ନୂଆଦିଲ୍ଲୀ,୧୦।୪ (ପି.ଟି.)-୧୯୭୫ ହକି ବିଶ୍ୱକପ୍ ବିଜେତା ତଥା କିମ୍ବଦନ୍ତୀ ଭାରତୀୟ ହକି ଖେଳାଳି ଆଶୋକ ଦିଓ୍ବାନ ଆମେରିକାରେ ଫସି ରହିଛନ୍ତି। ଟ୍ରାଭେଲ ରେଷ୍ଟ୍ରିକ୍ସନ ବା ଭ୍ରମଣ ଜନିତ କଟକଣା ଯୋଗୁ ସେ ସ୍ବଦେଶ ପ୍ରତ୍ୟାବର୍ତ୍ତନ କରିପାରୁ ନାହାନ୍ତି। ଭାରତ ଆସିବା ପାଇଁ ସେ ଏବେ କେନ୍ଦ୍ର ସରକାରଙ୍କ ସାହାଯ୍ୟ ଲୋଡିଛନ୍ତି। ତାଙ୍କ ସ୍ବାସ୍ଥ୍ୟାବସ୍ଥା ଦିନକୁ ଦିନ ଖରାପ ହେଉଛି। ଏ ନେଇ ସେ ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ) ଅଧ୍ୟକ୍ଷ ତଥା ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍) ମୁଖ୍ୟ ନରିନ୍ଦର ବାତ୍ରାଙ୍କୁ ଅବଗତ କରାଇଛନ୍ତି ଓ ନିଜ ସମସ୍ୟା ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇବା ପାଇଁ ଅନୁରୋଧ କରିଛନ୍ତି।
ଗତ ସପ୍ତାହରେ କାର୍ଲିଫର୍ନିଆର ଏକ ହସ୍ପିଟାଲରେ ଜରୁରିକାଳୀନ ସ୍ବାସ୍ଥ୍ୟ ପରୀକ୍ଷା କରାଇବାକୁ ଆମେରିକା ଯାଇଥିଲି ଓ ଏବେ ମୋର ଦେହ ଖରାପ ଅଛି। ଏଠାରେ ମୋର ଇନ୍ସ୍ୟୁରାନ୍ସ ମଧ୍ୟ ନାହିଁ। ମେଡିକାଲ ଖର୍ଚ୍ଚ ମଧ୍ୟ ଅତ୍ୟଧିକ ରହିଛି ବୋଲି ଚିଠି ଲେଖି ଦିଓ୍ବାନ ବାତ୍ରାଙ୍କୁ ଜଣାଇଛନ୍ତି। ପ୍ରଥମେ ଏପ୍ରିଲ ୨୦ ତାରିଖରେ ଏୟାର ଇଣ୍ଡିଆ ମାଧ୍ୟମରେ ଭାରତ ଫେରିବାର କାର୍ଯ୍ୟକ୍ରମ ଥିଲା। ତେବେ କୋଭିଡ-୧୯ ମହାମାରୀ କାରଣରୁ ମୋ ଭ୍ରମଣ ତାରିଖକୁ ଘୁଞ୍ଚାଇ ଦିଆଯାଇଛି ବୋଲି ଦିଓ୍ବାନ କହିଛନ୍ତି। ମୋର ଏହି ବାର୍ତ୍ତାକୁ କ୍ରୀଡ଼ାମନ୍ତ୍ରୀ ଓ ବୈଦେଶିକ ମନ୍ତ୍ରଣାଳୟ ନିକଟରେ ପହଞ୍ଚାଇବାକୁ ସେ ଅନୁରୋଧ କରିଛନ୍ତି। ମୋର ଚେକ୍ ପାଇଁ ଏକ ହସ୍ପିଟାଲ୍ ଓ ସାନ୍ ଫ୍ରାନ୍ସିସ୍କୋରୁ ଭାରତ ଫେରିବା ପାଇଁ ବ୍ୟବସ୍ଥା କରିବାକୁ ସେ ନିବେଦନ କରିଛନ୍ତି।
ଭାରତ ଫେରିବା ପରେ ସବୁ ବିଲ୍ ପୈଠ କରିବାକୁ ସେ କଥା ମଧ୍ୟ ଦେଇଛନ୍ତି। ମୋ ଦେହ ଖରାପ ଥିବାରୁ ଏ ନେଇ ଶୀଘ୍ର ବ୍ୟବସ୍ଥା କରିବାକୁ ୧୯୭୫ ହକି ବିଶ୍ୱକପ୍ ହିରୋ କହିଛନ୍ତି। ଉଲ୍ଲେଖଥାଉ କି, ୧୯୭୬ ଅଲିମ୍ପିକ୍ ଟିମ୍ର ସଦସ୍ୟ ଦିଓ୍ବାନ ଗତ ଡିସେମ୍ବରରେ ଆମେରିକାର ସାକ୍ରେମେଣ୍ଟୋରେ ରହୁଥିବା ତାଙ୍କ ପୁଅ ନିକଟକୁ ଯାଇଥିଲେ। ତେବେ ସେ ଟ୍ରାଭେଲ ରେଷ୍ଟ୍ରିକ୍ଶନ କାରଣରୁ ଫସି ରହିଛନ୍ତି ବାଲି ଦିଓ୍ବାନଙ୍କ ଝିଅ ଆରୁଷୀ କହିଛନ୍ତି। ଭାଇ ଅବିବାହିତ ଅଛନ୍ତି ଓ ତାଙ୍କ ଦେହ ହଠାତ୍ ଖରାପ ହୋଇଯାଇଛି। ଡାକ୍ତର ତାଙ୍କୁ ଗୋଟିଏ ମାସର ଔଷଧ ଦେଇଛନ୍ତି। ତେବେ ଏହା କାମ ଦେଉନି। ବାପା ତାଙ୍କ ମେଡିକାଲ ଇନ୍ସ୍ୟୁରାନ୍ସ ନେବାକୁ ଭୁଲି ଯାଇଛନ୍ତି ବୋଲି ଆରୁଷି ଓ ତାଙ୍କ ମା କହିଛନ୍ତି। ପୁଣି ଆମେରିକାରେ କରୋନା ଭାଇରସ ସଂକ୍ରମଣ ବିପଦଜନକ ପରିସ୍ଥିତି ସୃଷ୍ଟି କରିଛି। ଏପରିସ୍ଥଳେ ଆମ ପାଖରେ କିଛି ଉପାୟ ନାହିଁ। ତେଣୁ ସରକାର ଆମକୁ ସହାଯ୍ୟ କରିବାକୁ ଆଗେଇ ଆସିବେ ବୋଲି ଆରୁଷୀ ଆଶା ପ୍ରକାଶ କରିଛନ୍ତି।
