ବେଗୁନିଆପଡ଼ା,୨୦ା୮(ଡି.ଏନ.ଏ.)-କେହି ଯେଭଳି ଭୋକିଲା ନ ରହିବେ ସେଥିପାଇଁ ଖାଦ୍ୟ ନିରାପତ୍ତା ଆଇନ କାର୍ଯ୍ୟକାରୀ ହୋଇଛି। ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଗରିବ ଲୋକଙ୍କୁ ରାଶନ କାର୍ଡ ଯୋଗାଇ ଦିଆଯାଇଛି। ୨୦୧୫ରୁ ଏହି ଆଇନ କାର୍ଯ୍ୟକାରୀ ହୋଇଥିଲେ ମଧ୍ୟ ଅଦ୍ୟାବଧି ସମସ୍ତ ଗରିବ ପରିବାର ରାଶନ କାର୍ଡ ପାଇପାରିନାହାନ୍ତି। ଯେତେ କାର୍ଡ ପ୍ରଦାନ କରାଗଲେ ବି ଆବେଦନକାରୀଙ୍କ ସଂଖ୍ୟା କମୁନାହିଁ। ଏହାର କାରଣ ଅନେକ ଭୂତ କାର୍ଡଧାରୀ ରହିଥିବା ହୃଦବୋଧ କରି ସମସ୍ତଙ୍କ ଆଧାର ନଂମ୍ବର ସଂଯୋଗ କରିବା ପାଇଁ ସରକାର ନିଷ୍ପତ୍ତି ନେଇଛନ୍ତି। ଆଧାର ସଂଯୋଗ ପାଇଁ ଆସନ୍ତା ୩୧ ତାରିଖ ପର୍ଯ୍ୟନ୍ତ ଅବଧି ଥିଲେ ମଧ୍ୟ ବେଗୁନିଆପଡ଼ା ବ୍ଲକରେ ଅନେକ ହିତାଧିକାରୀ ସେମାନଙ୍କ ଆଧାର ସଂଯୋଗ କରିନାହାନ୍ତି। ଆଉ ମାତ୍ର ୧୦ ଦିନ ପରେ ଆଧାର ସଂଯୋଗ ନ ହେଲେ ରାଶନ ସାମଗ୍ରୀ ବନ୍ଦ କରାଯିବ ବୋଲି ସରକାରଙ୍କ ପକ୍ଷରୁ ଘୋଷଣା କରାଯାଇଛି। ବ୍ଲକରେ ବର୍ତ୍ତମାନ ୧ଲକ୍ଷ ୭୬୦ଜଣ ରାଶନ କାର୍ଡ ହିତାଧିକାରୀ ଅଛନ୍ତି। ସେଥିମଧ୍ୟରୁ ୯୪ ହଜାର ୨୪୮ ଜଣଙ୍କର ଆଧାର ସଂଯୋଗ ହୋଇଛି। ବଳକା ୬ ହଜାର ୫୧୨ ଜଣ ବର୍ତ୍ତମାନ ସୁଦ୍ଧା ଆଧାର ସଂଯୋଗ କରିନାହାନ୍ତି ବୋଲି ବ୍ଲକ ଯୋଗାଣ ଅଧିକାରୀ ପୁରଞ୍ଜୟ ସାହୁ କହିଛନ୍ତି। ଯୋଗାଣ ବିଭାଗ ପକ୍ଷରୁ ମାଇକ ଦ୍ୱାରା ପ୍ରଚାର, ବ୍ୟାନର ଓ ପୋଷ୍ଟର ମାଧ୍ୟମରେ ସଚେତନ କରାଯାଉଥିଲେ ମଧ୍ୟ ହିତାଧିକାରୀ ସଚେତନ ହେଉ ନ ଥିବାରୁ ବାଧ୍ୟହୋଇ ଯୋଗାଣ ସହାୟକମାନେ ଘର ଘର ବୁଲି ହିତାଧିକାରୀଙ୍କୁ ଆଧାର ସଂଯୋଗ ନିମନ୍ତେ କହୁଛନ୍ତି। ତଥାପି ମଧ୍ୟ ଲୋକେ ସହଯୋଗ କରୁ ନ ଥିବା ଜଣାପଡ଼ିଛି।
