ଚଣ୍ଡିଖୋଲ,୪ା୧୦(ଡି.ଏନ୍.ଏ.): ରାଜ୍ୟରେ ଥିବା ସମସ୍ତ ଆରଟିଓ(ରିଜିଓନାଲ ଟ୍ରାନ୍ସପୋର୍ଟ ଅଫିସ) କାର୍ଯ୍ୟାଳୟକୁ ଦଲାଲ ମୁକ୍ତ କରିବା ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ଏହି କ୍ରମରେ ଆର୍ଟିଓ କାର୍ଯ୍ୟାଳୟ ଚତୁଃପାର୍ଶ୍ୱରେ ଦଲାଲମାନଙ୍କ ଦ୍ୱାରା ପ୍ରତିଷ୍ଠା କରାଯାଇଥିବା ଚାଳିଆ ଘର ଉଚ୍ଛେଦ କରାଯିବା ସହ ଦଲାଲ ମୁକ୍ତ କରିବା ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ଏହାକୁ ନେଇ ଯାଜପୁର ଜିଲା ପ୍ରଶାସନ ତତ୍ପର ହୋଇଉଠିଛି। ଗୁରୁବାର ଯାଜପୁର ଜିଲାପାଳ ରଞ୍ଜନ କୁମାର ଦାସ ଓ ଏସ୍ପି ଚରଣ ସିଂ ମିନାଙ୍କ ଉପସ୍ଥିତିରେ ଚଣ୍ଡିଖୋଲ ଆରଟିଓ କାର୍ଯ୍ୟାଳୟ ଚତୁଃପାର୍ଶ୍ୱରୁ ଦଲାଲମାନଙ୍କର ଅସ୍ଥାୟୀ ଘରଗୁଡ଼ିକୁ ଭଙ୍ଗା ଯାଇଛି। ଏପରିକି ଆରଟିଓ କାର୍ଯ୍ୟାଳୟ ସମ୍ମୁଖରେ ଜବରଦଖଲ କରିଥିବା ଛୋଟ ଛୋଟ ଦୋକାନୀଙ୍କ କ୍ୟାବିନ ଓ ଅସ୍ଥାୟୀ ଘରଗୁଡ଼ିକୁ ମଧ୍ୟ ଉଚ୍ଛେଦ କରାଯାଇଛି। କାର୍ଯ୍ୟାଳୟଠାରୁ ୨ଶହ ମିଟର ପର୍ଯ୍ୟନ୍ତ ଗଢି ଉଠିଥିବା ବେଆଇନ ଜବରଦଖଲକୁ ଜେସିବି ସହାୟତାରେ ଭଙ୍ଗା ଯାଇଥିଲା। ଏହି ଉଚ୍ଛେଦ ବେଳେ ଜିଲାପାଳଓ ଏସ୍ପିଙ୍କ ସହ ଉପ-ଜିଲାପାଳ ନାରାୟଣ ଚନ୍ଦ୍ର ଧଳ, ବଡ଼ଚଣା ଥାନା ଅଧିକାରୀ ଦୀପକ କୁମାର ଜେନାଙ୍କ ସମେତ ଏକ ପ୍ଲାଟୁନ ପୋଲିସ ବାହିନୀ ଉପସ୍ଥିତ ଥିଲେ। ତେବେ ଜବର ଦଖଲ ଉଚ୍ଛେଦ ହୋଇଥିବା ସ୍ଥାନରେ ଗଛ ଲଗାଇବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି।
