ଭୁବନେଶ୍ୱର,୨୬।୪(ବ୍ୟୁରୋ): ରବିବାର ଅକ୍ଷୟ ତୃତୀୟା ବା ଅଖିମୁଠୀ। ପ୍ରତିବର୍ଷ ଭଳି ଚାଷୀପୁଅ କୃଷି କାର୍ଯ୍ୟର ଶୁଭାରମ୍ଭ କରିବ। ମାଟି ମା’କୁ ପୂଜାକରି ବର୍ଷକ ପାଇଁ ଯୋଗାଡ଼ କରିବ ଆହାର। ରାଜ୍ୟରେ ଏହି ଦିନ ହେଉଛି ଓଡ଼ିଆ ଚାଷୀ ପରିବାରଙ୍କ ପାଇଁ ଅତ୍ୟନ୍ତ ଶୁଭ ଦିନ। ଏହି ଦିନ ମଧ୍ୟ ମହାପ୍ରଭୁ ଶ୍ରୀଜଗନ୍ନାଥଙ୍କ ରଥ ପାଇଁ କାଠ ଅନୁକୂଳ ହୁଏ। କେଉଁ ଅନାଦି କାଳରୁ ରାଜ୍ୟରେ ପ୍ରଚଳିତ ହୋଇ ଆସିଛି ଏହି ପରମ୍ପରା। ତେବେ ଚଳିତ ବର୍ଷ କରୋନା(କୋଭିଡ-୧୯) ମହାମାରୀ ଚାଷୀ ଆଗରେ ଏକ ବିରାଟ ପ୍ରତିବନ୍ଧକ ଭାବେ ଛିଡ଼ା ହୋଇଛି। ଚାଷୀମାନଙ୍କ ଆର୍ଥିକ ମେରୁଦଣ୍ଡକୁ ଭାଙ୍ଗି ଦେଇଛି। କରୋନା ସଂକ୍ରମଣକୁ ରୋକିବା ପାଇଁ କେନ୍ଦ୍ର ଓ ରାଜ୍ୟ ସରକାର ଲକ୍ଡାଉନ ଘୋଷଣା କରିଛନ୍ତି। ମାସକାଳ ବିଲକୁ ହଳ ଯାଇ ନାହିଁ। ଯାହାକିଛି ପନିପରିବା, ଶାଗମୁଗ ଚାଷ ହୋଇଥିଲା ସେସବୁ ବିଲରେ ଉଜୁଡ଼ି ଗଲା। ମାସ ମାସ ଧରି ଲହୁ ଲୁହକୁ ଏକାଠି କରି ଫଳେଇଥିବା ଫସଲର ମୂଲ ପାଇଲା ନାହିଁ। ଆର୍ଥିକସ୍ତରରେ ଚାଷୀମାନେ ଏକ ପ୍ରକାର ଦେବାଳିଆ ହୋଇ ଯାଇଛନ୍ତି। ନିକଟରେ ଚାଷ କାର୍ଯ୍ୟ ପାଇଁ ସରକାର ଲକ୍ଡାଉନ କଟକଣାରେ କୋହଳ କରିବା ପରେ ଚାଷୀ ବିଲକୁ ଯାଇପାରୁଛି। ତେବେ ଅକ୍ଷୟ ତୃତୀୟାରୁ ଚାଷୀମାନେ ପୁଣି ଅଣ୍ଟା ଭିଡ଼ିବେ। ପରମ୍ପରା ଅନୁଯାୟୀ ଅଖିମୁଠିଅନୁକୂଳ ହେବ ବୋଲି ଚାଷୀ ଚୈତନ୍ୟ ପରିଡ଼ା କହିଛନ୍ତି। ସେ କହିଛନ୍ତି ଯେ, ଲକ୍ଡାଉନ ଯୋଗୁ ପନିପରିବା ଉଜୁଡ଼ି ଗଲା। ଏବେ ଅଦିନିଆ ବର୍ଷା ମୁଗ ବିରି ଫସଲକୁ ଉଜାଡ଼ି ଦେଇଛି। ଲକ୍ଡାଉନ ଯୋଗୁ ବିଲ ହଳ ନ ହୋଇ ପଡ଼ିଆ ପଡ଼ିଛି। ଘାସ ମରି ନ ଥିବାରୁ ଧାନ ଫସଲ ପାଇଁ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ିବ। ଲକ୍ଡାଉନ କଟକଣା ଉଠାଇ ଦିଆଯାଇଥିବାରୁ ଏବେ ହଳଲଙ୍ଗଳ ଏବଂ ଟ୍ରାକ୍ଟର ଚାଷ କାମ ଆରମ୍ଭ ହୋଇଛି। ଚାଷ ଆମର ଜୀବିକା। ଏହାକୁ ଛାଡ଼ି ଆମେ ବଞ୍ଚତ୍ପାରିବୁ ନାହିଁ। ସରକାର ସାର, ବିହନ, କୀଟନାଶକ ଏବଂ ଋଣ ଯୋଗାଇଦେଲେ ଆମେ ଚାଷୀକୁଳ ଟିକେ ଉପକୃତ ହୋଇପାରିବୁ ବୋଲି ସେ କହିଛନ୍ତି। ସେହିପରି ଅନ୍ୟଜଣେ ଚାଷୀ ମୋହନ ବିଶ୍ୱାଳ କହିଛନ୍ତି ଯେ, ଆମ ଜୀବନ କାଳରେ ଏଭିଳ ବିପତ୍ତି କେବେ ଦେଖି ନ ଥିଲୁ। ରୋଗ ଏମିତି ଅଚଳ କରିଦେବ କେବେବି ବିଶ୍ୱାସ କରି ହେଉନି। ଜୀବନ ରକ୍ଷା ପାଇଁ ସରକାର ବନ୍ଦ ଘୋଷଣା କଲେ। ଏହା ଏକ ଭଲ ପଦକ୍ଷେପ। ଜୀବନ ସିନା ବଞ୍ଚତ୍ୟିବ, ହେଲେ ଜୀବିକା ମରିଯାଉଛି। ମାଣେ ଜମିରେ ବାଇଗଣ, ଆଳୁ, ପିଆଜ, ପୋଟଳ, କଖାରୁ, ଟମାଟର କରିଥିଲି। ନିଜ ପରିଶ୍ରମକୁ ଛାଡ଼ି ଦେଢ ଲକ୍ଷ ଟଙ୍କା ଖର୍ଚ୍ଚ କରିଥିଲି। ଅଳ୍ପକିଛି ଆଦାୟ ହୋଇଥିବା ବେଳେ ମୂଳଜମା ଉଠିବା ପୂର୍ବରୁ ସବୁକିଛି ବନ୍ଦ ହୋଇଗଲା। ବିଲରେ ପରିବା ପାଚି ଶୁଖି ନଷ୍ଟ ହୋଇଗଲା। ଅଦରରେ ମଧ୍ୟ ବେପାରୀ ନେଲେ ନାହିଁ। ବିଲରେ ଗୋରୁଙ୍କୁ ଛାଡ଼ି ଦେଲୁ। ଏବେ ଧାନ ଚାଷ ସମୟ ଆସୁଛି। ଅଖିମୁଠିତ ନିଶ୍ଚୟ କରିବୁ ହେଲେ ଚାଷ ପାଇଁ ଟଙ୍କା କେଉଁଠୁ ଆଣିବୁ, ତାକୁ ନେଇ ଚିନ୍ତାରେ ରହିଛୁ। କେବଳ ଏ ଦୁଇ ଚାଷୀ ନୁହନ୍ତି, ସମଗ୍ର ରାଜ୍ୟରେ ଚାଷୀଙ୍କର ସମାନ ଅବସ୍ଥା। କରୋନା ମହାମାରୀ ସଙ୍କଟ ଚାଷୀକୁଳକୁ ଦୁର୍ଦ୍ଦିନକୁ ଠେଲି ଦେଇଛି। ପୁଣି ଅଣ୍ଟା ଭିଡ଼ି ଆଗକୁ ଯିବା ଲାଗି ଚାଷୀକୁଳ ସଜବାଜ ହେଉଛି। ରାଜ୍ୟରେ ଚଳିତ ବର୍ଷ ୬୦ଲକ୍ଷ ହେକ୍ଟରରେ ଧାନ ଚାଷ ହେବାର ଲକ୍ଷ୍ୟ ରହିଛି। ଚଳିତ ବର୍ଷ ଦକ୍ଷିଣପଶ୍ଚିମ ମାୈସୁମୀ ସ୍ବାଭାବିକ ରହିବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ପାଗଯୋଗ ଠିକ ରହିଲେ ଓଡିଶା ପୁଣି ଧାନ ଉପତ୍ାଦନରେ ଆଗୁଆ ରାଜ୍ୟ ହୋଇପାରିବ ବୋଲି କୃଷି ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି।
