ଭୁବନେଶ୍ୱର,୨୯।୧ (ବ୍ୟୁରୋ):ପଦୋନ୍ନତି ପାଇବାକୁ ଆଶା ରଖିଥିବା କର୍ମଚାରୀମାନଙ୍କର ମଙ୍ଗଳବାର ଠାରୁ ପଦୋନ୍ନତି ଅଦାଲତରେ ଶୁଣାଣି ଆରମ୍ଭ ହୋଇଛି। ପୂର୍ବ ଘୋଷଣା ମୁତାବକ ୬ଟି ସ୍ଥାନରେ ଆବେଦନଗୁଡ଼ିକର ଶୁଣାଣି ହୋଇଥିଲା। ପ୍ରଥମ ଦିବସରେ ୪୦୨ ଆବଦେନର ଶୁଣାଣି କରାଯାଇଛି। ଏନେଇ ଆବଶ୍ୟକ ପଦକ୍ଷେପ ନେବାକୁ ସମ୍ପୃକ୍ତ ବିଭାଗଗୁଡିକୁ ନିର୍ଦ୍ଦେଶ ଦିଆଯାଇଛି।
ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ଶୁଣାଣି କରିଥିବା ବେଳେ ଉନ୍ନୟନ କମିଶନର ସୁରେଶ ଚନ୍ଦ୍ର ମହାପାତ୍ର ଗୋପବନ୍ଧୁ ଏକାଡେମୀ ସମ୍ମିଳନୀ କକ୍ଷ, କୃଷି ଉତ୍ପାଦନ କମିଶନର ପ୍ରଦୀପ୍ତ ମହାପାତ୍ର କୃଷିଭବନ ସମ୍ମିଳନୀ କକ୍ଷ, ଅତିରିକ୍ତ ମୁଖ୍ୟ ଶାସନ ସଚିବ ଆର.କେ. ଶର୍ମା କଳିଙ୍ଗ ଷ୍ଟାଡିୟମ କନଫରେନ୍ସ ହଲ୍, ଗ୍ରାମ୍ୟ ଉନ୍ନୟନ ବିଭାଗ ସଚିବ ପ୍ରଦୀପ କୁମାର ଜେନା ଏସ୍ଆଇଆରଡି କନଫରେନ୍ସ ହଲ୍, ଜଙ୍ଗଲ ଓ ପରିବେଶ ବିଭାଗ ସଚିବ ମୋନା ଶର୍ମା ଇଡ୍କୋ ପଞ୍ଚମ ମହଲା କନ୍ଫରେନ୍ସ ହଲ୍ରେ ଶୁଣାଣି କରିଥିଲେ।
ମିଳିଥିବା ସୂଚନା ଅନୁଯାୟୀ ମୁଖ୍ୟ ଶାସନ ସଚିବ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଏବଂ ଯୋଜନା ଓ ସଂଯୋଜନ ବିଭାଗର ୧୧୭ଟି ମାମଲାର ଶୁଣାଣି କରିଥିବା ବେଳେ ଉନ୍ନୟନ କମିଶନର ଉଚ୍ଚଶିକ୍ଷା ଏବଂ ବିଜ୍ଞାନ ଓ ବୈଷୟିକ ବିଭାଗର ୧୦୧, କୃଷି ଉତ୍ପାଦନ କମିଶନର ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ଏବଂ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗର ୩୦, ଅତିରିକ୍ତ ମୁଖ୍ୟ ଶାସନ ସଚିବ ଆର.କେ ଶର୍ମା ମହିଳା ଓ ଶିଶୁ ବିକାଶ ବିଭାଗ ଏବଂ ଅର୍ଥ ବିଭାଗର ୫୦, ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା କୃଷି, କୃଷକ ସଶକ୍ତୀକରଣ ଏବଂ ସଂସଦୀୟ ବ୍ୟାପାର ବିଭାଗର ୩୯ ଏବଂ ଜଙ୍ଗଲ ଓ ପରିବେଶ ବିଭାଗ ସଚିବ ମୋନା ଶର୍ମା ପଞ୍ଚାୟତିରାଜ ଓ ପାନୀୟ ଜଳ ଯୋଗାଣ ଏବଂ ଆଇନ ବିଭାଗର ୬୫ଟି ଆବେଦନର ଶୁଣାଣି କରିଛନ୍ତି।
