାୟର ମହିଳାମାନେ ଏକାଠି ସୂର୍ଯ୍ୟଦେବଙ୍କ ପୂଜା କରିଥାନ୍ତି। କେବଳ ଏତିକି ନୁହେଁ ସ୍ଥାନୀୟ ପଞ୍ଚାୟତ ଓ ତା’ ପାଖ ପଞ୍ଚାୟତର ମୁସଲମାନମାନେ ଏମାନଙ୍କ ସହ ଏହି ପୁଷ୍କରିଣୀ କୂଳରେ ଛଟ୍ ପାଳନ କରୁଛନ୍ତି। ଉଭୟ ସମ୍ପ୍ରଦାୟର ଲୋକେ ପେସାରେ ବୁଣାକାର ଏବଂ ସେମାନଙ୍କ ମଧ୍ୟରେ ସମ୍ପର୍କ ଭଲ ଥିବାରୁ ଛଟ୍ ପ୍ରତି ମୁସଲମାନମାନେ ଆକୃଷ୍ଟ ହୋଇଛନ୍ତି। ଛଟ୍ ପାଳନ କରିବା ଦ୍ୱାରା କେତେଜଣ ମୁସଲମାନଙ୍କର ମନସ୍କାମନା ପୂର୍ଣ୍ଣ ହେବାପରେ ଏହାପ୍ରତି ସେମାନଙ୍କର ଗଭୀର ବିଶ୍ୱାସ ଆସିଛି। ଆସ୍ଥା ଓ ଶ୍ରଦ୍ଧାର ସହ ଏହି ପର୍ବ ପାଳନ କରିବା ଲାଗି ପ୍ରେରଣା ମିଳିଛି ବୋଲି କୁହନ୍ତି ମୁସଲମାନ ମହିଳାମାନେ।
