ଭଦ୍ରକ ଅଫିସ,୨୨।୯ – ଭଦ୍ରକ ସହରକୁ ସ୍ମାର୍ଟସିଟି କରାଯିବା ପାଇଁ ମୁଖ୍ୟରାସ୍ତାଗୁଡ଼ିକୁ ଜବରଦଖଲମୁକ୍ତ ଲାଗି ଉଦ୍ୟମ କରାଯାଇଛି। ଗତ ଜୁନ୍ ଶେଷ ସପ୍ତାହରେ ମହତାବ ଛକଠାରୁ ଅପର୍ତ୍ତିବିନ୍ଧା ଷ୍ଟେଟ୍ବ୍ୟାଙ୍କ ଛକ ପର୍ଯ୍ୟନ୍ତ ରାସ୍ତାର ଉଭୟପାର୍ଶ୍ୱକୁ ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ କରାଯାଇଥିଲା। ସେହିପରି ଅପର୍ତ୍ତିବିନ୍ଧା ଷ୍ଟେଟ୍ବ୍ୟାଙ୍କ ଛକଠାରୁ ଘୋଷରା ବଜାର ପର୍ଯ୍ୟନ୍ତ ଏକ ପାଖ ମଧ୍ୟ ଜବରଦଖଲ ହଟାଯାଇଥିଲା। ଏତିକିରେ ପ୍ରଶାସନ ଉଚ୍ଛେଦ ପ୍ରକ୍ରିୟା ସାମୟିକ ଭାବେ ବନ୍ଦ କରିଥିଲା। ଉଚ୍ଛେଦ ହେବାର ୩ ମାସ ବିତିଯାଇଥିଲେ ମଧ୍ୟ ଏଯାଏ ଉଭୟପାର୍ଶ୍ୱର ଡ୍ରେନ ନିର୍ମାଣ କାର୍ଯ୍ୟ ସରିନାହିଁ। ଅନ୍ୟପକ୍ଷେ ଉଚ୍ଛେଦ ପରେ ଜବରଦଖଲ କରି ଷ୍ଟେଟବ୍ୟାଙ୍କ ଛକ ସମ୍ମୁଖରେ ୨୧ ଡିସିମିଲ ସରକାରୀ ଜାଗାରେ କେତେକ ମୁଷ୍ଟିମେୟ ବ୍ୟକ୍ତି ବେଆଇନ ଭାବେ ମାର୍କେଟ୍ କମ୍ପ୍ଲେକ୍ସ ରାତାରାତି ନିର୍ମାଣ କରୁଥିଲେ। ପ୍ରଶାସନ ଏହାକୁ ଜାଣି ଅଜଣା ଭଳି ପରୋକ୍ଷରେ ସମର୍ଥନ କରାଯାଉଥିବା ଅଭିଯୋଗ ହୋଇଥିଲା। କଳା ପାଲ ଟାଙ୍ଗି ନିର୍ମାଣ କାର୍ଯ୍ୟ ଚାଲୁଥିଲେ ମଧ୍ୟ କୌଣସି ପ୍ରଶାସନିକ ଅଧିକାରୀ କିଭଳି ଦେଖିପାରିଲେ ନାହିଁ ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା। ଚଳିତ ମାସରେ ଉଚ୍ଛେଦ ଦୋକାନୀମାନଙ୍କ ମଧ୍ୟରୁ କେତେକ ଏ ସମ୍ପର୍କରେ ହାଇକୋର୍ଟରେ ଜନସ୍ବାର୍ଥ ମାମଲା ରୁଜୁ କରିଥିଲେ। ନିକଟରେ ଉକ୍ତ ସରକାରୀ ଜାଗାରେ ନିର୍ମାଣାଧୀନ ମାର୍କେଟ୍ କମ୍ପ୍ଲେକ୍ସ ବନ୍ଦ କରିବା ପାଇଁ କୋର୍ଟ ଆଦେଶନାମା ଜାରି କରିଛନ୍ତି। ଏହି ମାମଲାରେ ଜିଲାପାଳ ତୁରନ୍ତ ପଦକ୍ଷେପ ନିଅନ୍ତୁ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି। ଶୁକ୍ରବାର ଭଦ୍ରକ ତହସିଲଦାର ଉକ୍ତ ସ୍ଥାନରେ ଏକ ସୂଚନା ଫଳକ ଲଗାଇ କାର୍ଯ୍ୟ ବନ୍ଦ କରିଛନ୍ତି। ଏଥିସହ ସରକାରୀ ଖାତାକୁ ଉକ୍ତ ଜାଗା ନିଆଗଲା ବୋଲି ସର୍ବସାଧାରଣକୁ ଅବଗତ କରାଇଛନ୍ତି।
ଶନିବାର କୋର୍ଟଙ୍କ କପି ସରକାରୀ ଭାବେ ଜିଲା ପ୍ରଶାସନ ନିକଟରେ ପହଞ୍ଚିଛି। ଏତେଦିନ ଧରି ପ୍ରଶାସନ କିଭଳି ଚୁପ୍ ରହିଥିଲା ବୋଲି ଏଠାରେ ଦୀର୍ଘବର୍ଷ ଧରି ଦୋକାନ କରି ଦାନା ପାଉଥିବା ବ୍ୟବସାୟୀ ଓ ଶ୍ରମିକ ସଙ୍ଗଠନ ନେତା ଦିବ୍ୟସିଂହ ନାୟକ ସମାଲୋଚନା କରି କହିଛନ୍ତି। ସହର ସମ୍ପ୍ରସାରଣ ଏବଂ ରାସ୍ତାଘାଟ ଚଉଡ଼ା ଆଳରେ ପ୍ରଶାସନ ଗରିବ ବ୍ୟବସାୟୀଙ୍କ ଦୋକାନ ଘର ଭାଙ୍ଗି ସେମାନଙ୍କୁ ବେସାହାରା କରିଦେଇଛନ୍ତି। ଏପରିସ୍ଥଳେ ଜବରଦଖଲ ଉଚ୍ଛେଦ ସ୍ଥାନରେ ଏତେ ବଡ ମାର୍କେଟ୍ କମ୍ପ୍ଲେକ୍ସ କରିବା ପାଇଁ କିଭଳି ସୁଯୋଗ ଦିଆଗଲା ବୋଲି ବ୍ୟବସାୟୀ ଅରୁଣ ବାରିକ କହିଛନ୍ତି। ଉଲ୍ଲେଖନୀୟ ଯେ, ଉଚ୍ଛେଦ ବ୍ୟବସାୟୀଙ୍କ ମଧ୍ୟରୁ ଜଣେ ହେଲେ କାହାରିକୁ ଜିଲା ପ୍ରଶାସନ ଥଇଥାନ କରିପାରି ନାହିଁ।
