ପର୍ଲା, ୨୦।୧ (ଡି.ଏନ୍.ଏ.)- କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଦଣ୍ଡପାଟ ଅଂଚଲ ଛଞ୍ଚାଣବାହାଲି ପଁଚେତ୍ ଅଧୀନ ବେହେରାଗୁଡ଼ା ଗଁାର ସୁବାସ ଦୋରୁଆନ(୪୫)କଁର ଶୁକୁରବାର ମୁର୍ତୁ ହେଇଥିଲାବେଲେ ତାକର ୩ ଝି’ପୁଓ ବେସାହାରା ହେଇଯାଇଛନ୍। ଏନ୍ତାଥି ମା’ବାପ୍ ଛେଉଁଡ୍ ୩ ଭାଇବହେନ୍କର ଭବିଷତ୍ ଗୁଟେ ପରକାର ଅଁଧାରକେ ଠେଲି ହେଇଯାଇଛେ।
ସୂଚନା ଅନ୍ସାରେ ବେହେରାଗୁଡ଼ା ଗଁାର ସୁବାଷ ଦୋରୁଆନ। ଆଏଜ୍କେ ୪ ବଛର ତଲେ ସେ କୁଷ୍ଠ ରୋଗ୍ରେ ଆକ୍ରଁାତ ହେଇଥିଲେ। ପରିବାରଟା ନିହାତି ଗରିବ୍, ସୁବାସ କୁଲିମଜୁରି କରି କୁଟୁମ ପୁଷୁଥିଲେ। ରୋଗ୍ରେ ଆକ୍ରଁାତ ହେଲା ଉତାରୁ ଅନେକ ଚିକିଛା କରେଥିଲେ ବି ସବୁବେଲେ ମାନସିକ୍ ଚାପ୍ରେ ରହୁଥିଲେ। ଶେଷେ କାମ୍ବୁତା କରବାର ଛାଡ଼ିଦେଲେ। ଏନ୍ତା ପରିସ୍ଥିତିରେ ସୁବାସକଁର ମାଏକିନା ବି ବଛ୍ରେ ତଲେ ନିଜର ୩ ଛୁଆ ନନ୍ଦିନୀ(୭), ମାନସ(୪) ଆର ବାହୁବଳୀ(୨)କଁୁ ଛାଡ଼ି ପଲେଇଗଲେ। ସେଦିନ୍ଠାନୁ ୩ ନାତିନାତେନକର ବୋଝ୍ ଆଈବୁଢ଼ି ସୁଲୋଚନା(୬୫) ଉଠଉଛନ୍। ହେଲେ ବୁରୁଧ୍ ସୁଲୋଚନା ବି ବଡ଼ା କଷ୍ଟେ ଦୁଖ୍ସୁଖ କରି ନାତିନାତେନକଁର ଲାଗି ଆହାର ଯୁଟଉଛନ୍। ଏନ୍ତା ପରିସ୍ଥିତିରେ ଗଲା ଶୁକୁରବାର ସୁବାସ ବି ଆରପାରକେ ଚାଲିଯାଇଛନ୍। ଏହେଦେ ନାତିନାତେନକଁର ଭବିଷତ୍ ପୂରାପୂରି ବାଈବୁଢ଼ି ସୁଲୋଚନାକଁର ଉପରେ ଲଦି ହେଇଛେ। ହେଲେ ବଏସ୍ ଅଧ୍କା ହେବାର ଲାଗି ବୁରୁଧ୍ ସୁଲୋଚନା ବି ଆଘର ଲେଖେଁ କାମ୍ବୁତା କରି ନାଇଁପାରବାର। ମୁଇଁ ଆଏଁଖ୍ ମୁଜିଦେଲେ ଇ ଛୁଆକର କାଣା ହେବା, କେନ୍କେ ଯିବେ, ତାକର ଭବିଷତ୍ କାଣା ହେବା ବଲି ନାନା କଥା ଚିନ୍ତା କରି ସୁଲୋଚନା ହରମେଶା ଅଁାଖିରୁ ଲହ ଗଡ଼ଉଛନ୍। ଇଆଡ଼େ ନାତେନଟା ପଢ଼ବାର ଆରମ୍ କରିଥିଲାବେଲେ ମଝିଅଁା ନାତି ଘରେ ଖେଲାବୁଲା କରୁଛେ। ସେନ୍ତା ସାନ ନାତି ବାହୁବଳୀ(୨) ଏହେଦେ ବି ଅବୁଝା। ସେ ସବୁବେଲେ ମା’କେ ଝୁରି ହେବାର ସଂଗେ କ୍ଷୀର ଖାଏବାର ଲାଗି ଅରଷ୍ଟି କରୁଛେ। ଇ ଦୁଖି ପରିବାର ଉପରେ ଜିଲା ଆର ଥାନୀଅ ପରଶାସନ ଦୁରୁଷ୍ଟି ଦେଇ ନିଷ୍ପାପ ମା’ବାପ୍ ଛେଉଁଡ୍ ୩ ଭାଇଭହେନ୍କୁ ଥଇଥାନ କରବାରକେ ଗଁାବାସୀ ଦାବି କରିଛନ୍।