ପ୍ରଥମ ପର୍ଯ୍ୟାୟର ଅବଶିଷ୍ଟ ଦୁଇଦିନ ଚଳିତ ମାସ ୨୯ ଓ ଫେବୃୟାରୀ ୩ରେ ଅନୁଷ୍ଠିତ ହେବ। ଅଦାଲତର ସ୍ଥାନ ଓ ସମୟ ସମାନ ରହିବ। ବୁଧବାର ଗ୍ରାମ୍ୟ ଉନ୍ନୟନ, ଇସ୍ପାତ ଓ ଖଣି, ସ୍କୁଲ ଓ ଗଣଶିକ୍ଷା, କ୍ରୀଡ଼ା ଓ ଯୁବସେବା, ଶ୍ରମ, ଜଳ ସମ୍ପଦ, ବାଣିଜ୍ୟ ଓ ପରିବହନ, ଶକ୍ତି, ହସ୍ତତନ୍ତ ଓ ବୟନ ଶିଳ୍ପ, ସ୍ବାସ୍ଥ୍ୟ ଓ ପରିବାର କଲ୍ୟାଣ, ଏସ୍ସି,ଏସ୍ଟି ଉନ୍ନୟନ, ନଗର ଓ ଗୃହ ଉନ୍ନୟନ, ବୈଦ୍ୟୁତିକ ଓ ସୂଚନା ପ୍ରଯୁକ୍ତିବିଦ୍ୟା ଆଦି ବିଭାଗର ଶୁଣାଣି ହେବ। ନିର୍ଦ୍ଧାରିତ ସମୟରେ ଆବେଦନକାରୀମାନେ ଉପସ୍ଥିତ ରହି ନିଜ ପକ୍ଷ ରଖିବାକୁ ସାଧାରଣ ପ୍ରଶାସନ ବିଭାଗର ସ୍ବତନ୍ତ୍ର ଶାସନ ସଚିବ ଗଣେଶ ପାତ୍ର କହିଛନ୍ତି।
ଅଦାଲତ ପରେ ଖବରଦାତାମାନଙ୍କର ପ୍ରଶ୍ନର ଉତ୍ତର ଦେଇ ମୁଖ୍ୟ ଶାସନ ସଚିବ କହିଛନ୍ତି, ମଙ୍ଗଳବାର ବିଭିନ୍ନ ଅଦାଲତରେ ୪୦୨ ଜଣ ସରକାରୀ କର୍ମଚାରୀ ପଞ୍ଜୀକୃତ ହୋଇଥିଲେ। ଅଦାଲତଗୁଡିକରେ ସମସ୍ତ ଦରଖାସ୍ତର ଶୁଣାଣି କରାଯାଇ ଆବଶ୍ୟକ ନିର୍ଦ୍ଦେଶନାମା ଦିଆଯାଇଛି। ସମ୍ପୃକ୍ତ ବିଭାଗଗୁଡିକ ନିର୍ଦ୍ଦେଶାନୁଯାୟୀ ଖୁବ୍ଶୀଘ୍ର ପଦକ୍ଷେପ ନେବେ। ଏପରି ଅଦାଲତ ପ୍ରଶାସନିକ ସଂସ୍କାର ଦିଗରେ ଏକ ବଳିଷ୍ଠ ପଦକ୍ଷେପ ବୋଲି ମୁଖ୍ୟ ଶାସନ ସଚିବ କହିଛନ୍ତି। ଏହାଦ୍ୱାରା ବିଭିନ୍ନ ଅଦାଲତରେ ଥିବା ମକଦ୍ଦମା ସଂଖ୍ୟା ହ୍ରାସ ପାଇବ। ସରକାରୀ କର୍ମଚାରୀମାନଙ୍କୁ ସେମାନଙ୍କର ନ୍ୟାୟୋଚିତ ପ୍ରାପ୍ୟ ମିଳି ପାରିବ। ଏହି ପ୍ରକ୍ରିୟା ସହ ଜଡିତ ବରିଷ୍ଠ ଅଧିକାରୀଙ୍କ ସହ ଏକ ଅନୁଶୀଳନାତ୍ମକ ଆଲୋଚନା କରାଯିବ। ସେଥିରୁ ପ୍ରାପ୍ୟ ନିଷ୍କର୍ଷକୁ ଆଗାମୀ ଦିନରେ ପ୍ରଶାସନିକ ବ୍ୟବସ୍ଥାରେ କାର୍ଯ୍ୟକାରୀ କରାଯିବ ବୋଲି ମୁଖ୍ୟ ଶାସନ ସଚିବ କହିଛନ୍ତି।
